Alkitab Mobile SABDA
[VER] : [MANGGARAI]     [PL]  [PB] 
 <<  Markus 12 >> 

Rapang Latang Te Ata Ciwal Uma Anggor (Mat 21:33-46; Luk 20:9-19)

1Og kali Mori Yésus pu’ung toing isén ali rapang: “Manga cengata rimu uma kudut po’ong anggorn agu kena taung baling-main. Hia tekang di’a galang watu te kerak waé anggor, agu hesé sékang langkas kudut lamin. Poli hitu téi célong liha uma hitu oné isét ciwaln, itu kali ngo pé’ang tana pé’angy.

2Agu du rapak cain cekeng, hia wuat cengata mendin oné isét séwan uma hitu kudut tiba maki dihad oné mai ni’ang uma hitu oné mai isé.

3Maik isé deko mendi hitu agu onggay, poli hitu jera koléy toé manga ban.

4Poli hitu hia jera kolé cengata mendi bana nggere-oné isé. Ata ho’o onggay lisé wiga réu taung sa’in agu loér lokét lisé.

5Og kali jera kolé cengata mendi bana, agu ata ho’o ala lampuk wan lisé. Agu do kolés mendi bana, mangas ata onggad lisé, agu mangas ata alad.

6Og kali retang hanang cengata kanangy, anak run ata momang kétay liha. Turung cemoln wuat liha hia nggere-oné isé, ai nggo’o nukn: Anak daku ho’o, toét-toé sengang lisé.

7Maik isét séwa uma hitu curup cama taud: Hia ho’op ata na’a mbaté de eman, wajo é, ala hia lité, kudut mbaté so’o dités morid.

8Isé deko hia, agu alay lisé, agu peké nggere-pé’ang mai uma anggor hituy.”

9“Ho’o ga, co’o weli pandé dihat ngara uma hitu? Hia kudut mai agu ala kéta taungs isét séwa uma hitu, poli hitu téing uma hitu sawi lata banay.

10Toé de’it baca le méu go’ét ho’o ko: ‘Watu hiot oké le tukang, poli ciri watu landuk laingn:

11nenggituy de pandé de Morin, ca pandé tanda lenget oné ranga dité.’”

12Op kali énggérn lisé kudut deko Mori Yésus, ai pecing lisé, ngong isé rapang Diha hitu. Maik isé rantang lawa dos, itug kali ngod agu legong kaut Hias.

Latang Te Téi Taki Agu Kaisér (Mat 22:15-22; Luk 20:20-26)

13Poli hitu jera lisé pisa taus ata Parisi agu wa’i-limé di Hérodés nggere-oné Mori Yésus, kudut nggoko Hia ali can kaut réi.

14Sanggéd ata situ mais agu réi Hias: “Tuang Guru, pecing lami, Ité cengata ata molor, agu Ité toé manga rantang agu céing kaut, ai Ité toé manga pilé atad, maik laing molor toing salang de Mori Keraéng. Ngancéng ko toé te bajar taki agu Kaisér? Paka bajars lami ko toé?”

15Maik Mori Yésus baé limi-lemét disé, itu kali taé agu isé: “Co’o tara nggoko Akus méu? Ba cé’é ho’o can séng dinar hitu kudut lélo Laku!”

16Itu kali ban lisé. Og kali réin Liha agu isé: “Gambar agu tulis diong ho’o?” Mai walé disé: “Gambar agu tulis de Kaisér.”

17Mai kolé taé de Mori Yésus agu isé: “Téing oné Kaisér apa ata patun téing le méu oné Kaisér agu oné Mori Keraéng apa ata patun téing le méu agu Mori Keraéng!” Isé lenget kétas dengé curup Diha.

Réi Data Saduki Latang Te To’o Kolé (Mat 22:23-33; Luk 20:27-40)

18Mais oné Mori Yésus pisa taus ata Saduki, lorong nipek disé toé manga to’o kolé du poli matad. Isé réi oné Hia:

19“Tuang Guru, hi Musa tulis perénta ho’o latang te ité: ‘Émé cengata ata manga asé-ka’én, matay agu legong winan, maik toé manga anakn, asé-ka’én paka lili winan hitu, kudut manga waén hi teriha.

20Manga pitu taus asé-ka’én. Hiat ngaso na’a winay agu roway, agu toé laong manga waén.

21Poli hitu hiat te suan lili hia agu rowa koléy toé laong manga waén. Nenggitu kolé hiat te telun.

22Agu nggitu taungs isét pitu situ toé manga waéd. Agu turung cemoln du poli mata taung isé, inéwai hitu kolé roway.

23Du leso to’o kolé, émé to’o taungs isé, céing ata hitut ciri rona de inéwai hitu? Ai isét pitu situ léléng hitu kali winad.’”

24Mai walé de Mori Yésus agu isé: “Ata cibul méu, ai toé pecing le méu Surak Nggeluk agu kuasa de Mori Keraéng.

25Ai émé to’o kolés tai oné mai ata matad, toég manga laki agu toég manga wai koléd, maik mosé cama ného malékat éta Surgas.

26Agu latang te to’o koléd ata poli mata, toé bacang le méu oné surak di Musa, oné tombo pu’u karot, co’oy reweng de Mori Keraéng oné hia: Aku ho’o Mori di Abraham, Mori di Ishak, agu Mori di Yakob?

27Hia toé Mori Keraéng data mata, maik Mori Keraéng data mosé. Méu ho’o tu’u-tu’ung ata wéléngm!”

Perénta Ata Mésén (Mat 22:34-40; Luk 10:25-28)

28Manga cengata ata pecing Taurat, ata mai séngét Mori Yésus agu ata saduki léwang taud agu pecing liha te Mori Yésus walé laing salangd tu’ung oné ata situ, maiy oné Hia agu nggo’o réin: “Nia kéta perénta ata mésén?”

29Mai walé de Mori Yésus: “Perénta ata mésén ho’oy: Séngét di’a-di’a, oé ata Israél, Mori Keraéng dité, cay kali.

30Momang ga Mori Keraéng mai wa mai nais, agu lawang sanggéd wuli wekis.

31Agu perénta te suan ho’oy: Momang ga haé atas, cama ného weki rum. Toé manga perénta bana ata céwé mésén oné mai perénta so’o sua.”

32Mai taé data pecing Taurat hitu agu Mori Yésus: “Tu’ng kéta, Tuang Guru, laing molorn kéta curup Dité hitu, ngong manga ca kanang kali Mori, agu toé manga kolé Mori bana, hanang Hia.

33Tu’ung kéta paka momang hia mai wa mai nain, agu lawang nuk naid agu lawang wuli-wekid, agu momang kolé cama manusia cama ného momang weki rum, hitu kétay ata mésén oné mai sanggéd takung ata tapa molés agu ata mbelé molés.”

34Du dengén le Mori Yésus, laing salangn tu’ung walé data hitu, agu mai taé Diha ngong hia: “Toé manga tadangm hau oné mai Adak de Mori Keraéng.” Agu toég manga cengatan kolé ata ngaon te réi cao-ca oné Mori Yésus.

Mancung De Mori Yésus Agu Hi Daud (Mat 22:41-46; Luk 20:41-44)

35Manga cangkalin Mori Yésus du toing oné Mbaru de Mori Keraéng, mai taé Diha: “Co’o tara isét pecing Taurat ngancéng nggo’o taéd, te Mesias hitu anak di Daud?

36Weki run hi Daud curup ali titong de Nai Nggeluk nenggo’oy: Mori poli taé oné Mori daku: lontoh ga oné racap wanang Daku, dengkir ata balim denets Laku be wa mai wa’i de Hau.

37Weki run hi Daud caro Hia, Mori daku, co’o kolé tara anak di Daudn Hia?” Lawa do situt logur-kouk sintong kétas séngét curup Diha.

Mori Yésus Toing Kudut Jerék Di’a-di’a Agu Ata Pecing Taurat (Mat 23:5-7; Luk 20:45-47)

38Du rémé toingn, mai taéd Mori Yésus: “Jerék di’a-di’a agu ata pecing Taurat, siot lélak kétas laki-lako paké juba léwé agu lélak kétas tiba hiang data oné amba,

39ata lélak kétas lonto olo comongs oné mbaru ngaji agu lonto oné osang ata di’an du cekeng taé,

40siot enggerep wéang data luang, isé pandé baluk mata data ali ngaji siot léwé kéta. Isé so’o poli itan kudut tiba wahéng ata céwé mendon.”

Derma De Cengata Inéwai Luang Ata Lénggé (Luk 21:1-4)

41Manga cangkalin Mori Yésus lonto dungka peti derma agu itas Liha co’o kétas ata do na’a séng oné peti hitu. Dod ata bora na’a onén séng do kolé.

42Og kali mai cengata inéwai luang ata lénggé agu na’a onén diha séng koén sua rimisd.

43Itu kali béntad Liha ata nungkun agu mai taén ngong isé: “Aku taé agu méu, tu’ung kéta inéwai luang ata lénggé ho’o téing céwé do oné mai sanggéd isét na’a séng oné peti derma.

44Ai sanggéd isé situ téing landing le nahéngd, inéwai luang ho’o ningkir oné mai géongn, apa kaut ata mangan néngn, oné mosé nain.”


  Share Facebook  |  Share Twitter

 <<  Markus 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel