Dual Panel1Ki Yesus noguman bui, "Aku'oi pangkoi in anggur inta mopia, bo ki Amaí-Ku i monononggobaínya.
2Pomuḷoi in tanga ko'i-Nakoí inta diaí momomungai, pongkoíon-Nya, bo pomuḷoi in tanga inta momungai, ga'atannya in daunnya bo daritan-Nya simbaí modugangdon modatog im bungainya.
3Mo'ikow nion nodarit bidon, sin totunduí inta inogoi-Ku ko'inimu.
4Umuranbií potobatuí-Ku bo Aku'oi umuranbií doman motobatuí takin monimu. Tanga in diaíbií momungai tontanií aka diaí in sia mo'idapoḷpa makow kom pangkoinya. Natua doman i mo'ikow, momungai aka umuran motobatuí takin-Ku.
5Akubií im pangkoi Anggur, bo mo'ikow in tanganya mita. Intau inta umuran motobatuí takin-Ku bo Aku'oi i motobatuínya, momungaibií in sia modatog, sin aka diaí in Aku'oi yo mo'ikow in diaíbií mokopo'gaid kon onu bo onu.
6Ki ine in diaí umuran motobatuí takin-Ku, ḷumbuíon naonda bo tanga, bo mo'ingkagdon. Tanga mita inta mo'ingkagdon natua daiton sipunon bo pogarab kom bonu in tuḷu bo tubaían.
7Aka mo'ikow bo umuran motobatuí takin-Ku bo totunduí-Ku umuran taguíon makow monimu kong gina, po'igumdon ko'i Amaí kon onukabií ing ko'ibog monimu; daí onu im pino'igummu tua ogoi-Nyabií.
8Aka mo'ikow momungai modatog, yo ki Amaí-Ku pomulia'an; bo mo'ikow in totu-totu'udon mobalií murií-Ku mita.
9Naí ki Amaí ain notabi ko'i-Nakoí, natua doman Aku'oi ain notabi ko'i monimu. Daí umurandon kobiag i mo'ikow saḷaku intau inta kinotabi-Ku.
10Aka mo'ikow umuran mogaid kon inta pinarentah-Ku, yo mo'ikow umuran mosatia dumudui kon tabi-Ku, naí doman Aku'oi inta umuran mosatia kon tabi i Amaí-Ku sin umuran nopobayak im parentah-Nya mita.
11Na'a mita pinoguman-Ku ko'i monimu, simbaí sanang ing gina-Ku oyuíon domandon ko'i monimu, bo sanang ing gina-Ku mosempurnadon.
12Na'a parentah-Ku: Posi-tabianbií im mo'ikow, naí doman Aku'oi notabi ko'i monimu.
13Intau inta totok motabi kon yobayatnya mita in intaubií inta nobogoi ing kobiagannya sing kopontingan monia.
14Mo'ikow nion in yobayat-Ku mita, aka pomia'an monimu onu inta pinarentah-Ku ko'inimu.
15Mo'ikow diaí bidon oiniíon-Ku ata, sin aka ata yo diaíbií kota'auannya onu in yogot aidan i tuangnya. Mo'ikow inoinií-Ku Yobayat, sim bayongan inta ain dinongog-Ku ko'i Amaí pinota'au-Kudon ko'i monimu.
16De'emanbií mo'ikow in nomilií ko'i-Nakoí. Aku'oibií in nomilií ko'i monimu, bo nopotabaí ko'i monimu mayak simbaí modiamai kom bungai mobayong bungai mita inta diaí moyoya-yoyang. Daí ogoibií i Amaí in onukabií inigum monimu inta pinodoyon kon tangoi-Ku.
17Na'adon im parentah-Ku ko'inimu: Mo'ikow musti umuran mositabian tobatuí bo tobatuí."
18"Aka dunia na'a mosaturu ko'i monimu, yo toropdon kon Aku'oi im muna bidon kinodoií in dunia.
19Aka kuma bo mo'ikow nion kapunya'an in dunia, daí kotabibií in dunia mo'ikow saḷaku kapunya'annya. Ta'e mo'ikow aim pinilií-Ku nongkon dunia na'a, daí mo'ikow in de'eman bidon kapunya'an in dunia, tuamai dunia na'a mosaturu ko'i monimu.
20Toropdon onu inta aim pinoguman-Ku ko'i monimu, 'Ata diaíbií moḷobe-ḷoben nongkon i tuangnya.' Daí aka mosia nomogutuídon ko'i-Nakoí, yo mosia i momogutuíbií doman ko'i monimu. Aka mosia dumuduidon kon totunduí-Ku, yo mosia in dumuduibií doman kon onu inta tunduíonmu.
21Bayongan tua daitonbií monia popoaíid ko'i monimu, sim mo'ikow in dumodudui-Ku, bo diaíbií kinota'auan monia in Sia inta nopotabaí ko'i-Nakoí.
22Aka kuma bo Aku'oi diaí namangoi bo diaí doman nopota'au intua komintan ko'i monia, daí diaíbií i mosia baradosa'an. Ta'e aka tana'a, diaí bidon im baliíon monia dodoyonan moguman kon diaí dosa'an im mosia.
23Intau inta mosaturu ko'i-Nakoí, mosaturu doman ko'i Amaí-Ku.
24Aka kuma kon yuaí-yuaík monia Aku'oi diaípa nogaid kon soaáḷ mita inta diaípa dodai onda inaidan intau, yo mosia diaíbií binaradosa. Ta'e tana'a mosia ain noko'ontong kon onu inta aim pinomia-Ku, bo mosia mosaturu ko'i-Nakoí andeka ko'i Amaí-Ku.
25Tongaí musti bidon natua, simbaí mobaliídon onu inta pinais kom bonu in Hukum Agama monia nana'a, 'Dia ing kinodoyonan pinosaturuan monia ko'i-Nakoí.'
26Potabaí-Kubií mangoi ko'i monimu in tobatuí mototuḷung inta nongkon i Amaí, tuata in Roho inta moponyata kong kabanaran soaáḷ ki Allah. Aka Sia mamangoidon, yo Sia mobogoibií ing kosaksian soaáḷ Aku'oi.
27Bo mo'ikow i mustibií doman mobogoi ing kosaksian soaáḷ Aku'oi, sim mo'ikow ain noyotakin-Ku nongkon pinomangkoianpamai."