Alkitab Mobile SABDA
[VER] : [MEYAH]     [PL]  [PB] 
 <<  1 Korintus 3 >> 

1Edohuji, gij mona ongga didif dingker jera iwa sis fob bera didif danggot mar gu iwa erek rusnok ongga ruroru mar ongga Efena Ebsi oncunc gu rua rot ahais fob. Jeska gij mona insa koma bera iwa iroru Yesus Kristus erek efeinah ros. Jefeda didif duftuftu mar gu iwa erek rusnok ongga ruroru mar ongga rudou eftirir keingg ros ojgomu. Didif dita mar erek koma jeska iwa iroru Kristus erek efeinah ros, noba idou enebriyi eteb gij Allah oga rot tenten enesi.

2Giskini bera rusnok rineita marska gu rerin riser ongga riferatefa ros guru. Tina rua rita mengk gu riferatefa koma ojgomu. Erek koma tein, didif duftuftu iwa rot mar ongga ai erek osufou ojgomu. Noba erek enadaij nou eferatefa et marska enesi, beda erek koma tein didif dunoftuftu mar ongga okum gu iwa enesi. Jeska iwa idou enebriyi gij mar erek eteb enesi.

3Didif dita mar erek koma jeska iwa iroru mar oska ongga idou eftirir keingg ojgomuja ros. Koma erek, idou emejiseima noba yuga omosokuma tein. Noba mar koma bera ongga ocunc rot oida iwa iroru mar ongga oska ros morototuma erek rusnok ongga runororu Kristus guru.

4Jeska gij mona ongga iwa yuga omosokuma erek kef oida, "Memef mororu mar ongga Paulus oftuftu ojgomu," era rineya ragot oida, "Memef mororu mar ongga Apolos oftuftu ojgomu." Beda koma orocunc rot oida iwa ita mar erek rusnok ongga runororu Yesus guru roso.

5Erek koma tein, iwa idou ah keingg rot oida didif jera Apolos bera erek masnok giskini ongga maftuftu mar rot Allah oga ojgomu. Noba jeska magef maftuftu rot Allah oga gu iwa, jefeda iwa iroru Kristus fob. Magef bera matunggom mar ongga Allah oncunc gu magef ojgomu morototuma erek rusnok enjgineg ongga runtunggom mar ongga Allah oncunc gu rua tein fob.

6Didif bera ongga duftuftu Allah oga rot sismeni gu iwa ongga Korintus erek osnok egens ongga sismeni erefa marsi gij mekeni. Noba Apolos bera ongga en okahma noba oftuftu iwa rot Allah oga deika, erek osnok egens en okahma noba era mei eres marsi insa koma. Erek koma tina iwa idou ebriyi gij Allah oga insa koma oisouska Allah esinsiyai ongga ofij iwa rot tein. Koma erek Ofa ofij marsi insa koma jeskaseda er ojgomuja.

7Jefeda didif ongga duftuftu osok gij Allah oga rot sismeni, era Apolos ongga en okahma noba oftuftu rot Allah oga deika bera onofoufem guru. Koma erek osnok egens ongga erefa marsi era osnok egens ongga era mei eres marsi koma onofoufem tein guru. Tina Allah esinsiyai bera ongga ofoufem. Jeska oisouska Ofa ongga onofij iwa bera idou ebriyi gij efen oga insa koma fogora iroru ojgomuja.

8Jefeda osnok egens erefa marsi gij efen mekeni noba osnok egens eneya era mei eres marsi insa koma, tina mar ongga gegeka tein gontunggom koma bera erek gegeka tein ofoufem. Noba goga gemesma gegan gofons ororu jeni mar ongga gontunggom fob. Koma bera, goga gemet maat jeska mekeni insa koma si. Erek koma tein, memef ongga mefarur morototuma rot Allah oga bera memesma mefmen mofons jeska Allah ororu jeni mar ongga montunggom nou Ofa fob.

9Erek koma jeskaseda iwa ijginaga rot oida memef nomnaga ongga moftuftu rot Allah oga bera erek morototuma ojgomu. Jeska memef mefarur rot Allah noba nou mesinsa bera guru. Noba erek osnok egens efen mekeni ongga rusnok enjgineg rimfarur gij, beda iwa tein bera erek mekeni ongga osnok egens efen, noba ongga rusnok enjgineg rimfarur gij.

10Iwa tein bera erek mod egens ongga Allah ei nou esinsa fob. Noba didif bera erek osnok egens ongga Allah obk rot odou oufamofa jeskaseda duftuftu osok gij efen oga rot iskusk gu iwa tein. Noba gij mona ongga osnok egens esejah mar jeskaseda ei mod ongga efeinah, beda sismeni bera ofa erefa mowuj mosu rot iskusk fog. Erek koma tein, didif din jeskaseda duftuftu mar ongga sismeni osok gij Allah oga rot iskusk gu iwa. Noba erek rusnok egema tein rin noba rufra mod koma efen efeb gij, erek koma tein rusnok egema tein rin noba ruftuftu rot Allah oga deika gu iwa. Erek koma tina, erek osnok egens eisisi keingg esinsa rot teinefa ofa ei mod koma, beda orofosut osnok egens egens tein eisisi keingg esinsa rot teinefa ofa oftuftu rot Allah oga gu rusnok.

11Rusnok ongga rirefa mowuj mosu bera rinei mod egeka gij guru. Erek koma tein, rua ongga ruftuftu rot Allah oga bera ragot rot mar ofoka egens ojgomu. Ofoka egens koma osok gij Yesus Kristus. Ofa bera erek mowuj mosu nou mod ongga Allah efen.

12Rusnok rineya rira mar ongga ah aibin erek emas ni, perak ni, mamu ongga eirirber ni jeskaseda rirei mod. Noba rusnok rineya rira mar ongga enah aibin guru erek mega mohaha esda jeskaseda rirei mod.

13Noba gij mona ongga mah et mod gegeka tein, beda mah koma omorocunc rot mar ongga rira nou rirei mod koma bera erek ah aibin era gurei. Erek koma rot mar ongga rusnok ruftuftu rot Allah oga. Jeska Allah efen eisa omorocunc rot oida tenten ei era gurei. Ofa efen mah bera emereni rot tein fogora omorocunc rot mar ongga orofosut osnok egens egens omftuftu rot efen oga fob si.

14Noba gij mona ongga mah et mod ongga ahais tina eneseiseifa jinaga guru, beda erek koma tein rusnok ongga rumftuftu osok gij Allah oga rot tenten fob bera rimesma rerin rufons rot si.

15Tina erek mod egens ongga mah ereni tina eseiseifa ojgomu, beda erek koma tein rusnok ongga runoftuftu osok gij Allah oga rot tenten rerin rufons emeseiseifa si. Tina rua risinsa rumosuwa jeska Allah efen mah insa koma ojgomu.

16Didif dudou os disisi keingg iwa rot oida iwa bera erek mod egens ongga Allah ei nou esinsa ojgomu. Jeska Efena Ebsi Allah bera engker gij idou efesi.

17Jefeda erek rusnok rineya ruftuftu rot mar ongga tenten guru fogora rusnok enjgineg risiri gij mar ongga oska ojgomu, beda Allah omofra mar okum eteb keingg rua ongga ruftuftu mar insa koma si. Jeska Allah efen mod egens koma ongga ebsi komowa ojgomu. Noba iwa bera ongga erek Ofa efen mod egens koma.

18Iwa inesitit isinsa ifaga rot oida idou ebriyi eteb gij mar fob guru. Jeska koma erek iwa ihurmei mar gu isinsa ojgomu. Jefeda iwa ineita idou ongga ebriyi gij mar ororu jeni mar ongga rusnok mebif rudou ebriyi gij guru. Erek iwa inororu mar morototuma erek rua ruroru guru, beda rua rumosujohu rot oida iwa idou osumsumu ojgomu. Skoidu, iwa irons rot ojgomu. Irons rot mar koma jeskaseda iwa isma idou efesi ongga ebriyi gij mar ongga erek Allah odou ebriyi gij mar ojgomu.

19Jeska rusnok mebif rusujohu rot oida rudou ebriyi eteb gij mar. Tina ahah Allah eiteij bera koma erek rua rucuwei mar ojgomu. Mimif mijginaga erek koma jeska runggu gij Mar Efeyi Ebsi sis fob oida, "Oisouska mar ongga rusnok mebif rutunggom rot rudou ongga ebriyi gij mar bera Allah ocunc rot oida rua rudou osumsumu rot mar ojgomu."

20Noba mar egema tein ongga runggu gij Mar Efeyi Ebsi agot erek kef oida, "Allah ejginaga rot oida mar ongga rusnok mebif runsujohu rot rudou ongga ebriyi gij mar bera onoufij rua oskiyai tein jinaga guru."

21Erek koma jefeda iwa inofra yeyin ebirfaga Mod Ari egens ongga iwa isujohu oida efen ofoka aksa ekirsa jeska egema efen ebirfaga guru. Jeska yeyin ebirfager jera mar nomnaga ongga angh gu iwa bera jeskaseda ofij iwa ojgomu.

22Koma erek, didif Paulus ni, Apolos ni, Kefas ni, mar nomnaga ongga Allah ontunggom gu mebif jera mebaga ni, yeyin iteij ah ni, era erek yanggos ni, mar nomnaga ongga iwa ik ebeibeyaif jera mar ongga imek jah mona kahma tein ni, mar koma nomnaga bera ah jeskaseda ofij iwa ojgomu.

23Noba iwa bera ongga irek Yesus Kristus efen rusnok. Noba Ofa bera ongga en jeska Allah.


  Share Facebook  |  Share Twitter

 <<  1 Korintus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel