Dual Panel1Dinongogdon intau mita im Parisi kong ki Yesus ain noko'ulií bo nobaptis kon intau mobayo-bayongdon kon dumodudui i Yohanes.
2(Sabanarnya ki Yesus diaíbií nobaptis ta'e tongaíbií murií-Nya mita.)
3Naonda ing kinota'auan i Yesus kon soaáḷ mita tatua kino-dongogandon i intau mita im Parisi, daí nongkon Yudea Sia nobuidon minayak ing Galilea.
4Daḷan monia tua musti mo'italib kon Samaria.
5Daí nodapotdon tai Yesus kon tobatuí kotaí kon Samaria, Sikhar in tangoinya. lipuí tatua diaí noyayuk nongkon butaí inta inogoi i Yakub kolipod ko'i Yusup, ki adiínya.
6Kon tua oyuíon parigií i Yakub. Noḷopiídon totok ing ki Yesus sim bobayaían tatua, tuamai Sia ilimituípa kom bingkiímai im parigií tatua. Dodai intua no'utudon in singgai, degaí jam duablasdon.
7Bo murií-Nya mita minayakdon ing kotaí sin notaḷui kong ka'anon. Diaí no'onggot kon tua oyuíon tobatuí bobay in Samaria namangoi sim monangkob. Ki Yesus noguman ko'inia, "Inaí, mota'au degaí Aku'oi mo'igum kon tubig inumon-Ku?"
8(4:7)
9Bobay tatua notubag, "Ki Tuang intau in Yahudi, bo aku'oi na'a inta in Samaria, nongonu sing ki Tuang mo'igumbií ko'inakoí kon tubig inumon?"(Sin intau mita in Yahudi diaí noyoyobayatan intau mita in Samaria.)
10Ki Yesus notubag, "Aka kuma bo kinota'auanmu in totabi i Allah bo kinota'auanmu ki ine in no'igum kon inumon ko'inimu, yo nopasti bidon kon ikow tontanií im mo'igumbií kon tubig inumon ko'i-Nia tua. Bo ogoian-Nyabií ikow in tubig kobiagan tatua."
11Daí bobay tatua noguman doman, "Diaí in totayuk i Tuang bo nodaḷom totok im parigií tana'a. Kon ondabií ing ko'uliían i Tuang kon tubig inta mokobiag tua?
12Ki Yakub mogoguyang nami, ain nobogoi im parigií tana'a ko'inami. Bo sia tontanií ain nogamaí kon tubig inumonnya nongkon na'a; naí doman tua ing ki adiínya mita bo bobiagonnya mita. Degaí ki Tuang im moḷobe-ḷoben nongkon i Yakub?"
13Daí kai Yesus doman, "Intau inta monginum kon tubig tana'a im buipabií moyogang,
14ta'e intau inta monginum kon tubig ogoi-Ku, diaí bidon moyoga-yogang, sin tubig inta ogoi-Ku ko'inia mobalií bidon bokakak kom bonu in awaknya, bo umuran ḷumuai bo mobogoi ing kobiagan mononoi."
15Guman bobay tatua, "Tuang, ogoiaidon aku'oi in tubig tatua, simbaí diaídon moyoga-yogang in aku'oi, bo diaíka bidon mopobui-buimai kon na'a sin monangkob."
16Guman i Yesus ko'inia, "Bayakdon bo oinií ing ki buḷoimu mamangoi in na'a."
17Bobay tatua notubag, "Diaíbií ing ki buḷoiku." Guman doman i Yesus bui, "Totu'u in tubagmu nion."
18"Sin ikow kolimadon pinobuḷoi, bo ḷoḷaki inta nobiag noyogaḷummu tana'a makow in de'emanbií ki buḷoimu."
19Bobay tatua noguman, "Kinota'auankudon tana'a kong ki Tuang in tobatuíbií nabi."
20"Mogoguyang nami nosumbah ko'i Allah kom buḷud tana'a, ta'e intau mita tolipuían i Tuang moguman kon tongaíbií kon Yerusalem tampat pososumbaían in intau ko'i Allah."
21Ki Yesus noguman ko'inia: "Popirisayadon, komintanmai intau mosumbah ko'i Amaí, de'eman bidon kom buḷud tana'a bo de'emanbií doman kon Yerusalem.
22Mo'ikow intau in Samaria mosumbah ko'i inta diaí kinota'auan monimu, ta'e aka kami intau in Yahudi nosumbah ko'i-Nia inta nokanal nami, sing kasaḷamatan namangoi nongkon intau in Yahudi.
23Ta'e mo'iangoibií in wakutunya, sedang bo no'iangoi bidon, kon takin ing kawasa Roho i Allah intau mita mosumbah ko'i Amaí inta mobanar naí inta kino ibog i Amaí.
24Sing ki Allah in Rohobií bo tongaíbií takin Roho i Allah sahingga intau mita mota'au mosumbah ko'i Amaí podudui ing ka'ada'an-Nya."
25Bobay tatua noguman ko'i Yesus, "Kinota'auankubií kon Raja Mopoposaḷamat (inta sinangoi ki Kristus) im mamangoibií. Aka Sia mamangoi, pota'au-Nyabií im bayongan yagi-yagi ko'i naton."
26"Aku'oibií na'a inta i makusudmu nion", guman i Yesus, "Aku'oi inta moyosingogmumai tana'a."
27Bo dodai intua murií mita i Yesus no'iangoidon bui. Mosia noherang totok noko'ontong ko'i Yesus nongonguman takin tobatuí bobay. Ta'e diaí in tobatuímai mosia nokobalií noliboí kom bobay tatua, "Onu im paraḷu i inaí?" Andeka noliboí ko'i Yesus. Mongo onu ino'uman i Amaí takin bobay tatua?"
28Bo bobay tatua nonaḷaímaidon kon tampayangnya kon tua bo minayak ing kotaí bo noguman kon intau mita kon tua,
29kai-nia "Koligai, mayak ing kita mo'indoi kon intau inta nopota'au ko'inakoí kom bayongan inta aim pinomiaku. Degaí bo Siabií tua in Raja Mopoposaḷamat?"
30Daí mosia nobuatdon nongkon kotaí bo minayak nokipodungkuḷ ko'i Yesus.
31Dodai intua murií-Nya mita nonongganutdon ko'i Yesus nonga'an. "Pak Guru," kai monia, "Monga'andon."
32Ta'e ki Yesus notubag, "Ko'i-Nakoí oyuíon ing ka'anon inta diaí kinota'auan monimu."
33Daí murií-Nya mita nosiliboíandon, nana'a "Degaí oyuíondon intau nogatod mangoi kong ka'anon ko'i-Nia?"
34Ki Yesus noguman, "Ka'anon-Ku na'a in dumuduibií kon onu inta kino ibog i-Nia inta nopotabaí ko'i-Nakoí, bo moginḷapat kon oaíidan inta pinokiaíid-Nya ko'i-Nakoí.
35Kai monimu in opatpa nobuḷan bo mokoyut. 'Ta'e Aku'oi moguman ko'inimu: Indoiaikah magií-makow ing gobaí inta ain nodarag bo noḷutuídon, mota'audon koyuton!'
36Bo tana'apabií doman makow bo intau inta mokokoyut tua motarima kom boli im pinogaidannya bo nosipundon kom bungai ing kobiagan mopia bo inta mononoi. Daí intau inta nomuḷa bo inta nokoyut tumpaḷabií moḷunganga ing gina.
37Totu'ubií in tolibag nana'a, 'Tobatuí im momuḷa, ibanea i mokoyut.'
38Aku'oi mopotabaí ko'i monimu mayak mokoyut kong gobaí inta de'eman mo'ikow in nomuḷa; intau ibanea ain nogaid kon tua, bo mo'ikow im motarima kong ka'utungan nongkon oaíidan monia tua."
39Nobayong intau in Samaria inta nogutun kong kotaí tatua nopirisaya ko'i Yesus lantaran nokodongog kon o'uman im bobay tatua. Sim bobay tatua noguman, "Sia noguman ko'inakoí kom bayongan inta aim pinomiaku."
40Daí naonda intau mita in Samaria mita tatua noyodungkuḷ i Yesus, mosia nopo'igum totok simbaí, mogutunpa in Sia takin monia. Daí ki Yesus nogutunpa kon tua takin monia doyow nosinggai.
41Bo nodugangdon nobayong intau mopirisaya ko'i Yesus sin nokodongogdon tontanií kon totunduí-Nya.
42Mosia noguman kom bobay tatua, "Mopirisayadon kami in tana'a, de'eman bidon tongaí lantaran onu inta ino'umanmu ko'inami, ta'e lantaran kami nokodongogdon tontanií kon tosingogon-Nya. Bo kinota'auandon nami kon Sia tua in totu'ubií Mopoposaḷamat in dunia."
43Naonda in doyowadon nosinggai nogutun kon Sikhar, minayakdon ing ki Yesus kong Galilea.
44Ki Yesus tontanií nogumandon nana'a, "Tobatuí nabi diaíbií hormaton kon lipuínya tontanií."
45Ta'e naonda in Sia no'iyaputmai ing Galilea, intau mita nonontomu ko'i-Nia takin sanang ing Gina, sin wakutu in Singgai Moḷoben Paskah kon Yerusalem, inontongdon monia im bayongan inta pinomia i Yesus.
46No'iduduimai kon tua ki Yesus buidon minayak ing Kana inta kong Galilea, kotaí inta pernah pinogaidan kon inta mokoherang, "Tubig nobalií anggur." Kong kotaí tatua oyuíon tobatuí pogawai kon istana, dodai intua ki adiínya notakit kong Kapernaum.
47Naonda in dinongognya kong ki Yesus nongkon Yudea namangoidon ing Galilea, daí sia minayakdon ko'i Yesus nopoigum simbaí mamangoipa ing Kapernaum bo mongundam ko'i adiínya inta dongkadon oḷaton.
48Ki Yesus noguman kom pogawai istana tatua, "Aka mo'ikow diaí moko'ontong kon soaáḷ mita inta mokoherang, yo tantuí diaíbií i mo'ikow mopirisaya."
49Ta'e pogawai istana tatua noguman, "Tuang, ḷagidon angoi baí diaípa matoi ing ki adiíku."
50Ki Yesus noguman ko'inia, "Bayakdon, mopia bidon ing ki adiímu." Intau tatua nopirisaya kon singog i Yesus bo minayak.
51Kon daḷanpa, bobantungnya mita nonontomudon ko'inia bo noguman, "Ki adií i Tuang Nopiadon."
52Daí iliboínyadon ko'i monia mongo jam tongonu nopia ing ki adiínya. Tubag monia, "Koḷabung, degaí jam satu singgai bo no'inggamaí im patuínya."
53Bon kinotoropandon im pogawai istana tatua kon jam natuata ki Yesus noguman ko'inia: "Mopia bidon ki adiímu." Daí sia takin tombonu im baḷoinya komintandon nopirisaya ko'i Yesus.
54Tua in tanda mokoherang induanya inta pinomia i Yesus kong Galilea naonda in Sia nongkon Yudea.