Dual Panel1Nou ongga Yesus emfesij rot mar insa koma nomnaga gu efen ruforoker fob, beda Ofa eja jah kota-kota ongga angh gij monuh insa koma jeskaseda oftuftu mar gu rusnok noba efesij mar osok gij Allah oga.
2Gij mona insa koma bera rusnok raha Yohanes Pembaptis gij mod oskusk fob. Nou ongga ofa eg rot mar ongga Yesus ontunggom fob, beda ofa obk efen ruforoker rineya skoita Yesus.
3Rua rijeka rua Yesus oida, "Akeina, Bua bera osnok egens koma ongga Yohanes agot oida Allah omobk skoita memef ongga Yahudi ei? Era memef mogog moroju rot osnok egens ongga enjgineg ei?"
4Beda Yesus oroun gu rua oida, "Iwa yuksons skoita Yohanes noba ifesij gu ofa rot mar ongga iwa ik noba ig jah sif.
5Jeska rusnok ongga riteij ofou sis fob bera rik mar koisoisa fob. Rusnok ongga raki emageima sis fob bera ricira erek giskini fob. Rusnok ongga maira et rufos erek eteb sis fob bera rufos eskeira nomnaga fob. Rusnok ongga osu otuw sis fob bera rig mar fob. Rusnok ongga ranggos sis fob bera rifena ebah deika sons fob. Noba rusnok ongga rufojingki bera rig rot Allah oga ongga oufamofa fob.
6Rusnok ongga rinejekjeka rudou efesi rot Didif guru, tina rua ruroru Didif rot tenten ojgomu bera rudou efaga ouka eteb rot si."
7Nou ongga Yohanes efen ruforoker insa koma rinja fob, beda Yesus efesij mar osok gij Yohanes jera efen ruforoker gu rusnok rufoukou jah suma. Ofa agot gu rua oida, "Sis fob, gij mona ongga Yohanes engker gij monuh ongga mebi oska ros, beda iwa ineja jah suma jeskaseda ik osnok egens ongga erek mosodum ongga mof okuj ojgomu guru.
8Noba iwa inek osnok egens ongga ergi meisoufa ongga ongkoska eteb jah suma tein guru. Rusnok ongga rirgi meisoufa erek koma bera riker gij raja efen mod ojgomu.
9Tina iwa ik osok egens erek meidu jah suma? Iwa ik osnok egens ongga erek nabi ojgomu. Erek koma tina ofa efen ofoka bera ekirsa jeska nabi enjgineg.
10Jeska sis eteb fob bera runggu gij Mar Efeyi osok gij mar ongga Allah anggot gu Kristus osok gij Yohanes. Ofa agot oida, 'Didif dumobk dedin osnok egens eja okag Bua jeskaseda esejah rusnok rudou efesi nou mona ongga Bua bimen.'
11Ongga tenten bera Yohanes efen ofoka ongga aksa ekirsa jeska rusnok nomnaga ongga ringker gu mebif fob. Erek koma tina rusnok ongga riker gu mebaga ongga runok ofoka gij jinaga guru, rua bera rerin rufoka ongga aksa ekirsa jeska Yohanes efen.
12Noba gij mona ongga Yohanes oftuftu mar gu rusnok onjoros deisef tein bera rusnok ongga rufogog rudou os riradgodu nou mona ongga Allah omofoka ereij keingg rusnok jeskaseda en ebeirens. Jeska rua rudou os rita owesa efek gij mona insa koma ojgomu.
13Noba gij mona ongga sismeni onjoros mona ongga Yohanes en fob, bera nabi-nabi rimfesij mar osok gij mona ongga Allah omofoka ereij keingg rusnok. Noba Musa anggot gij efen hukum-hukum osok gij mona insa koma tein.
14Didif dagot gu iwa rot oida Yohanes bera ofa koma ongga nabi-nabi ranggot rot oida emen rot owesa efek morototuma erek nabi Elia efen sis fob. Jefeda idou ororu mar koma ojgomu.
15Iwa ig mar ongga orocunc kef rot iskusk jeskaseda idou emebriyi gij ojgomu. Rusnok ongga riker gij mona ebeibeyaif bera erek kef: Rua bera erek ruforoker ongga rahaisomu gu moroju. Rineya ruis gu rerin ruhujir oida,
16(11:15)
17'Memef mof medemer nou iwa jeskaseda iwa yuka, tina iwa idou efaga onouka rot guri. Beda memef mof medemer jeskaseda idou oubsaha noba ebisa rot, tina iwa inebisa rot guri!' Mar egema tein ongga rua rutunggom bera ereita ruforoker koma rudou eskeira rot guru.
18Koma erek rusnok ongga riker gij mona ebeibeyaif tein. Jeska gij mona ongga Yohanes en, beda ofa enej anggur efei guru, noba ofa enet maat gij mona juens tein guru. Tina rusnok rudou eneskeira rot ofa guru. Rua ragot oida efena ofogog egens bera oira gij ofa odou efesi fob ojgomu.
19Beda ebeibeyaif Didif, Rusnok Efesa, din fob. Noba Didif dij anggur efei noba dita maat gij orofosut mona tein, tina rusnok rudou eneskeira rot Didif tein guri. Rua ragot oida Didif dit maat ofoukou noba dibirfaga erebibei rot anggur efei ojgomu. Noba rua ragot oida Didif dita mar ongga oska jeska dedin edohujir bera erek rusnok ongga ruhoturu pajak jera rusnok enjgineg tein ongga rua rusujohu bera erek oska. Tina gij mona ongga rusnok rik rusnok rineya rerin rita mar ongga oufamofa ojgomu, beda koma omorocunc rot tenten oida Allah efen odou ongga ebriyi gij mar erek eteb ekirsa fob."
20Yesus oftuftu mar noba otunggom mar ongga onswos eteb nou rusnok gij kota-kota insa koma fob. Tina rua rinemeesa rot rerin mar ongga oska guri. Jefeda Ofa agot rot mar okum ongga emen skoita rua gij kota-kota insa koma si.
21Ofa agot gu rua oida, "Mar okum eteb emah keingg iwa iwa ongga ingker gij kota Korazim jera kota Betsaida si. Iwa idou ah keingg rot rusnok ongga ringker gij kota Tirus jera Sidon sis eteb fob. Rua bera erek rusnok ongga rufogog doska. Tina erek rusnok gij kota egeka koma rik mar onswos sis fob erek iwa ik Didif duntunggom gij mona ebeibeyaif tein, beda rua rimeesa joug rot rerin mar ongga oska si. Noba rua rimergi meisoufa ongga oska noba raha mongkoru esij ribirfaga efeji jeskaseda rurocunc rot rudou ongga okumkum rot rerin mar ongga oska si.
22Tina iwa ongga kota Korazim jera Betsaida bera ineita mar erek koma jinaga guri. Jefeda gij mona ongga Allah ofra mar okum eteb keingg rusnok ongga rita mar ongga oska fob, beda Ofa omofra mar ongga okum eteb keingg iwa erek ekirsa jeska mar okum ongga emah keingg rua ongga kota Tirus jera Sidon si.
23Noba iwa ongga kota Kapernaum, iwa yufra isinsa ifoka erek akseij gu mebaga. Tina Allah omoin keingg iwa degini jah mahmei meren ojgomu. Idou ah keingg rot kota Sodom ongga onghoda fob. Kota koma enah deika guru. Tina erek rusnok gij kota Sodom koma ringk rot mar onswos sis fob ongga erek iwa ik Didif duntunggom gij mona ebeibeyaif fob, beda rua rimeesa joug rot rerin mar ongga oska si. Noba rerin kota onohoda tein guru.
24Kef bera ongga tenten oida, gij mona ongga Allah ofra mar okum eteb keingg rusnok ongga rita mar ongga oska fob, beda Ofa omofra mar ongga okum eteb keingg iwa erek ekirsa jeska mar okum ongga emah keingg rua ongga kota Sidon insa koma si."
25Nou ongga Yesus anggot mar insa koma fob, beda Ofa agot oida, "Akeina ongga ofoka ereij keingg mebaga jera mebif tein, Didif disitit bebin bufoka ongga aksa, jeska Bua buncunc mar ongga oufamofa eteb skoita rusnok ongga runofokor aksa guru fob. Noba Bua bindemdemi mar ongga oufamofa insa koma jeska rusnok ongga rufokor aksa noba ongga rudou ebriyi eteb gij mar ofoukou tein fob.
26Noba koma bera ororu jeni budou ejginaga rot ojgomu. Jefeda ebeibeyaif bera budou eskeira rot tein fob."
27Beda Yesus agot gu rusnok rufoukou insa koma deika oida, "Dedin Akeina eita owesa efek nomnaga gu Didif fob. Noba Akeina Allah ojgomu bera ongga ejginaga erek jeni rot Didif ongga efen efesa. Noba Didif jera rusnok ongga Didif duroun skoita Allah bera rijginaga erek jeni rot Ofa tein.
28Iwa nomnaga ongga ifonskos rot mar okum ongga ah gu iwa, iwa in skoita Didif ojgomu. Beda Didif dimeita owesa efek gu iwa fogora iwa imeker keingg ifonskos rot si.
29Iwa yuh idou rot ongkas gu Didif ojgomu, beda Didif dumoftuftu mar gu iwa si. Jeska Didif dudou erek eriaga noba eskeira rot iwa. Beda iwa imeker keingg ifonskos rot yeyin mar okum ojgomuja.
30Jeska mar ongga Didif duftuftu gu iwa bera ongkoska ojgomu. Beda iwa imeita owesa efek fogora inofonskos rot mar ongga okum deika guru."