Dual PanelRapang Latang Te Adak Ata Toé Agil
1Mori Yésus tombo ca rapang agu isé kudut keri, te isé paka ngaji mtaungs, néka kangél.
2Mai taé Diha: “Oné ca béndar manga cengata adak ata toé rantang Mori Keraéngy, agu toé kéta hiang cengatan liha ata.
3Agu oné béndar hitu kolé manga cengata iné-wai luang, ata ngo mtaungy oné adak hituy, mai taén: Campé koé akut ité oné beté-bicar te lawang ata bali daku.
4Manga pisa leso béhéngn, ogoy adak hitu. Maik ného cepisan, mai taén oné nain: Koném po aku toé rantang Mori Keraéngk, agu toé hiang céing kautk,
5maik soho iné-wai luang ho’o pandé susa akuy, co’om molor kaut hia laku, boto dehét mtaung hia main, agu cemoln hia pegar akuy.”
6Mai taé de Mori Yésus: “Na’a di’a oné pucu lolom apa hitut taé de adak hitut toé agil!
7Toé weli Mori Keraéng te pandé molors ata situt pilén, situt wié lesod kepok oné Hiad? Manga weli lé-lén Liha leso be bolon campé isé?
8Aku taé agu méu: Hiat te gélang pandé molor kaut isé. Maik, émé maiy Anak Manusia hitu, di’am manga itan Liha ata imbi oné lino?”
Rapang Latang Ata Parisi Agu Ata Tegi Béa
9Agu oné pisa tau ata situt le taé rud molor, agu lélo radak taung ata bana, Mori Yésus tombo rapang ho’o:
10“Manga sua taus ata ngo oné Mbaru de Mori Keraéng te ngajis. Hia cengata ata Parisi, agu hiat cengata ata tegi béa.
11Ata Parisi hitu hesé dion oné mai ata bana agu ngaji nenggo’oy: Yo Mori, aku wali di’a agu Ité, ai aku toé ného ata situk, toé ata purak, toé ata gutek, toé ata mbérongk, agu toé kolé ného ata tegi béa ho’ok;
12aku puasa suangkalig ca minggu, aku téing ca-patipulu oné mai sanggéd cir koég.
13Maik hiat tegi béa hitu hesé déu-déuy, ngot hia toé nga’on te conga nggere-éta awang, maik hia kali entap di’a berambangn, agu mai taén: Yo Mori, ba’éng koé aku ho’ot ndékok.
14Aku taé agu méu: Ata ho’o kolé mbarun ného ata hiot molor laing le Mori Keraéng, agu ata hitut cebana toé. Ai céing ata éta pengémpang le run, hia te rendaky, agu céingy ata nggere-wa le run, hia te téti éta pengémpangy.”
Mori Yésus Berkak Anak Koé (Mat 19:13-15; Mr 10:13-16)
15Itu kali maid ata, dadé anakd situt ngai koéd oné Mori Yésus, kudut Hia omar agu berkak iséy. Ita hitu, ata nungku Diha rabo ata situ.
16Maik Mori Yésus bénta isé, agu mai taéN: “Ondangd anak koé situ mai cé’é Akud, agu méu néka caka isém, ai ata situt nenggitus, ata manga paéng Adak de Mori Keraéngd.
17Aku taé agu méu: Moro matan kéta, céing ata toé tiba Adak de Mori Keraéng ného cengata anak koé, hia toé kéta ngo bonéy.”
Ata Bora Menan Ngo Oné Adak De Mori Keraéng (Mat 19:16-26; Mr 10:17-27)
18Manga cengata ata tu’a laingy, réi Mori Yésus, mai taén: “Tuang Guru ata di’a, apa kétay paka pandé laku te haéng mosé tédéng lén?”
19Mai walé de Mori Yésus: “Co’o tara taé ata di’ag Aku le hau? Toé manga cengatan ata di’a, hanang Mori Keraéng kanang kali.
20Hau toét-toé pecing taungs Adak de Mori Keraéng: néka mbérong, néka paki ata, néka tako, néka sabi nggopét, hiang ga emam agu endém.”
21Mai taé data hitu: “Sanggéd situ poli taungs lorongd laku pu’ung rémé rebag.”
22Dengé hitu Mori Yésus, taé ngong hia: “Téké cay raja hitu ata paka pandéy le hau; pika taungs apa kaut ata manga oné haun, agu pati péar oné ata lénggés, le hitu hau te delék bora éta Surgah, poli hitu, mai nggere-cé’é agu lorong Akuh.”
23Du dengé curup hitun ata hitu, wéong kéta nain, ai hia bora bailn.
24Du itag le Mori Yésus ata hitu wéong kéta nain, mai taén: “Léng tu’ung menan ata bora ngo oné Adak de Mori Keraéng.
25Ai céwé émong ca kaba puci oné lewo jarum, itu po cengata ata bora ngo oné Adak de Mori Keraéng.”
26Agu isét dengén curup hitu, mai taéd: “Émé nenggitu, céingy ata ngancéng selamakn?”
27Mai taé de Mori Yésus: “Apa hitut toé ngancéng le manusia, le Mori Keraéng ngancéng.”
Lahén Lorong Mori Yésus (Mat 19:27-30; Mr 10:28-31)
28Mai taé di Pétrus: “Ami ho’o poli ledo taung wéang sewokgm agu lorong Itékm.”
29Mai taé de Mori Yésus ngong isé: “Aku taé agu méu, moro matan, néténg ata situt landing kaut Adak de Mori Keraéng ledo mbarud, winad ko asé ka’éd, endé-emad ko sanggéd taung anakd,
30te tiba kolé alép pisa ngkalin oné uwa ho’o muing ga, agu du leso hitu tai, hia te tiba mosé tédéng lén.”
Toi Te Telun Latang Te Susa De Mori Yésus (Mat 20:17-19; Mr 10:32-34)
31Mori Yésus bénta ata nungkun situt campulusua, agu mai taén ngong isé: “Ho’o tité ngo nggere-éta Yérusalém, agu sanggéd taung situt tulis le sanggéd nabi latang te Anak Manusia, te cai olos.
32Ai Hia téing lobo limé de uku situt toé pecing Mori Keraéngs, loér-lokéty, renti agu iso péy,
33agu isé luca agu mbelé Hias, maik leso te telun Hia mosé koléy.”
34Maik isé toé kéta haéng pa’él cekoéd taung curup situ; betuad curup situ cehas latang te isé, agu toé pecing lisé apas betuad.
Mori Yésus Pandé Ina Ata Buta Ruis Yériko (Mat 20:29-34; Mr 10:46-52)
35Lété Mori Yésus ruis cai oné Yériko, manga cengata ata buta, hitut lonto lupi salangy, ata sanggar-sanggar bon limén.
36Du ata hitu dengé nggelenggaur ata do, mai réin: “Manga apa ho’o bo gé?”
37Mai taé data ngong hia: “Hi Yésus ata Nasarét liba cé’é ho’oy.”
38Itug kali kepokn hia: “Yésus Anak di Daud, ba’éng koé aku!”
39Itu kali isét lako bolo rengkes hia kudut heman. Maik danga-danga molé étan kepokn: “Anak di Daud, ba’éng koé aku!”
40Itu kali asin Mori Yésus agu jera dadé ata hitu nggere-cé’é Hia. Agu du ata buta hitu cai ruis Mori Yésus, mai réi de Mori Yésus agu hia:
41“Apa ngoéngm kudut pandé Laku latang te hau?” Mai walé data hitu: “Mori, kudut ngancéng koé ita atag!”
42Mai taé de Mori Yésus ngong hia: “Le imbim hitu ata poli pandé selamak hau, ina hau ga!”
43Agu du hitu kéta muing, itag liha; poli hitu, lut Hiay cang agu bong Mori Keraéngn. Du lawa do situ ita tanda lenget hitu, sanggéd taung isé naring Mori Keraéng.