Alkitab Mobile SABDA
[VER] : [MANGGARAI]     [PL]  [PB] 
 <<  Roma 11 >> 

Retangd Ata Israél

1Landing hitu aku réi méu: Ngancéng Mori Keraéng te oké ro’éng Run? Toé ngancéng! Ai weki rug aku kolé ata Israél, oné mai waé di Abraham panga di Benyamin.

2Mori Keraéng toé ngancéng oké ro’éngn situt poli pilé Diha médé main. Ko toé pecing le méu ko, apa ata curup le Surak Nggeluk latang te hi Élia du hia baro isét Israél oné ranga de Mori Keraéng,

3“Mori, sanggéd nabi Dité poli taungs lisé mbeléd, sanggéd compang Dité poli taungs lisé pandé rencod, hanang koég aku kali ata ngai mosén, agu isé nanang te pandé mata akus.”

4Co’o curup de Mori Keraéng agu hia? “Ngai manga kid retang pitu sebu ata latang te Aku, ata toé dé’it manga io dewa Baald.”

5Nenggitu kolé té ho’on, manga kid retangd, ata poli piléd le Mori Keraéng lut tabingN.

6Émé pilé hitu jari ali tabing, ngong toé le pandé disé. Ai émé toé nenggituy, toé ngasang tabing koléy.

7Jari, co’o weli ga? Ata Israél toé manga haéng apa ata dolong disé, maik sanggéd ata situt poli piléd le Mori Keraéng haéng gi lisé. Agu sanggéd ata bana poli pandé teger naid,

8ného manga tulis, “Mori Keraéng pandé lémot isé, manga mata landing toé ita, manga tilu landing toé séngét, dengkir te ho’on.”

9Céwén kolé taé di Daud, “Kong demeng ramé disé, ciri serénté agu nggepit, watu timpok agu wahéng latang te isé.

10Agu kong kéta mata disé ciri nendep wiga toé itas, agu wekur disé kong wokusd.”

Isét Israél Timpoks, Wa’u Bana Selamaks

11Landing hitu aku réi méu: Asa isét Israél, timpoks wiga ampus taungs? Toé nggituy! Maik ali lagé disé, selamak hitu cai oné wa’u banay, kudut pandé jogot isét Israél.

12Ai émé lagé disé, ciri bora latang té lino, agu genggel disé ciri bora latang te wa’u bana, céwén kolé besik disé.

13Aku taé agu méu, oé sanggés méut toé wa’u Yahudi. Méséng kaut aku rasul latang te sanggéd wa’u toé Yahudi, nisang kéta nai daku oné keturug.

14Bengkes daku ngancéng pandé jogot nai de wa’u daku Israél wiga ngancéng pandé selamak pisa atan oné mai isé.

15Landing le toé tiba isé le Mori Keraéng wiga mangan hambor Hia agu lino. Apan kolé émé tibas isé le Mori Keraéng, toé weli cama ného to’o kolé ata mata?

16Émé nggelukn kabo roti laring cain, sanggén kabo hitu kolé nggelukd; émé nggeluk wakéd haju, nggeluk kolé dangkad.

17Landing hitu émé pisad dangka haju zaitun, ngong ata Yahudi poli ndapud, agu méut ata toé Yahudi, cama ného cing siot tangkep oné dangka situt poli ndapud. Wiga méu kolé ného dangka ata tiba lahén onémai nunu de haju zaitun.

18Néka mésé-nai laing latang te sanggéd dangka situt poli ndapud! Émé mésé-nai méu, nuk dé, toé méu ata téi hang latang te waké hitu, maik waké hitu ata téi hang latang te méu.

19Aik méu te curup, mangas dangka ata ndapud, kudut aku te tangkep oné haju hituk.

20Di’ab ga! Isé ndapus ali toé imbi, maik méu cedek kis ali imbi. Néka mésé-nai, maik rantang koém!

21Ai émé Mori Keraéng toé momang sanggéd dangka situt laring cain, Hia kolé toé momang méuy.

22Landing hitu pélét di’a-di’a, Mori Keraéng hitu gawas agu wegerN. WegerN hitu latang te sanggéd ata situt poli pa’ud, maik gawasN latang té méu, tama kong kis méu manga oné gawas Diha. Émé toé, méu kolé te ndapum Liha.

23Maik isé te tangkep kolés, émé isé teser onémai ndékokd, ai Mori Keraéng manga kuasan latang te tiba kolé isé.

24Méu ného dangka haju zaitun hiot todo pina-naéng. Émé méu koném po dangka ata todo pina-naéng poli tangkep oné haju zaitun pu’u, céwén kolé isé so’o ata dangka pu’u, isé té tangkep oné haju zaitun de weki rud.

Selamak Data Israél

25Asé-ka’én, kudut méu néka rékéng pintar weki rus, ngoéng daku kudut méu pecing pété ceha ho’o: Ata iwod oné mai isét Israél ciri teger naid dengkir sanggéd wa’u bana imbi oné Mori Keraéng.

26Landing le hitu sanggéd ata Israél te selamak taungs, ného manga tulis: “Oné mai Sion kudut mai Ata Sambé, Hia kudut ledék sanggéd siot da’atd oné mai waé di Yakob,

27Aku te pongo reké ho’o agu isé du Aku ampong sanggéd ndékok disé.”

28Ali toé tiba Keréba Di’a, isé situ ata bali de Mori Keraéng te ontong latang te méu. Maik lorong pilé de Mori Keraéng, isé situ ata momang Diha landing kaut le empod.

29Ai Mori Keraéng toé ngancéng emi kolés widang agu bénta Diha.

30Danong méu toé imbi Mori Keraéng, maik te ho’on méu tiba momang Diha landing le toé lorong disét Yahudi.

31Te ho’on ga, isé toé imbi Mori Keraéng wiga ali momang hitut poli tiban le méu, isé kolé te tiba momang Diha.

32Ai Mori Keraéng poli ondang sanggén ata te toé imbi, kudut Hia ngancéng toto momangN latang té sanggéd isé.

33Olé, leng kéta monggu-roud bora momang, leng keta mésén anor agu pecing de Mori Keraéng! Tu’ung kéta, toé ngancéng pélétd lité sanggéd nggepuk Diha. Tu’ung kéta, toé ngancéng pecings lité salang Diha.

34Ai céing ata pecing nuk de Mori Keraéng? Ko céing ata poli ciri ata toing Hia?

35Ko céing ata poli téi cao-ca oné Hia wiga Hia paka lesings?

36Ai sanggéd cao-ca oné mai Hiad, ali Hia, agu latang te Hia. Naring ga Hia dengkir tain! Amén.


  Share Facebook  |  Share Twitter

 <<  Roma 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel