Dual Panel1Didif Paulus, ongga dingker gij mod oskusk jeska didif duftuftu mar rot Yesus Kristus efen oga, bera ongga dunogu surat egens kef. Noba surat egens kef bera jeska Timotius tein ongga omfij didif jah sif. Didif dugu surat egens kef skoita bua Filemon ongga erek mefmen mohuj egens ongga modou okora rot. Noba bua tein bera ongga bufij Yesus Kristus rot efen oga morototuma jera memef. Didif disa surat egens kef skoita rusnok koma ongga rumohoturuma jeskaseda rum riteij gu Allah gij bebin mod tein. Noba didif disa surat egens kef skoita Apfia ongga erek mefmen meyesa tein jera Arkhipus ongga erek Yesus efen tentara egens tein.
2(1:1)
3Didif dum diteij gu mifmin mika Allah jera Tuhan Yesus Kristus tein jeskaseda Ofa ocunc odou ongga oufamofa skoita iwa, noba jeskaseda Ofa eita idou efesi ongga eskeiramera ojgomuja.
4Gij orofosut mona ongga didif dum diteij gu mika Allah bera didif duis oufamofa eteb gu Ofa rot bua.
5Jeska didif dingg rot fob oida bua buroru Yesus Kristus rot tenten fob, noba budou okora rot rusnok nomnaga ongga ruroru Ofa tein.
6Noba didif dum diteij gu Allah jeskaseda gij mona ongga iwa imfesij rot teinefa iwa iroru Yesus Kristus gu rusnok enjgineg, beda rusnok koma rimek yeyin ita mar ongga erek ongkoskamoka ojgomu. Erek koma jefeda rua rudou emebriyi gij rot teinefa Yesus eita mar ongga oufamofa eteb gu mimif nomnaga ongga muroru Ofa rot tenten fob.
7Noba mar ongga bua buntunggom nou rusnok enjgineg oisouska budou ongga okora rot rua bera ereita didif dudou eskeira eteb noba erirei rot tein. Erek koma jeska bua bumfij Allah efen rusnok enjgineg fogora rua rita rudou ongga ahais dokun deika.
8Erek koma jefeda, ebeibeyaif didif dudou os direjgei mar jeska bua. Noba erek didif duku dufos fogora direjgei rot mar oisouska Yesus Kristus ofoka beda didif dijginaga rot oida bua bimeita mar insa koma si. Noba koma bera enerek oska guru.
9Erek koma tina didif dinerejgei mar rot duga erek insa koma guru. Ongga tenten bera didif dudou os direjgei mar jeska bua oisouska dudou ongga okora rot bua ojgomu. Koma bera, didif, ongga dunokona fob, noba ongga dingker gij mod oskusk rot Yesus efen oga
10bera direjgei bua osok gij dedin edohuj egens ongga enjerek dedin edesa fob. Jeska askesi didif dingker gij mod oskusk kef ros bera didif duroun ofa skoita Yesus fob. Ofa koma bera Onesimus.
11Noba didif dijginaga rot oida sis fob bera ofa onofij bua rot iskusk guru. Tina ebeibeyaif ofa bera erek osnok egens ongga ofij didif jera bua tein rot iskusk fob.
12Noba didif dubk ofa, ongga dudou okora eteb rot, sons skoita bua fob.
13Noba ongga tenten bera, didif dudou os eteb jeskaseda ofa eker jera didif jah sif askesi dingker gij mod oskusk kef ros fogora ofij didif ojgomuja. Beda koma tein erek ofa ofij didif oisouska bua bebin bufoka ojgomu.
14Tina didif dineita mar ongga ekirsa jeska meidu ongga bua budou os rot guru. Jeska didif dineita mar ongga erek eradgodu bua jeskaseda bufij didif rot erek koma guru. Erek bua budou os bufij didif rot, beda koma en jeska bua ojgomu.
15Onesimus ongku jeska bua gij mona ongga estir ojgomu. Noba koma jeskaseda gij mona kahma beda ofa omoksons noba ofij bua ojgomuja.
16Jeska ebeibeyaif ofa onoksons skoita bua erek bebin osnok egens ongga omfij bua ojgomu guru. Tina ongga oufamofa ekirsa bera ofa oksons en skoita bua erek bebin obohuj egens ongga ororu Yesus Kristus rot tenten fob. Koma bera, ofa erek osnok egens ongga ofoufem nou didif, tina ofa erek ofoufem ekirsa nou bua tein. Jeska ofa enerek bebin osnok egens ongga omfij bua ojgomu guru, tina ofa tein bera erek bebin obohuj ongga erek Kristen fob.
17Erek koma jefeda, erek bua busujohu rot oida bua bifarur rot Yesus Kristus morototuma erek egens jera didif ei, beda buroun Onesimus rot budou ongga eskeiramera rot ofa morototuma erek bua buroun didif teina.
18Noba erek ofa eita mar ongga oska gu bua fob, era erek bebin mar okowu ongga ah gu ofa, beda didif dumoh bebin mar okowu insa koma tera ofa si.
19Didif Paulus, bera dugu keingg rot disinsa dedin ditma oida, "Didif dumoh bebin mar okowu insa koma tera ofa si." Erek koma tina budou onofoj joug guru rot oida bua bisma eiteij ah ongga efeinah jeska didif dumftuftu rot Yesus oga ongga oufamofa gu bua sis fob.
20Jefeda, edohuj ongga dudou okora rot, bua bita mar erek Kristen egens ongga ororu Tuhan rot tenten fob fogora buroun Onesimus sons rot budou ongga eriagamaga ojgomu. Koma tein bera emeita dudou erirei eteb rot si.
21Didif disa surat egens kef skoita bua jeska didif dijginaga rot oida bua bimeita mar insa koma erek jeni si. Noba bua bimeita mar ongga oufamofa erek bugun dokun deika rot tein.
22Erek koma noba bua bisejah bebin mer efesi egens jah nou didif. Jeska didif duisum gij Allah rot oida Ofa emeita mar ongga bua bum biteij rot fogora omosuwa didif jeska mod oskusk insa kef. Beda didif dimen skoita iwa jah kota Kolose.
23Epafras tein oisu iwa. Ofa bera erek dedin edohuj egens ongga engker morototuma jera didif gij mod oskusk jeska ofa tein oftuftu rot Yesus efen oga ongga oufamofa.
24Noba Markus ni, Aristarkus ni, Demas ni, Lukas ni, rua nomnaga ongga rifarur morototuma jera didif jah sif bera ruisu iwa tein.
25Didif dum diteij gu Tuhan Yesus Kristus jeskaseda Ofa eita oufamofa eteb gu iwa nomnaga. Ainsoma.