Dual Panel1Nou ongga koma oisa fob, beda didif dik mar erek malaikat egens onjuj jeska mebaga. Ofa efen owesa efek eteb doska, noba ofa efen eisa esenin doska gu mebif.
2Beda ofa ois rot efen oga ongga owesa efek eteb oida, "Babel ongga ofoka eiskiskma eteb bera ensiri rot efen rusnok nomnaga fob! Ebeibeyaif efena ofogog jera mar ofogog enjgineg tein ongga bera riker jah kota insa koma ojgomu. Mar ongga oska efekeifa jera mem nomnaga ongga erek oska noba ongga rusnok rinet guru bera angh jah suma tein ojgomu.
3Jeska rusnok mebif rufoukou bera rinsiri morototuma jera rusnok ongga ringker gij kota koma fob. Noba rua tein rugif gu efen mar ongga oska efekeifa ojgomuja, erek rusnok ongga rudou erebibei rot mofut efei ojgomuja. Raja-raja mebif tein rinsiri morototuma jera rua fob. Noba rusnok gij kota Babel insa koma rudou eftirir keingg mareibra ofoukou ojgomuja. Jefeda rua ringk mareibra ofoukou gij kota koma. Rusnok ongga ruhu mareibra gij kota koma skoita rua ongga kota Babel bera rija erek runa mei ahta rot fifi ofoukou ongga rua rinsma jeska rusnok gij kota Babel insa koma."
4Erek koma beda didif dig oga egema deika en jeska mebaga agot oida, "Iwa ongga irek dedin rusnok bera irogna jeska kota Babel koma ojgomu jeskaseda iwa inoromohohuma jera rusnok koma rerin mar ongga oska efekeifa guru. Beda iwa inesma mar okum ongga emah keingg rua fogora rua guru.
5Erek koma jeska rerin rita mar ongga oska erek eteb edi mebaga doska. Noba Allah odou ah keingg rot rerin mar ofogog ongga rua runtunggom ojgomuja fob.
6Iwa isesa mar okum skoita rua sons rot mar ofogog ongga rua runtunggom gu iwa sis fob. Iwa isesa mar okum eteb ongga erek ekirsa deika skoita rua ojgomu. Jeska erek osnok egens ongga eradgodu rusnok jeskaseda rij mar ekembemba ongga embera gij mok osku egens ojgomuja, beda erek koma tein, sis fob rua riradgodu iwa rot mar okum ojgomuja. Jefeda iwa iradgodu rua tein rot mar ongga okum ekirsa ojgomuja.
7Iwa yufra mar okum eteb keingg rua ongga orotunggom rua fogora rufogu okora eteb ojgomu. Jeska sis fob rua bera risitit risinsa rifaga rot rerin mareibra ongga ofoukou doska ojgomu. Noba rua rusujohu rot oida rinesma rufogu okora rot mar egema tein jinaga guru. Jeska askesi rua risitit risinsa rifaga rot beda rua agot oida, 'Memef bera enerek eja mesina egens ongga odou okumkum noba ebisa ojgomuja guru. Tina memef bera erek raja egens ongga ofoka ereij keingg mar nomnaga ojgomu.'
8Jefeda gij mona juens beda mar okum eteb emesiri keingg rua rot si. Mar koma emereita rufogu okora eteb gu rua ojgomu. Beda rua rimek mar erek mosona ongk rua eteb fogora rusnok rufoukou rimagos rot. Jefeda rusnok rufoukou rimebisa eteb rot tein ojgomuja. Jeska Allah, ongga efen owesa efek eteb ekirsa, bera ongga ofra mar okum keingg rua ojgomu. Jefeda Ofa omohoda rot rua nomnaga erek mah ongga eret mar fogora eribseb nomnaga ojgomuja."
9"Beda gij mona insa koma raja-raja ongga rinsiri gu rusnok gij kota Babel insa koma noba ongga rudou eftirir keingg mareibra morototuma jera rua bera rimek mah efeb ongga onsok jeska kota koma ongga mah et fob. Jefeda rua rimeita rudou ongga okumkum eteb noba rua rimebisa eteb rot rusnok gij kota koma ojgomuja.
10Raja-raja insa koma rimeesa eteb rot mar okum insa koma ongga ensiri keingg rusnok insa koma jera rerin kota. Jefeda rua rumot yes jeska kota insa koma noba rimagerir oida, 'Ayo, sis fob kota Babel ongga erek ofoka aksa etebo, tina gij mona ongga ai estir ojgomu bera kota koma ensiri rot mar okum eteb ongga angh keingg kota koma fobo.'
11Beda gij mona insa koma tein rusnok ongga ruhu mareibra skoita rua ongga kota Babel bera rimeita rudou ongga okumkum noba ribisa rot tein. Jeska ebeibeyaif rusnok rinengk rerin mareibra egema deika guru.
12Jeska sis fob bera rua ongga kota Babel rudou eftirir keingg mareibra ofoukou doska erek emas ni, perak ni, mamu ongga eirirbi noba efera osok eteb ni, mar ongga erek siriow efej ongga efera osok eteb ni, meifeti ongga efera osok eteb doska ni. Meifeti insa koma bera efen efeb erek mei mokowu ni, jera mahwo ekeni efeb ni, jera mei yuhnos efeb ni. Noba rua tein rudou eftirir keingg mar egema ongga erek mega mensek ofos efen ensesa ni, mar ofoukou ongga rusnok ragosus jeska oubukum ni, mega efebr ongga efera osok eteb ni, kermom ongga efen efera osok ni, mamu eirirbi ongga rutunggom erek edeider gij mersa ni,
13mar oforu ofoukou egens egens ongga erek eyejkita ni, mar ofoukou ongga efen ensesa ni, anggur efei ofoukou ni, mini goreng ongga runtunggom jeska zaitun efek ni, gandum ofou ongga esgisgi fob ni, gandum giskini, sapi ofoukou ni, domba ofoukou ni, kuda ofoukou ni, jera korobaga ongga kuda encira rot ni, jera rusnok rufoukou ongga ranggos askesi rumfij rua ojgomuja ni.
14Beda Allah efen rusnok insa koma rimagot rot rua ongga kota Babel efen oida, 'Mareibra ofoukou ongga iwa idou eftirir keingg bera eseiseifa jeska iwa fob. Yeyin mar insa koma ongga erek eirirbi noba efen efera osok eteb nomnaga bera eseiseifa jeska iwa, noba iwa inesma mar erek insa koma deika jinaga guru.'
15Noba rusnok ongga ruhu mareibra insa koma skoita rua ongga kota Babel bera risma fifi ofoukou doska rot. Tina rua bera rujot yes jeska kota insa koma, noba rua rudou emeesa eteb rot mar okum insa koma ongga angh keingg kota koma.
16Rua ribisa eteb rot fogora ragerir oida, 'Ayo, ayo, rot iwa ongga kota Babel ongga efen ofoka eiskiskma eteb. Sis fob iwa bera ongga irgi meifeti ongga erek ongkoska noba eirirbi eteb. Iwa bera ongga rira mar ongga eirirbi erek emas jera mamu ongga efera osok jera siriow efej tein ruroumna tumu yeyin meifeti.
17Tina gij mona ongga ai estir insa kef bera iwa jera yeyin mareibra insa koma nomnaga eja erek eseiseifa fob.' Erek koma tein gij mona ongga kapten kabar mei nomnaga, jera rusnok nomnaga ongga rifef kabar mei tein, jera rusnok nomnaga ongga rimfarur gij kabar mei tein, rua ongga ruhca mos gij mei tein, rua nomnaga rimek mah efeb ongga onsok jeska kota Babel insa koma.
18Beda rua rumot yes jeska noba ragot oida, 'Sis fob, kota Babel kef bera erek ekirsa jeska kota-kota nomnaga.'
19Beda rua rumokruj mebi ofou noba rirebirma jah ribirfaga jeskaseda rurocunc rot oida rudou okumkum eteb rot. Beda rua ribisa eteb rot fogora ragerir oida, 'Ayo, ayo, rot iwa ongga ingker gij kota Babel ongga efen ofoka eiskiskma etebo. Sis fob bera rusnok rufoukou rurka mareibra gij rerin kabar mei jeskaseda ruhu mareibra ofoukou skoita iwa. Jefeda rua risma fifi ofoukou rot jeska iwa fob. Noba gij mona ongga ai estir kef bera kota insa koma ensiri nomnaga fob.
20Tina iwa ongga ingker gu mebaga bera idou efaga ouka eteb rot ojgomu. Noba iwa ongga irek Allah efen rusnok, jera Allah efen rasul, jera Allah efen nabi-nabi nomnaga bera idou efaga ouka eteb rot ojgomu. Jeska Allah bera omfra mar okum eteb keingg rua ongga ringker gij kota Babel insa koma ojgomu. Koma erek Allah bera esesa mar okum sons skoita rua rot mar ofogog ongga rua runtunggom skoita iwa sis fob.' "
21Erek koma beda didif dik malaikat ongga efen owesa efek eteb ofra mamu egens ongga erek eteb doska fogora eij gij mei mojumu efei. Beda ofa agot oida, "Mamu eteb kef ongga didif durobuma bera orocunc rot kota Babel ongga omohoda nomnaga fogora eseiseifa. Beda rusnok enjgineg rinek kota koma deika guru.
22Rusnok rinera mar erek moubseja jera mar erek sulin jera manghi mei jeskaseda ruf medemer rot skoita rusnok enjgineg gij kota koma deika guru. Beda iwa inek rusnok egema tein ongga rimfarur rot rerin mar gij kota koma deika guru. Noba rusnok rinek mamu eteb ongga esgisgi keingg gandum efej deika guru.
23Rusnok rinek lampu eisa gij kota koma deika guru. Noba rua rineg rusnok ruga ofoukou ongga rumoskotuma jah suma deika guru. Sis fob rua ongga ruhu mareibra gij kota insa koma bera ekirsa jeska rua ongga ruhu mareibra gij kota-kota enjgineg. Noba rua ongga erek mendersi bera runtunggom mar ofoukou jeskaseda rurokrusa rusnok jeska monuh enjgineg ofoukou.
24Mar okum insa koma ah keingg kota Babel jeska sis fob rusnok gij kota Babel ranggob nabi-nabi jera Allah efen rusnok ongga ruroru efen oga, jera rusnok enjgineg tein fogora rerin rugufu bera eya jah suma ojgomu."