Dual PanelRaha Oné Tésalonika
1Hi Paulus agu hi Silas lako lagé salang Amfipolis agu Apolonia agu cai oné Tésalonika. Nitu manga ca mbaru ngaji data Yahudi.
2Ného laséngn hi Paulus ngo oné mbaru ngaji hituy. Tédéng telu leso Sabat kéta hia toing isé oné mai Surak Nggeluk.
3Tombo agu toi liha agu isé te Mésias hitu paka ta’ong susay agu mosé koléy oné mai ata mata, itu kali mai taé diha: “Ho’oy Mésias, ngong Mori Yésus ho’ot keréba laku oné méu.”
4Pisa taus oné mai isé ciri imbis. Isé lut hi Paulus agu hi Silas, nenggitu kolé pisa taus ata Yunani situt hiang Mori Keraéng, agu toé cekoés iné-wai ata tu’a laings.
5Maik sanggéd ata Yahudi beti naid, itu kali tegi campé de pisa taus ata da’at situt hai-haos oné amba, te isé pandé ngai-ngaok agu raha oné béndar hitu. Isé purak mbaru di Yason, kudut ali hitu pandé dungkang hi Paulus agu hi Silas oné lonto léok de ro’éng.
6Maik du toé di itad isét sua, ata da’at situ sorok hi Yason agu pisa taus weki serani nggere-oné ranga data tu’a laingn oné béndar, cang agu ciékd: “Ata pandé ngai-ngaok oné temu tana lino cai cé’é ités ga,
7agu hi Yason ho’o tiba isé oné mbarun. Sanggéd isé pandé lagé perénta de Kaisér Roma ali taé, manga raja bana, ata ngasangn hi Yésus.”
8Du dengé le lawa do agu sanggéd ata tu’a laing oné béndar, isé cirik hawi-haol.
9Maik du poli sambé le séngn oné mai hi Yason agu oné mai asé-ka’é situt ca imbi, itus kali legod lisé.
Hi Paulus Agu Hi Silas Oné Beréa
10Wié hitu muings, gélang-gélang asé-ka’é ca imbi nitu jera hi Paulus agu hi Silas ngo oné Beréa. Du cai nitud, itus kali ngo oné mbaru ngaji data Yahudi.
11Ata Yahudi oné béndar hitu céwé di'a naid, itu po ata Yahudi oné Tésalonika. Isé tiba reweng hitu ali nisang naid agu lété leso isé bacang surak nggeluk, kudut pecing tu’ung ko toé sanggéd situt poli tombod.
12Ali hitu do oné mai isé cirik imbis, agu do kolé ata Yunani situt dai tu’ad, iné-waid agu ata ronad.
13Maik du pecing lata Yahudi oné mai Tésalonika te oné Beréa poli tiba keréba de Mori Keraéng oné mai hi Paulus, itu kali maid isé kudut reku agu pandé géga nai data do.
14Maik asé-ka’é situt ca imbi jera hi Paulus gélang koé ngo sili nanga, maik hi Silas agu hi Timotéus kong kid ka’éng oné Beréa.
15Ata situt lako agu hi Paulus, podo lisé cai oné Aténa, itus kali koléd agu ba pedé latang te hi Silas agu hi Timotéus, kudut isé gélang koé mai neki ca agu hias.
Hi Paulus Oné Béndar Aténa
16Lari géréng isén hi Paulus oné Aténa, wéong kéta nain ai itas liha oné béndar hitu do kéta tato latang te imbi pina-naéng.
17Landing hitu oné mbaru ngaji, hia tombo-tombo agu ata Yahudi agu sanggéd ata situt hiang Mori Keraéng agu oné natas béndar lété leso agu ata situt cumang diha nitu.
18Nggitu kolé agu ata nggepuk oné mai diding Épikuros agu Stoa, léwang tau agu hia agu manga ata taé: “Apa ata kudut tombo dihat joak ho’o?” Mai kolé taé data iwod: “Hia ho’o aram ba keréba déwa-déwa bana.” Ai hi Paulus ba Keréba Di’a tombo Mori Yésus agu mosé kolén oné mai ata mata.
19Itu kali dadén hia lisé oné sidang Aréopagus agu taé: “Ngancéng toing agu ami tombo weru ho’ot keréba dité?
20Ai ité tombo agu ami keréba bana. Kudut pecing lami apa betuan keréba weru hitu.”
21Sanggéd ata Aténa agu ata long nitu, toé manga sokor gori bana, hanang latang te curup agu séngét sanggéd cao-ca situt weru.
22Hi Paulus hesé oné sidang Aréopagus agu mai taén: “Oé ata Aténa, ita laku méu seber kéta te ngaji kamping déwa-déwa.
23Ai du lako-lakog aku oné béndar de méu agu lélo-lélo tato situt suju de méu, ita kolé laku ca compang ata manga tulisn: Latang te Mori Keraéng ata toé pecingy. Mori Keraéng hitut suju maik toé pecing le méu, hituy ho’ot keréba daku oné méu.
24Mori Keraéng poli dédék lino ho’o agu sanggéd icin. Hia hitut Mori de awang agu lino, toé ka’éng oné mbaru ata pandé le limé de manusiay.
25Hia kolé toé gatang le limé de manusia, néhot Hia toé manga hapén, ai Hia kali ata téi mosé agu nai agu sanggéd cao-ca oné sanggén ata.
26Oné mai cengata kaut, Hia poli dédék sanggéd wa’u agu sanggéd ata manusia, kudut ka’éng oné temu tana lino, agu Hia poli wérét sanggéd cekeng latang te isé agu watas ka’éng disé,
27kudut isé kawé Mori Keraéngs agu dumpu lisé, koném po Hia toé manga tadangn oné mai néténg-néténg ité.
28Ai oné Hia ité mosé, huli, manga, cama ného hitut poli taé lisét tulis: Ai ité ho’o waé Diha kolét.
29Ai ité oné mai waé de Mori Keraéng, ité toé ngancéng rékéng Mori Keraéng cama ného tato situt pandé oné mai emas ko pérak ko watu ata pandé lorong pecing de manusia.
30Cekeng bodok dité polig hémongn le Mori Keraéng. Te ho’on Hia perénta sanggén ata nia kaut wan, kudut teser.
31Ai Hia poli wérét ca leso kudut bicar lino le cengata ata poli tétin Liha. Agu kudut imbin le sanggén ata, Mori Keraéng poli pandé mosé kolé ata hitu oné mai ata matan!”
32Du dengé lisé tombo mosé kolé data mata, manga ata loérd, agu ata iwod mai taéd: “Dia-diang kaut po séngétn tombo de hau hitu ta.”
33Itu kali legongd isé li Paulus.
34Maik pisa taus oné mai isé neki-ca agu hias agu cirik imbis, agu cengata oné mai isé situ hi Dionisius, weki disét Aréopagus agu cengata iné-wai ngasangn hi Damaris agu ata bana ata cama-cama agu isé.