Dual Panel1Nou ongga memef nomnaga mera mei jah mog fob, beda memef mek oida motowohu ongga monsoka gij insa koma bera ofoka Malta.
2Rusnok ongga ringker gij motowohu koma ruroun memef rot rudou eriagamaga. Noba rua rukub mah nou memef jeska erek mos es fob noba meifirna tein edi mimif, jefeda meifirna eteb.
3Beda Paulus ohoturu mega efej noba okub mah eteb. Nou ongga ofa ontunggom mar koma, beda magosu womfieda egens orogna jeska mah koma beda eska Paulus noba erajgej tumu etma.
4Nou ongga rusnok ongga ringker gij motowohu koma ringk mar insa koma, beda rua ragot moguma oida, "Isok egens kef bera erek rua ongga rufogog ojgomu. Jeska erek ofa efena ebah jeska mei fob, tina mar ongga mimif mugif gu noba ongga ofoka ereij keingg mimif jah sif bera rudobu joug oida osnok egens kef efena enebah deika guru."
5Beda Paulus agoska etma rot magosu koma, beda magosu koma esiri jeska etma gij mah. Tina Paulus efaga eskeira ojgomu. Magosu insa koma eneita efera okora gu ofa jinaga guru.
6Rusnok insa koma rusujohu oida ai juens beda Paulus etma ongga magosu enska insa koma ejefifij, era ai juens beda ofa agos ojgomu. Noba erek rua riker dektek joug, tina rinek mar erek runsujohu rot insa koma guri. Jefeda rua rusujohu deika, beda rua ragot oida Paulus erek mar egens ongga rua rumougif gu ongga en skoita rua ojgomu.
7Memef meker doida mekeni eteb egens ongga Publius efen. Ofa erek ebirfaga eteb gij motowohu insa koma. Ofa oroun memef rot odou ongga ongkoska eteb jah efen mod, noba memef meker jera ofa jah suma erek mona juomu.
8Gij mona insa koma tein Publius efen meka maren eteb erek ofos ofoufem doska noba ofa ot kongkonu tein. Jefeda Paulus ejek Publius efen meka insa koma. Beda Paulus aha efen etma esij ofa noba om eiteij nou ofa. Beda ainsa koma tein osnok egens koma eita eskeira fob.
9Jefeda rusnok enjgineg tein ongga marenir gij motowohu insa koma nomnaga rin skoita Paulus, beda ofa eita eskeira gu rua nomnaga tein.
10Beda rua rurka mar eskembemba gu memef jeskaseda ruis oufamofa eteb gu memef. Noba gij mona ongga memef meifef meg meifeni egens nou menja deika, beda rua rurka mar ofoukou gu memef jah meg meifeni koma jeskaseda met gij meg.
11Memef meker gu Malta erek mesta ortomu fob, beda memef meifef meg meifeni egens deika. Meg meifeni koma ongga en jeska kota Aleksandria gij monuh Italia. Rusnok rijeka meg koma efen ofoka "Kastor jera Polaks." Ofoka koma bera morototuma erek mar ongga rua rugif gu efen ofoka tein. Meg egens koma ah gu Malta tein onjoros mona ongga mei mojumu ofog eteb oisa fob.
12Beda meg meifeni egens insa koma ecira rot memef onjoros mensaga gu kota Sirakusa. Beda memef meker jah suma erek mona orgomu.
13Beda memef meja jeska kota insa koma noba maharira mei mojumu efembra onjoros mensaga gu kota Rigium. Erek monog deika beda mof efeni ecira rot ongkoska jah agosu, jefeda gij mona jueka ojgomu beda memef mesaga gu kota Putioli.
14Memef morodosu jera rusnok rineya ongga ruroru Yesus gij kota insa koma tein. Noba rua rirejgei memef jeskaseda meker jera rua erek ari egens fog. Beda memef mecira maki jah kota Roma.
15Mefmen mohujir ongga ruroru Yesus gij kota Roma rig oida ai juens beda memef mesaga jah suma. Jefeda rua rija onjoros pasar Apius jera modwok orgomu ongga ont jah suma jeskaseda rurodosu memef. Nou ongga Paulus orodosu rua jah suma, beda ofa ois oufamofa eteb gu Allah noba ofa eita odou ahais gij.
16Gij mona ongga memef mensaga gu kota Roma fob, beda tentarer rinaha Paulus gij mod oskusk deika guru, tina rua ruitij rot oida ofa eker gij mod giskini egens ojgomu. Noba tentarer rut joug ofa jah suma.
17Erek mona orgomu deika beda Paulus ois gu ebirfager Yahudi ongga ringker gij kota koma jeskaseda rua rin jah mod ongga tentarer runt joug ofa gij. Nou ongga rua rumohoturuma jah suma fob, beda ofa agot gu rua oida, "Edohujia, didif dunotunggom mar oska egema skoita mifmin rusnok Israel guri. Noba didif dinekirsa jeska mar ongga mifmin mimower rirebent rot tein guri. Erek koma tina rusnok Yahudi ragei didif gij kota Yerusalem noba raha didif gu raja Kaisar efen tentarer.
18Noba rua rijeka joug didif rot mar ongga Yahudi ragot osok gij didif, tina rua rinek mar oska egema tein ongga didif duntunggom jeskaseda ruga ojga rot oida didif dijagos ojgomu. Jefeda rua rudou os rusuwa didif.
19Tina rua ongga Yahudi rucunc didif erek osnok egens ongga oska ojgomuja, jefeda didif duis gu ebirfager tentarer oida didif dudou os jeskaseda raja Kaisar esinsa oga ojga rot didif ojgomu. Didif dagot mar insa koma, tina didif dunofra mar okum gu mifmin rusnok Israel sons jinaga guru.
20Erek koma jefeda didif dudou os durodosu jera iwa nomnaga jeskaseda difesij mar jera iwa. Didif duisum gij raja egens ongga eita eiteij ah ongga efeinah gu mimif ongga Israel, jefeda ebeibeyaif didif diker gij mod egens kef noba tentarer rira rantai rirakid didif ditma ojgomu."
21Beda rusnok Yahudi insa koma ragot gu Paulus oida, "Memef menesma surat efeyi egens tein jeska monuh Yudea ongga agot mar osok gij bua enesi. Noba mefmen rusnok ongga ruksons jeska Yudea fob bera rinefesij rot mar ongga osok gij bua tein guru.
22Tina memef modou os meg mar jeska bua osok gij mar insa koma ongga bua buroru deika. Jeska memef nomnaga meg fob oida rusnok rejrej monuh ofoukou ruga oruh rot mar ongga bua buroru insa koma."
23Jefeda rua nomnaga ruitij nou rumohoturuma deika. Noba gij mona insa koma rusnok rufoukou rin skoita mod ongga Paulus engker gij. Beda gij rahah tentena onjoros moworu fob bera Paulus efesij gu rua rot teinefa Allah ofoka ereij keingg rusnok. Noba Paulus era mar jeska buku Musa jera buku nabi-nabi tein fogora orocunc gu rusnok rot tenten oida Yesus bera Kristus egens koma ongga emen.
24Rusnok rineya ruroru mar ongga Paulus emfesij gu rua insa koma, tina rineya runororu guru.
25Jefeda rua ruga emesedema rot mar insa koma. Beda nou ongga Paulus agot mar kef oida, "Tenten! Mar ongga nabi Yesaya anggot oisouska Efena Ebsi Allah gu mifmin mimower sis fob bera ebeibeyaif ah gij efera jeni fob. Jeska nabi Yesaya onggu gij Mar Efeyi Ebsi rot mar ongga Allah anggot gu ofa oida, 'Bua bija skoita dedin rusnok Yahudi noba bagot gu rua erek kef oida, "Iwa ig mar ojgomuja, tina iwa idou enebriyi gij mar koma efen ofou jinaga guru. Iwa ik mar ojgomuja, tina idou enejginaga rot mar koma erek teinefa guru."
26(28:25)
27Jeska rerin rudou efesi erek ombrera fob, noba rua runoj rusu nou mar ongga rua ringg deika guru, noba mar ongga rua rik bera runohobut rot koisoisa deika guru. Tina erek rua ruj rusu nou mar ongga rua ringg, beda rudou emebriyi gij si. Noba erek rua ruhobut mar ongga rua rik rot koisoisa ojgomu, beda rua rimejginaga rot mar koma efen ofou si. Beda rudou omororu mar insa koma rot tenten si. Beda rua rimekikif jeska rerin mar ongga oska, noba Didif dusuna rot rerin mar ongga oska insa koma si. Tina rua rineita mar insa koma jeni guri.' " Nou ongga Paulus agot mar insa koma beda rua ongga Yahudi insa koma rija jeska efen mod.
28Beda Paulus agot gu rua oida, "Edohuji, jeska rua ongga Yahudi rungkoja rot Allah oga ongga eita eiteij ah ongga efeinah gu rusnok fob, jefeda ebeibeyaif Ofa obk rusnok jeskaseda rijefesij rot mar insa koma gu rusnok ongga erek Yahudi guru. Noba rua bera rimagosuit rot noba rumororu tein si!"
29((Nou ongga Paulus anggot mar egens koma fob, beda rua ongga Yahudi rurogna jeska efen mod beda ruga omosokuma rot mar insa koma.))
30Paulus eita fifi gu osnok egens ongga efen mod egens koma, beda ofa eker gij mod egens koma nou tahun egeka. Beda ofa oroun rusnok nomnaga ongga runjogog ofa rot odou oufamofa.
31Noba ofa efesij rot teinefa Allah ofoka ereij keingg rusnok, jera osok gij Tuhan Yesus Kristus gu rusnok insa koma. Ofa otunggom mar koma rot odou ongga enemeesa tein guru. Noba rusnok rineyahehir joug ofa rot jinaga guru. Ainsoma.