Dual Panel1Kon singgai in diminggu modiugpa mobayag, ki Maria Magdalena minayak ing kubur. Inindoiannyamai yo batu inta pinonaḷob nolitoidon nongkon bubuí ing kubur tatua.
2Daí noribatuk in sia bo minayak notayak ko'i Simon Petrus bo kom murií inta kinotabi totok i Yesus, bo noguman, "Ki Tuhan ginamaídon in intau nongkon kubur. Diaí kinota'auanku mongo sinaguí monia kon onda."
3Ki Petrus bo murií-Nya ibanea tatua minayak ing kubur.
4Taya dua tumpaḷa noribatuk, ta'e murií tobatuí tatua im molika-likat nongkon i Petrus, bo sia im muna nodapot kong kuburan.
5Sia iḷumongow kong kubur tatua bo inontongnya im pusi inta pinobakut no'iukat makow kon tua, ta'e diaíbií in sia sinumu'ot.
6Bo no'i angoidon ing ki Petrus. Ki Petrus baya-bayak sinumu'ot kom bonu ing kubur tatua. Sia noko'ontong doman kom pusi inta pinobakut kom mayat no'iukat makow kon tua,
7ta'e pusi inta pinobakut kon uḷu i Yesus diaíbií no'idiug kon tua, tua in ilitodbií tontanií.
8Onda intua murií inta no'iyaput muna tua sinumu'otdon doman. Tua inontongnya bo nopirisaya doman in sia.
9(Dapot kon dodai intua diaípa kino mangalean monia onu inta pinais kom bonu im Buk Mosuci kon Sia im mustibií mobiag nongkon kinopatoian-Nya.)
10Nopaḷut makow kon tua murií mita i Yesus tatua nobui.
11Ta'e ki Maria Magdalena simindogpa makow kon tayowon kubur tatua bo mongombaḷmai. Koyogot in sia nongombaḷ, iḷumonggoí kom bonu ing kubur,
12bo inontongnya im malaekat doyowa nogiḷambung nobudoí. Mosia ilimituí kon tampat inta pinogulidan kom mayat i Yesus. Tobatuí kon dotaí in uḷuan, bo tobatuí kon dotaí in si'oḷan.
13Malaekat mita tatua noliboí, "Inaí, nongonu sim mongombaḷ?" Ki Maria noguman, "Ki Tuhanku ginamaídon intau, bo diaí doman kinota'auanku mongo pinobayak monia in onda."
14Naonda in nosingog makow natua, sia nobobui naí tumi bo inontongnya ing ki Yesus sinimindog kon tua. Ta'e diaíbií kinota'auannya kong ki Yesus intua.
15Ki Yesus noliboí ko'inia, "Inaí, nongonu sim mongombaḷ? Ki ine in tayakon i Inaí?" Sinangka i Maria kon Sia tua moḷoḷukadbií kon taman tatua, daí sia noguman, "Amaí, aka ki Amaí in nomamping ko'i-Nia nongkon na'a, yo tuḷungaipa poguman ko'inakoí mongo kon onda im pinotaguían i Amaí ko'i-Nia, simbaí mota'auku bayaían gamaían in Sia."
16Ki Yesus noguman ko'inia, "Maria!" Ki Maria inimindoi ko'i Yesus bo noguman kom bonu im bahas Ibrani, "Rabuni!" (Mangalenya "Guru".)
17"Dikapa kadaian in Aku'oi," guman i Yesus ko'inia, "Sin Aku'oi diaípa namonik ko'i Amaí. Ta'e bayakdon ko'i utat-Ku mita, bo pota'audon ko'i monia kon tana'a Aku'oi mayak ko'i Amaí-Ku bo ko'i Amaí doman monimu, ko'i Allah-Ku bo ko'i Allah-mu."
18Daí binayak domandon i Maria pinota'au kom murií mita i Yesus, kon inontongnyadon ing ki Tuhan bo ki Tuhanbií doman in noguman kon tua komintan ko'inia.
19Kon singgai doman in diminggu tatua, naonda in nodoḷomdon, murií mita i Yesus noyosipun kom baḷoi tobatuí bo kinunsiían monia komintan in ḷolingkop, sim mo'ondok kon intau mita Yahudi. Ta'e ki Yesus baḷuíbií no'isindog magií kon yuaí-yuaík monia bo noguman, "Salam dodamean bo kobiagan motompia kotaki-takin monimu."
20Nosingog makow kon natua, pino'ontong-Nya in lima bo sian-Nya ko'i monia. Nopia totok ing gina monia naonda in noko'ontong ko'i Tuhan.
21Bo ki Yesus noguman ko'i monia bui, "Salam dodamea bo kobiagan motompia ko'i monimu. Naí ki Amaí nopotabaí ko'i-Nakoí, yo natua doman Aku'oi mopotabaí ko'i monimu."
22Nosingog makow natua, Sia nopo'irupdon in tompot-Nya ko'i monia bo noguman, "Tarimadon in Roho i Allah.
23Aka mo'ikow mongampung kon dosa in tobatuí intau, yo ampungan doman i Allah in sia. Aka diaí ampungan monimu dosa in tobatuí intau, daí diaíbií doman ampungan i Allah in sia."
24Ki Tomas (inta dinonoi ki "Apang"), tobatuí murií inta kon sigad im murií-Nya mopuḷuh bodoyowaí tua diaí koyota-yotakin monia dodai ing ki Yesus namangoi.
25Daí murií mita i Yesus ibanea noguman ko'i Tomas, "Kami ain noko'ontong ko'i Tuhan!" Ta'e ki Tomas notubag: "Aka diaípa ontongonku tontanií paḷot im pakuí kon lima-Nya bo kon sian-Nya tua, yo beresibií diaí mopirisaya in Akuoi."
26Naonda in todiminggu no'iduduimai kon tua, murií mita i Yesus noyosipun bui kon tua, ki Tomas oyuíon domandon kon tua noyotakin monia. Komintan kinunsiían monia in ḷolingkop, ta'e ki Yesus namangoi bo sinimindog kon yuaí-yuaík monia bo noguman, "Salam dodamean bo kobiagan motompia kotaki-takin monimu."
27No'iduduimai kon tua, ki Yesus noguman ko'i Tomas, "Indoiaidon in lima-Ku, bo popoturakdon kon na'a in tononuyukmu. Tonggoí magií in limamu bo popotudakdon kon sian-Ku. Dikadon molia-liaw ing gina, ta'e popirisayadon!"
28Ki Tomas noguman ko'i Yesus, "Tuhanku bo Allahku!"
29Daí ki Yesus noguman ko'inia, "Ikow nopirisaya lantaran inontongmudon toh? Kosanangdon totok im mosia inta umpakah diaí noko'ontong ta'e nopirisaya ko'i-Nakoí!"
30Nobayongpabií in soaáḷ mita inta mokoherang im pinomia i Yesus kon tayowon im murií-Nya mita, ta'e diaídon pinais kom bonu im buk tana'a.
31Ta'e onu inta pinais kom buk tana'a, makusudnya kom baí mo'ikow mopirisaya kong ki Yesusbií tua in Raja Mopoposaḷamat, bo ki Adií i Allah, bo lantaran pirisayamu tatua daí moko'ulií i mo'ikow kong kobiagan.