Dual Panel1Timotius, sismeni bera didif duis gu rusnok ongga Kristen jeskaseda rua rum riteij gu Allah nou rusnok nomnaga. Rua rum riteij gu Allah jeskaseda Ofa eita meidu ongga erek ofoufemfem rot rua fogora ofij rua. Noba rua tein ruis oufamofa eteb rot rusnok insa koma gu Allah ojgomuja
2Rua rum riteij gu Allah rot rerin raja-raja jera rerin ebirfager nomnaga tein. Rua rutunggom mar erek koma jeskaseda adaij nou mimif miker rot ongkoskamoka. Beda mimif tein muroru Allah rot tenten noba mifarur gij mar ongga erek ongkoska ojgomu.
3Mar insa koma bera erek oufa ojgomu noba Allah, ongga oskotu rusnok jeska rerin mar ongga oska, Ofa tein odou eskeira rot.
4Jeska Allah odou os oida rusnok nomnaga tein risma eiteij ah ongga efeinah. Ofa tein odou os rot jeskaseda rusnok nomnaga rijginaga rot mar ongga tenten.
5Jeska mifmin Allah egens ojgomu. Noba Ofa bera rusnok nomnaga rerin Allah tein. Noba osnok egens ongga ot deismos rot rusnok skoita Allah bera erek egensmes ojgomu. Ofa bera Yesus Kristus.
6Ofa erek osnok egens giskini ongga aha esinsa gu rusnok ongga rufogog fogora ranggob Ofa fob. Ofa otunggom mar insa koma jeskaseda osuwa rusnok nomnaga jeska rerin mar ongga oska. Koma jeni erek Allah oncunc rot gu rusnok gij mona ongga Ofa anggot rot sis fob. Jeska gij mona ongga sis fob bera Ofa anggot eimofoj rot mona ongga Yesus Kristus emen jeskaseda eita eiteij ah ongga efeinah gu rusnok.
7Noba Allah oncunc didif erek efen rasul egens ongga duftuftu rot mar insa koma gu rusnok ongga Yahudi guru. Didif duftuftu rua osok gij mar ongga tenten ongga rumororu. Mar ongga didif dinagot insa kef bera tenten ojgomu. Didif dunorokrusa rusnok oskiyai tein guru.
8Didif dudou os jeskaseda runer nomnaga rum riteij gu Allah. Noba gij mona ongga rua rum riteij, beda didif dudou os jeskaseda rua rirek rusnok ongga runotunggom mar ongga oska oskiyai tein guru. Noba rua rinejekjeka rudou efesi osok gij mar ongga rua rum riteij rot insa koma gu Allah guru.
9Didif dagot gu rujager rot oida rua rinesitit risinsa rifaga doska guru. Koma bera, rua rinergi meisoufa ongga ebahetkik fogora eirir, era rinesa merfej ofoukou erek insa koma tein guru. Jeska koma bera erek rua rufra risinsa rufoka erek ekirsa jeska rujager enjgineg ojgomu. Rua tein rinergi meisoufa ongga erek rinerec runer rudou erek koma tein guru. Rua rirgi meisoufa ongga iskusk erek giskini ojgomu. Noba rua tein rusujohu rot mar gij rudou efesi ongga erek iskorej ojgomu.
10Rujager ongga ongkoska bera rirek rua ongga rudou os rut joug rifaga rot ongkoska. Jeska koma bera ongga orocunc rot oida rua ruroru Allah oga rot tenten fob.
11Didif dagot gu rujager rot oida, gij mona ongga ebirfager Mod Ari ruftuftu mar, era rerin rahiner ruftuftu mar, beda rua rugif nou ojgomu noba rinagot mar esesa sons tein guru.
12Didif tein dunodou os rot oida rujager ruftuftu runer gij Mod Ari efesi tein guru. Noba rua rineisera jeska runer rot mar ongga ranggot tein guru. Rua rig mar ongga runer ruftuftu rot ojgomu.
13Didif dagot mar erek koma jeska Allah otunggom Adam rot sismeni fog, beda Ofa otunggom efen mohona Hawa otoij ofa.
14Noba Bilis orokrusa Hawa rot sismeni. Jefeda Hawa bera ongga engkirsa mar ongga Allah anggot joug rot sismeni fog.
15Erek koma tina, erek rujager rut joug rerin riser rot iskusk ojgomu ni, noba ruroru Allah rot tenten ni, jera rita rudou ongga okora rot rusnok enjgineg ni, noba ribes rifaga jeska mar ongga oska ni, rua rita rudou ongga erek ebsi komowa tein ni, beda rua rimesma riteij ah ongga efeinah si.