Alkitab Mobile SABDA
[VER] : [MEYAH]     [PL]  [PB] 
 <<  1 Petrus 1 >> 

1Surat egens kef bera jeska didif Petrus ongga Yesus Kristus oncunc erek efen rasul egens fob. Noba didif dunogu surat kef gu iwa ongga Allah oncunc erek efen rusnok fob. Iwa bera ongga irebserma fogora ijeker erek rusodosa jah gu monuh Pontus ni, Galatia ni, Kapadokia ni, Asia ni, Bitinia ni.

2Noba mifmin mika Allah bera ongga oncunc iwa jeni Ofa odou ejginaga rot gij mona ongga sismeni eteb fob. Beda oisouska Efena Ebsi ongga engker gij idou efesi fob bera iwa injerek Ofa efen rusnok ongga idou ebsi komowa. Ofa otunggom koma jeskaseda iwa idou ekebin Yesus Kristus oga fogora efen ogufu omosuna rot yeyin mar ongga oska nomnaga jeska idou efesi. Didif dum diteij gu Allah jeskaseda Ofa eita oufamofa eteb gu iwa noba eita eiteij ah ongga eskeiramera gu iwa ojgomuja.

3Didif disitit gu Allah ongga erek mifmin Tuhan Yesus Kristus efen meka. Ofa bera oncunc odou ongga oufamofa eteb gu mimif fogora Ofa eita eiteij ah efeinah gu mimif fob. Ofa otunggom koma oisouska Yesus Kristus ongga endebecki jeska anggos fob. Ofa otunggom erek koma jeskaseda mimif muisum gij Ofa rot oida Ofa emeita eiteij ah ongga efeinah koma gu mimif si.

4Erek koma jefeda mimif tein muisum gij Ofa rot mar ongga oufamofa eteb ongga Ofa ensejah gu mebaga nou mimif fob. Jah suma bera mar ongga oufamofa insa koma eneja erek oska era enetefa guru, tina ah aibin ojgomuja.

5Noba Allah omot joug iwa rot efen owesa efek oisouska idou ongga eredi rot Ofa. Noba Ofa omotunggom mar koma rot ongkasmos nou mimif ongga misma eiteij ah ongga efeinah. Noba Ofa ensejah nou ocunc mar koma gu rusnok nomnaga gij mona ongga enja ejgwaga.

6Gij mona ongga estir kef bera mar ongga okum ofoukou ah keingg iwa ros, jefeda iwa ifera okora ojgomuja. Erek koma, tina idou efaga ouka eteb rot mar ongga didif danggot gu iwa insa koma nomnaga ojgomu.

7Mar ongga okum koma bera enen rourou guru. Tina mar koma en jeskaseda orocunc rot oida yeyin idou bera ororu Yesus Kristus rot tenten fob ei era enesei. Koma erek rusnok ongga ris mah gij emas jeskaseda mah et fogora orocunc rot efen eirirber ojgomu. Erek koma tina, gij mona ongga enja ejgwaga, beda emas koma tein emeseiseifa si. Tina yeyin idou ongga ororu Yesus Kristus bera efen efera osok ekirsa jeska emas insa koma. Noba mar ongga okum koma ongga ereneni iwa bera orocunc rot oida yeyin idou ongga ororu Yesus tein ongga erek eirirber. Beda Ofa emesitit iwa noba omofra ifoka erek aksa gij mona ongga Ofa ongksons en.

8Erek iwa inek Yesus Kristus gu iteij jinaga guru, tina idou okora rot Ofa ros. Noba gij mona ongga deisef tein bera iwa inek Ofa enesi, tina iwa iroru Ofa ros. Noba idou erirei eteb ekirsa jeska mudou ebriyi gij ojgomuja tein. Noba idou tein erirei eteb doska rot mar koma.

9Erek ebeibeyaif iwa inesma mar koma ongga iwa iroru Yesus rot fob enesi, tina mar ongga iwa imesma koma bera erek eiteij ah ongga efeinah noba ah aibin.

10Eiteij ah ongga efeinah insa koma bera ongga nabi-nabi rimfesij rot sis fob. Jeska rua ranggot oida gij mona kahma, beda Allah emeita eiteij ah ongga efeinah gu rusnok oisouska efen odou ongga oufamofa eteb. Sis fob rua riajga joug rot eiteij ah ongga efeinah insa koma ongga en skoita iwa ongga irebserma fob. Jeska sis fob Efena Ebsi Allah ocunc gu rua gij rudou efesi rot teinefa Kristus emeita efera okora eteb fogora emesma ofoka ongga aksa eteb ekirsa jeska rusnok enjgineg nomnaga. Jefeda rua riajga touj rot mar insa koma. Rua rudou os rijginaga rot teinefa noba gij mona juaho fogora mar insa koma emesaga.

11(1:10)

12Noba Allah oncunc gu rua insa koma oida mar insa koma ongga rua rimfesij rot bera enen nou rua risinsa guru. Tina mar koma en nou mimif ongga miker gij mona deisef ojgomu. Ebeibeyaif rusnok rimfesij rot oga ongga oufamofa insa koma osok gij Yesus Kristus gu iwa fob. Rua rutunggom mar erek koma oisouska owesa efek jeska Efena Ebsi ongga Allah ombk jeska mebaga. Noba malaikat-malaikat ongga ringker gij mebaga rudou os eteb jeskaseda rua tein rudou ebriyi gij rot teinefa rusnok risma eiteij ah ongga efeinah erek koma.

13Erek koma jefeda, iwa isejah idou efesi rot ahais noba yuisum gij Allah rot eiteij ah ongga efeinah ongga iwa insma rot fob. Ofa eita mar insa koma rot ongkas gu iwa oisouska efen odou ongga oufamofa eteb rot iwa. Koma bera, gij mona ongga Yesus Kristus ongksons en fob, beda iwa imesma mar koma rot ongkasmos ojgomu tein.

14Iwa yugif gu Allah ongga erek yeyin ika ojgomu. Noba iwa inororu mar ongga oska koma ongga idou os itunggom gij mona ongga idou osumsumu rot Allah oga ros guru.

15Tina iwa ita idou ongga ebsi komowa gij mar nomnaga ongga iwa itunggom. Jeska Allah, ongga ejeka iwa erek efen rusnok fob, bera ebsi komowa.

16Erek koma jeska gij Mar Efeyi Ebsi bera Allah agot oida, "Iwa ita idou ongga ebsi komowa, jeska Didif bera erek ebsi komowa ojgomu tein."

17Allah bera erek yeyin ika. Noba Ofa bera ongga oga ojga rot mar ongga oska jera mar ongga oufamofa nomnaga tein ongga rusnok runtunggom fob. Jefeda iwa yugif gu Ofa gij mona kef ongga iwa ingker gu mebif ros ojgomu.

18Jeska Ofa onskotu iwa jeska mar ongga oska ongga iwa intunggom sis fob. Mar ongga ensis koma bera onofij iwa oskiyai tein guru. Mar koma bera onjuj en jeska yeyin imower ojgomu. Noba Allah enera mar ongga erek emas era perak fogora oroskotu iwa jeska yeyin mar ongga oska guru. Jeska mar koma bera erek orohuhur ojgomu.

19Tina Yesus Kristus ogufu ongga eya nou mimif tumu mega salib bera efen efera osok eteb ekirsa. Noba koma bera ongga oskotu iwa jeska yeyin mar ongga oska fob. Rusnok ongga Yahudi riris domba efer egens ongga efen efeji eirirber ojgomu jeskaseda rurougif gu Allah. Erek koma tein, Yesus Kristus bera erek mifmin domba efer egens ongga efeji eirirber. Jeska Ofa bera ongga oskotu mimif jeska mifmin mar ongga oska fob. Ofa bera erek ebsi komowa ojgomu.

20Gij mona ongga Allah onotunggom mebif enesi, beda Ofa osujohu gij odou efesi rot oida Ofa omobk Yesus Kristus jeskaseda agos nou mimif. Tina Ofa en gij mona ongga doida omoisa insa kef jeskaseda ofij mimif fob.

21Noba oisouska mar ongga Yesus Kristus ontunggom nou iwa, bera iwa iroru Allah fob. Ofa bera ongga omfra Yesus jeska anggos. Noba Ofa omfra Yesus efen ofoka erek aksa ekirsa jeska mar nomnaga tein fob. Erek koma jefeda iwa iroru Allah rot ahais noba yuisum gij Ofa rot mar insa koma nomnaga.

22Ebeibeyaif iwa iroru oga ongga tenten koma osok gij Yesus Kristus fob. Jefeda koma erek iwa yut idou efesi rot yeyin mar ongga oska fob. Noba ebeibeyaif idou omokorema rot tenten ojgomuja. Jefeda iwa ita idou ongga omokorema rot tenten noba ahais ojgomuja.

23Iwa insma eiteij ah ongga efeinah fob. Noba koma en oisouska Allah oga ongga oufamofa noba ongga ereita eiteij ah ongga efeinah gu rusnok. Noba eiteij ah ongga efeinah koma bera enen jeska yeyin iker gonu yuser jinaga guru. Tina eiteij ah insa koma bera en jeska Allah ojgomu. Jeska oga ongga oufamofa insa koma bera ongga eita eiteij ah ongga efeinah noba ah aibin.

24Mimif mijginaga rot koma jeska Allah anggot gij Mar Efeyi Ebsi oida, "Rusnok mebif bera erek mofombra jera marfok. Mofombra er gij mebi oforu rara, noba marfok tein efen ofok ongga ongkoska. Tina gij mona ongga estir deika, beda mofombra jera marfok koma osrosra ojgomu. Erek koma tina Tuhan Allah oga ongga oufamofa bera ah aibin ojgomuja." Noba oga ongga oufamofa osok gij Yesus Kristus insa kef bera ongga rusnok enjgineg rimfesij gu iwa sis fob.

25(1:24)


  Share Facebook  |  Share Twitter

 <<  1 Petrus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel