Dual PanelAnak Jimbal Agu Surak Ata Palas Le Pitu Roku
1Itug kali ita laku ca surak ata ngai lulungn oné limé wanang Diha hitut lonto oné seriga. Surak hitu poli tulis bonén agu bepé’angn, agu palasy le pitu roku.
2Ita kolé laku cengata malekat ata gala kétay, agu télés kéta rewengn, “Céing ata patun te nggé’i sanggéd roku situ kudut surak hitu ngancéng céngkan?”
3Maik éta Surga ko oné lino ko bewa-mai lino, toé kéta manga cengatan ata ngancéng céngkan surak hitu te lélo bonén.
4Aku rétang’k ali wéong naig, ai toé kéta manga cengatan ata patun te céngkan surak hitu te lélo bonén.
5Itug kali mai taé de cengata ata tu’a situ, “Néka rétang é! Lélo dé, singa oné-mai panga Yéhuda, ngong waé di Daud polig ontongn, wiga Hia ngancéng nggé’id pitu roku situ agu céngka surak hitu.”
6Itug kali ita laku ca Anak Jimbal hesé oné bahi-réha seriga hitut léok le patd kaka agu sanggéd tu’a. Anak Jimbal hitu lélon laku néhot poli mbelén, pitud ranggan agu pitud kolé matan: Hitus pitud nai de Mori Keraéng ata poli wuat nggere-oné temu tana lino.
7Itug kali main Anak Jimbal hitu te tiba surak hitu oné-mai limé wanang Diha hitut lonto éta seriga.
8Du tiban Liha surak hitu, kaka pat situ agu suampulu pat tu’a suju olo-mai ranga Diha. Néténg-néténg isé, cau gici ca’d kecapi agu ca piala emas ata kembus le nus dupa: Hitu dé ngaji de sanggéd weki serani.
9Étan lisé ca déré weru: “Ité patun te tiba surak hitu agu nggé’i sanggéd rokun; ai Ité poli mbeléd. Ali dara Dité, poli weli sanggéd manusia oné-mai néténg-néténg panga, curup, wa’u agu ro’éng do latang te Mori Keraéng.
10Ité poli pandé isé ciri ca wa’u latang te imam kanang, te gori keturu latang te Mori Keraéng dité, agu isé te perénta ného rajas oné lino.”
11Itug kali ita agu dengéd laku reweng de malékat ata do kétas léok-mai seriga, pat kaka agu sanggéd tu’a-tu’a situ. Dod malékat situ toé ngancéng rékéngd,
12agu télés kéta déréd, “Anak Jimbal hitut poli mbelé patun te tiba kuasa, bora, nggalas, mberes, hiang, mengit, agu sanggéd naring!”
13Itug kali dengé laku déré de sanggéd lawa Surga agu oné lino, bewa-mai lino, agu sanggéd taung situt manga bonén tacik, “Latang te Hia hitut lonto éta seriga agu latang te Anak Jimbal hitu, sanggéd naring, hiang, mengit agu kuasa dengkir lén!”
14Walé de kaka pat situ, “Amén”, agu sanggéd taung tu’a situ kolé suju agu ios.