Alkitab Mobile SABDA
[VER] : [MEYAH]     [PL]  [PB] 
 <<  2 Korintus 11 >> 

1Didif duis gu iwa jeskaseda iwa yuin keingg idou efesi ai juens deika fog fogora didif dimagot mar ongga erek dahaisomu duga oskiyai rot deika.

2Didif dudou ejisei rot iwa erek Allah tein odou ejisei rot iwa. Jeska iwa bera erek ojowu egens ongga didif ducunc nou orna egens fob jeskaseda eja erek efen osroj. Tina orna egens enjgineg odou os orka ojowu insa koma jeska. Iwa bera erek ojowu egens insa koma. Noba osnok egens ongga iwa inja erek osroj nou bera Yesus Kristus.

3Didif danggot mar insa koma erek mar ongga orocunc rot ojgomu, jeska didif dimeesa rot oida rusnok enjgineg rumorokrusa iwa fogora iwa imekikif jeska Yesus beda inororu Ofa rot idou ongga ebsi komowa noba ongga eskeira deika guru. Bilis, ongga erek magosu ofogog, bera orokrusa Hawa sis fob tein.

4Noba didif dudou efeneinei rot iwa jeska gij mona ongga rusnok enjgineg rin skoita iwa noba ruftuftu rot mar ongga ebireira, beda iwa iroru mar koma rot ebeirens ojgomu. Erek rua ruftuftu mar rot Yesus Kristus ongga toga jeska mar ongga memef moftuftu rot ni, erek rua rucunc efena ongga toga jeska Efena Ebsi ongga iwa insma sis fob ni, erek rua rucunc moroju egens ongga toga jeskaseda iwa isuwa jeska yeyin mar ongga oska ni, beda giskini bera iwa iroru mar ongga oska insa koma rot ebeirens ojgomu.

5Tina didif dedin dufoka bera onoin gij rua insa koma ongga rucunc risinsa erek rasul ongga rufoka aksa ekirsa jeska rineya guru.

6Noba didif dinagot mar rot duga ongga erek ongkoska eteb ahah rusnok riteij guru, tina didif dudou ebriyi gij mar ongga danggot efen ofou jeni ojgomu. Noba didif dusujohu rot oida iwa tein ijginaga rot mar koma fob. Jeska memef mocunc mar erek koma gu iwa rot koisoisa gij mar nomnaga ongga memef moftuftu rot Yesus oga gu iwa sis fob.

7Noba gij mona ongga didif duftuftu iwa rot Allah efen oga ongga oufamofa, beda didif duin keingg disinsa dufoka jeskaseda dufra iwa yeyin ifoka erek aksa ojgomu. Noba didif dunois gu iwa rot fifi era mareibra egema tein guru. Tina, teinefa fogora iwa isujohu rot oida didif dutunggom mar ongga oska skoita iwa rot sis fob erek komo.

8Noba askesi didif dingker morototuma jera iwa ros, beda rusnok Mod Ari enjgineg rufij didif rot fifi jera mareibra. Noba didif dinera mar koma nou disinsa erek rusnok Mod Ari insa koma rudou os rot ojgomu guru. Tina didif dira mar insa koma jeskaseda durofij iwa rot ojgomu.

9Noba askesi didif dingker jera iwa ros, beda didif dineradgodu iwa rot mar egema tein guru. Jeska dedin edohujir ongga rin jeska monuh Makedonia bera rufij didif rot mar nomnaga ongga ducosu rot ojgomu fob. Gij mona ongga sis fob didif dineradgodu iwa rot mar egema tein guru. Noba gij mona ongga emen tein bera didif dineradgodu iwa rot mar egema tein guru.

10Didif bera osnok egens ongga duroru Yesus Kristus rot tenten, bera dimesitit gu rusnok gij monuh Akaya rot oida didif dineradgodu iwa era rusnok enjgineg tein rot mar egema tein jinaga guru.

11Tina, jeska didif dagot mar erek insa koma, jefeda iwa isujohu rot oida dudou onokora rot iwa gurei. Tina erek koma guru. Jeska Allah esinsa ejginaga rot teinefa didif dudou okora eteb rot iwa fob.

12Noba didif dimagot rot mar erek insa koma ojgomuja jeskaseda direseda rot mar ongga rasul-rasul ongga ebireira insa koma ranggot rot didif fob. Jeska rua ragot oida rua tein ruftuftu rot Allah oga morototuma erek didif. Tina guru, jeska rua bera ongga ruhca rot fifi ojgomu.

13Rua rita mar erek koma jeska rua bera erek rasul-rasul ongga ebireira ojgomu. Noba rua rucuwei mar gu rusnok rot mar ongga rua rimfarur gij. Noba rua rutunggom mar rot risinsa ongga orocunc rot oida rua bera erek Yesus Kristus efen rasul ongga tenten, tina guru.

14Erek koma tina didif dudou onoubsaha rot mar ongga oska insa koma ongga rua rita rot rudou ongga efesis eteb gij guru. Jeska Bilis esinsa tein bera odou efesis fogora ocunc esinsa erek malaikat egens ongga ebsi komowa gu rusnok.

15Jefeda mimif mudou onoubsaha rot rasul-rasul ongga ebireira insa koma guru. Jeska rua bera erek Bilis efen ruforoker, jefeda rua tein bera rurokrusa rusnok fogora rucunc risinsa erek rusnok ongga rumfij Allah rot rudou ongga ebsi komowa. Jefeda rua rimesma mar okum jeni rerin rita mar ongga oska insa koma si.

16Erek koma jefeda didif duis gu iwa jeskaseda iwa yuin keingg idou efesi rot didif ai juens deika fogora dimagot mar rot dudou ongga okum erek insa koma deika. Jeska didif dudou os dagot mar erek osnok egens ongga odou osumsumu ojgomu fogora disitit disinsa dufoka erek rasul-rasul insa koma rutunggom tein ojgomu. Tina iwa inosujohu rot oida merei ok didif fob guru.

17Noba Allah bera onocunc gu didif jeskaseda disitit rot disinsa erek koma guru. Jeska askesi didif disitit rot disinsa, beda koma orocunc rot oida didif dita mar erek osnok egens ongga odou osumsumu eteb ojgomu.

18Tina rasul-rasul ongga ebireira insa koma bera rita mar erek koma ojgomuja. Jefeda iwa irons rot didif ai juens fog jeskaseda didif tein difesij mar erek rua insa koma.

19Jeska iwa ongga kota Korintus isujohu rot oida yeyin idou ongga ebriyi gij mar ofoukou fob ei. Erek koma tina teinefa fogora iwa irons rot rusnok enjgineg ongga rudou osumsumu eteb jeskaseda ruftuftu mar jah gu iwa ifekesa erek komo.

20Iwa irons rusnok ebireira ongga rudou os rufoka ereij keingg iwa ni, era ongga riragou joug yeyin mar nomnaga ni, era rudou os rurokrusa iwa ni, era rufra risinsa rufoka erek ekirsa jeska iwa ni, era rua rubu iwa ni. Teinefa fogora iwa irons rot mar erek komo.

21Noba, jeska memef meneita mar erek insa koma gu iwa guri, jefeda iwa isujohu rot oida memef bera enerek rasul ongga tenten guri. Jefeda mar insa koma mojen memef rot ojgomu ei! Erek koma tina, erek rua insa koma ruku rufos fogora risitit risinsa rifaga ojgomuja, beda didif tein dumoku dufos ai juens fogora dimesitit rot disinsa difaga tein. Yo, tenten, ebeibeyaif didif difesij mar erek osnok egens ongga odou osumsumu eteb ojgomu.

22Rua risitit rot risinsa oida rua bera rusnok Yahudi. Didif tein bera jeska rusnok ongga Yahudi. Noba rua risitit risinsa rufoka rot oida rua bera jeska ebic Israel ongga Allah oncunc fob. Beda didif tein bera jeska ebic Israel ongga Allah oncunc fob. Rua risitit risinsa rufoka rot oida rua bera ongga runjuj jeska Abraham. Beda didif tein bera dunjuj jeska Abraham.

23Noba rua risitit risinsa rufoka rot oida rua bera erek rusnok ongga rumfij Yesus Kristus rot tenten ojgomu. Beda didif tein bera erek osnok egens ongga dumfij Yesus Kristus rot tenten tein. Tina didif dufij Yesus Kristus erek ahais ekirsa jeska rua ojgomu. Erek koma noba rusnok raha didif gij mod oskusk rot ofosma ofoukou ekirsa jeska rua fob. Noba rusnok rangha didif erek ahais ojgomuja erek ekirsa jeska rusnok ongga rangha rua fob. Noba doida ongga didif danggos gij mar okum ongga ah keingg didif ojgomuja tein. (Tenten, ebeibeyaif didif dagot mar insa koma erek rua insa koma ongga rudou osumsumu eteb ei.

24Skoidu, didif dimagot mar erek koma ai juens deika ojgomu.) Beda rusnok ongga Yahudi rangha didif ahais rot ofosma setka orgomu noba cinja tohkuru. Rua rita mar erek koma gu didif rot ofosma cinja fob.

25Noba rusnok rira moskur rurobu didif ojgomuja. Rua rutunggom mar erek koma rot ofosma juomu. Noba rusnok rira mamu ofoukou riredi didif erek ahais tein. Noba meg meifeni ojuj gu mei rot didif rot ofosma juomu fob. Noba erek ofosma juens bera didif diker gij mei efen nou motu onjoros moworu jeska meg ojuj rot didif gij mei efen.

26Noba gij mona ongga dincira gu monuh ongga angh yes, beda mar ongga ofogog ereneni didif ojgomuja. Mei ofot edi didif ni, rusnok ongga rufogog rudou os ragei dedin mar jeska didif ni, dedin rusnok Yahudi rucunc rudou ongga ofogog skoita didif ni, rusnok ongga Yahudi guru tein rucunc rudou ongga ofogog skoita didif ni. Noba gij mona ongga didif dingker gij kota, beda mar ofogog ereneni didif jah suma tein. Noba gij mona ongga dingker gij monuh ongga owowa beda mar ofogog ereneni didif jah suma tein. Noba gij mona ongga didif difef meg meifeni, beda mar ofogog ereneni didif jah suma tein. Noba rusnok ongga ranggot rourou oida rua bera erek dedin edohujir ongga Kristen, rua tein rireneni didif rot rerin rita mar ongga ofogog.

27Didif dimfarur gij mar erek ahais ojgomuja onjoros dufonskos eteb rot, tina enadaij nou didif diker keingg dufons rot tein guru. Noba gij mona ofoukou bera mosona eteb ongk didif, noba magonen didif eteb tein. Noba gij mona ofoukou tein bera dedin maat enadaij guru. Noba gij mona ofoukou bera meifina engk didif eteb jeska dedin meisoufa enadaij guru. Noba gij mona insa koma bera dedin mod egema nou dingker gij tein guru.

28Noba mar okum egema dokun deika bera, dudou efeneinei eteb rot dedin rusnok Mod Ari.

29Jeska gij mona ongga rua rudou onowesa efek guru, beda didif dudou okora eteb rot rua ojgomuja. Noba gij mona ongga rua risiri gij mar ongga oska, beda dudou efeneinei eteb rot rua ojgomuja.

30Giskini, didif dinesitit disinsa difaga rot mar erek insa koma guru. Noba Yesus Kristus efen meka ongga mimif misitit gu bera ejginaga rot koma tein fob. Tina erek didif disitit disinsa dufoka rot mar egens, beda didif dimesitit osok gij mar ongga orocunc rot oida didif bera dunowesa efek jinaga guru.

31(11:30)

32Jeska gij mona ongga didif dingker gij kota Damsyik ros, beda raja Aretas efen Gubernur obk tentarer jeskaseda ruhca didif fogora ragei didif.

33Tina rusnok bera ritki morungga eteb rot didif jeska mer efesi jah mebah fogora didif duka jeska.


  Share Facebook  |  Share Twitter

 <<  2 Korintus 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel