Alkitab Mobile SABDA
[VER] : [MONGONDOW]     [PL]  [PB] 
 <<  1 Korintus 7 >> 

1Tana'a in insilangankudon ko'i monimu onu inta pinais monimu kon surat inta kinirim monimu ko'inakoí. Aka tobatuí ḷoḷaki bo diaí nobuḷoi, sabanarnya mopia intua.

2Ta'e baí diaí mo'igonuí in oaíid inta diaí patus aidan, daí manikah mobuḷoi andeka mokipobuḷoi.

3Buḷoi ḷoḷaki mustibií mogaid kon onu inta ain sinantuí aidannya. Natua doman im buḷoi bobay; tumpaḷabií mogaid kon onu inta ain sinantuí aidannya.

4Buḷoi bobay diaíbií mota'au im mongawasa kon awaknya tontanií; sin awaknya tatua ing kom bonubií ing kawasa i buḷoinya ḷoḷaki. Natua doman ki buḷoinya ḷoḷaki diaíbií doman mota'au mongawasa kon awaknya tontanií; sing ki buḷoinyabií im mongawasa kon awaknya tatua.

5Doyowa motonibuḷoi diaíbií mota'au im mosiyayuían. Mota'aubií asaḷbo muna moyosingog bo diaí mota'au mo'onggot. Aka natua yo doyowa motonibuḷoi tumpaḷa mota'au mosisambayangan. Tongaí naonda intua mo'ikow mustibií bui motobatuí saḷaku doyowa motonibuḷoi. Sin aka diaí natua yo ko'onggotannya kogonuíanbií in roho inta diaí mopia, sin diaí mokotahang kon ibog in awak.

6Onu im pinogumanku ko'i monimu na'a de'emanbií parentah, ta'e tongginabií.

7Sabanarnya im mopiabií ing ginaku aka komintan intau bo mobalií naí aku'oi. Ta'e komintan intau aim bidon inogoian i Allah in totabi inta noyo-noyoposimai. Tobatuí noko'ulií kon totabi nana'a, tobatuí doman noko'ulií kon totabi natua.

8Manangka intua nana'a in tongginaku kon intau inta diaípa nobuḷoi bo kom bobay mita inta dongkadon boba-bobay: Manikah im mo'ikow bo umurandon mobiag bata-batangan naí aku'oi.

9Ta'e aka mo'ikow bo diaí mokotahang kon ibog mobuḷoi, yo manikah pobuḷoi. Sim manikah bo mobuḷoi daripada monahang kon ibogmu inta mo'iliu tua.

10Ko'i monia inta ain nobuḷoi, na'a im parentahku: (Sabanarnya in de'emanbií aku'oi in nobogoi im parentah tana'a, ta'e ki Tuhanbií.) Tobatuí bobay inta ain pinobuḷoi dona'aibií monaḷaímai ko'i buḷoinya ḷoḷaki.

11Tongaí aka sinaḷaíannyadon ing kibuḷoinya ḷoḷaki, daí bobay tatua in dona'ai bidon mokipobuḷoi bui, andeka manií bui mamangoi ko'i buḷoinya. Natua doman in ḷoḷaki. Diaíbií doman mota'au in ḷoḷaki mongga'at ko'i buḷoinya.

12Bo tana'a in tongginaku kon intau mita ibanea makow, na'a in tongginakubií tontanií, de'emanbií i Tuhan, aka intau Keresten bo kobuḷoi kom bobay inta diaí mopirisaya ko'i Kristus, bo ki buḷoinya bobay tatua mo'ibog mobiag moyotakinnya, yo diaíbií mota'aunya ga'aton ing ki buḷoinya bobay tatua.

13Bo aka oyuíon doman im bobay Keresten kobuḷoi kon intau inta diaí mopirisaya ko'i Kristus, bo ki buḷoinya ḷoḷaki tua mo'ibog mobiag moyotakinnya, yo diaíbií mota'au ga'atonnya ing ki buḷoinya tatua.

14Tantuí ḷoḷaki tatua mota'aubií mobalií umat i Allah sin aindon notonibuḷoi takin intau inta ain nobalií umat i Allah. Natua doman im buḷoi bobay, tantuí mota'au bidon doman mobalií umat i Allah sin ain notonibuḷoi i intau inta ain nobalií umat i Allah. Sin aka diaí natua, yo tantuí ki adií mita monia naí onda bo ki adií mita in intau inta diaí nonota'au ko'i Allah, ta'e aka duduian monimu in tongginaku na'a, yo ki adií mita monimu tua im mobalií bidon umat i Allah.

15Tongaí aka intau inta diaí mopirisaya ko'i Yesus monaḷaímaidon ko'i buḷoinya bobay andeka ko'i buḷoinya ḷoḷaki inta ain nopirisaya ko'i Yesus, yo dona'aibií makow bo dikabií ampagan sin diaíbií nongonu. Sin ibogon i Allah mobiagbií motobatuí im mo'ikow komintan.

16Sim mo'ikow utat saḷaku buḷoi bobay -- inta ain nopirisaya ko'i Kristus ki Tuhan naton -- naondabií ing kotota'au monimu, kon diaí mokosaḷamat in ikow ko'i buḷoimu ḷoḷaki? Natua doman ikow buḷoi ḷoḷaki inta nopirisayadon ko'i Yesus, naíondabií ing kotota'au monimu kon ikow in diaí mokosaḷamat ko'i buḷoimu bobay?

17Na'a in atorang inta pinobayakku kom bayongan jama'at: Pomuḷoi intau musti mobiag tumompia podudui kon inta kino ibog i Allah, naí inta ain sinantuí-Nya wakutu in nogoinií ko'i monimu kom baí mopirisayadon ko'i-Nia.

18Umpamanya, tobatuí intau bo sinunatdon kowakutu inoinií i Allah, daí dikabií ramijion inggamaían paḷot mita in sunat tatua. Natua doman, aka oyuíon in diaípa sinunat kowakutu inoinií i Allah, daí dika bidon po'igumon kombaí sunatonpa.

19Sin sinunat andeka diaí, diaíbií moponting intua. Dumuduibií kon atorang mita i Allah im moponting.

20Tuamai, kobiagdon mo'ikow naí kowakutu inoinií i Allah.

21Aka wakutu inoinií bo mo'ikow nogaid saḷaku ata, yo diaíbií nongonu intua. Tongaí aka komintanmai bo moko'uliídon kong kasampatan mobebas, yo popobaragunadon ing kasampatan tatua.

22Sin ata inta mopirisaya ko'i Tuhan, nobalií bidon intau i Tuhan inta nobebas. Bo intau nobebas inta nopirisayadon ko'i Tuhan, nobalií bidon mogogaid kon o'oaidan i Tuhan Yesus Kristus.

23Mo'ikow aim bidon sinaḷui i Tuhan bo nodait-Nya bidon inubolian. Tuamai, dikabií mo'ibog mobalií ki ata in onukadon kon dunia na'a.

24Ta'e naíonda ing ka'ada'anmu kowakutu inoinií i Allah, tantuíbií kobiag natua takin i Allah.

25Sabanarnya aku'oi diaíbií notarima kom parentah i Tuhan kon soaáḷ intau mita inta diaípa nokipobuḷoi. Ta'e saḷaku intau inta mopirisaya inta ain inogoin-Nya in totabi inta mota'au pirisaya'anmai, daí mononggina in aku'oi.

26Mo'indoimai kong ka'ada'an masai na'a, manikah ki ine in diaípa pinobuḷoi yo tantuípa natua.

27Ta'e aka ikow bo no'iḷa'utdon nobuḷoi, daí dikabií ramijionmu bo ga'aton ing ki buḷoimu tatua. Ta'e aka diaípa ikow no'iḷa'ut nobuḷoi daí manikah bo dikadon motayak kom buḷoi.

28Ta'e aka ikow bo tantuíbií mo'ibog mobuḷoi, yo diaíbií doman nongonu. Natua doman im mongodeaga, diaíbií doman baradosa'an aka mokipobuḷoi. Tongaí intau inta nobuḷoi tua moko'uma kon roriga inta ibogonku im mo'iyayukbií mita ko'i monimu intua komintan.

29Nana'a im makusudku ule utat mita: Nopoḷokdon iwakutu naton. Tuamai nongkon masa in tana'a, intau inta kobuḷoi, kobiagdon naonda bo intau inta diaípa kobuḷoi;

30intau inta nongombaḷ, musti in sia tumon intau inta naí diaí in yagi-yaginya. Intau inta noḷunganga ing gina; musti in sia tumon intau inta naí diaí noḷunganga ing gina. Bo intau inta ain notaḷui, musti in sia tumon intau inta diaí ko onu bo onu;

31bo intau inta umuran nobalií ki ata in onu inta kon dunia na'a, yo dona'aidon in sia mo'ibog tonggata'an in dunia na'a. Sin dunia na'a motoyong bidon moyoyang takin ka'ada'anya masa in tana'a.

32Ibogonku mo'ikow komintan mo'iyayukdon kom bayongan roriga. Tuamai, intau inta diaí kobuḷoi musti mokopotantuí kon raiannya bo mogaid kon onu inta kino ibog i Tuhan, bo moposanang ing ginanya.

33Ta'e intau inta kobuḷoidon, moaíntoíbií totok in raiannya soaáḷ in dunia na'a, sim mo'ibog i mosia moposanang ing gina i buḷoinya;

34tuamai diaí motantuí in raiannya. Bobay inta diaí kobuḷoi, andeka inta mongdeagapa, moaíntoí in raiannya kon soaáḷ ki Tuhan. Sin ibogonnya ing kobiagannya tua ing komintandon posarahkan ko'i Tuhan. Ta'e bobay inta kobuḷoidon, umuranbií in sia morai kon soaáḷ mita in dunia na'a, sim mo'ibog in sia moposanang ing gina i buḷoinya.

35Na'a komintan pinaisku sing kopia'anbií monimu tontanií, de'emanbií molarang kom bayongan ibog monimu. Ta'e ibogonku im baí umuran mogaid kon inta mopia bo inta mokosanang kom bayongan intau bo umuran motantuí in raian ko'i Tuhan.

36Tongaí aka tobatuí intau bo nogaid kon inta diaípa patus aidan ko'i kantangnya sin diaídon mokotahang kon ibognya, ta'e oyuíonbií in niat monia motonibuḷoi, yo aidaibií, sin diaíbií baradosa'an aka motonibuḷoibií im mo'ikow.

37Ta'e aka intau tatua bo mogamaídon kong kaputusan kom bunu ing ginanya, kon diaíbií tonibuḷoionnya ing ki kantangnya tua sin mokotahangbií in sia diaí mobuḷoi, daí oaíidnya tatua im mopiabií.

38Simpodon makow kon singog:intau inta mobuḷoi mopiabií doman, bo intau inta diaí mobuḷoi lebe doman mopia.

39Bobay inta ain nokipobuḷoi notobatuídon i buḷoinya ḷoḷaki komangoi in nobiagpa ing ki buḷoinya tua. Ta'e aka matoidon ing ki buḷoinya tatua, daí bobay tatua im mobebasbií mokipobuḷoi bui kon intau inta kino ibognya; asaḷ tonibuḷoi tatua tonibuḷoi Keresten.

40Tongaí lebedon mopia aka diaídon bui mokipobuḷoi in sia. Tua im podudui in raianku, ta'e iraiku kon onu im pinogumanku na'a komintanbií kom bonu ing kawasa in Roho i Allah.


  Share Facebook  |  Share Twitter

 <<  1 Korintus 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel