Dual Panel1Wakutu ing ki Yesus minayak, Sia noko'ontong kon intau bilog inta nongkon no'ilahirpamai.
2Murií-Nya mita noliboí ko'i Yesus, "Pak Guru, Nongonu sin intau tana'a pinolahirbií bilog? Lantaran dosa i ine intua? Dosanya tontanií andeka dosa i inaí bo i amaínya?"
3Ki Yesus notubag, "Sia nobilog de'emanbií lantaran dosanya andeka dosa ing guyanganya, ta'e baí poponyatadon ko'inia ing kawasa i Allah.
4Solama in nobayagpa, kita musti mogaid kon oaíidan i-Nia inta nopotabaí ko'i-Nakoí. Mo'iangoibií in doḷom, bo diaíbií in tobatuímai intau mota'au mogaid.
5Solama in Aku'oi kon duniapa na'a, Aku'oibií na'a bayag in dunia."
6Naonda in nosingog makow natua ki Yesus nonduyak kom butaí. Bo duyak-Nya tatua pinoyokitog-Nya im butaí.
7Onda intua pinoyapu-Nya kom mata intau bilog tatua, poḷat noguman, "Bayakdon pongiamot kon tabang Siloam." (Siloam mangalenya 'Pinotaba'.) Daí intau tatua minayakdon doman nongiamot. Dodai in sia nobuidon mangoi, sia noko'ontongdon.
8Ta'e topodiug-nya mita bo intau mita inta pernah noko'ontong ko'inia limituímai bo mo-igum kon intau inta mo'o-italibmai, komintan noguman, "Aka diaí mo'itaḷaí siabií tana'a inta biasamai tumom-polituíanmai bo mo'igum kon intau mo'o-italib!"
9Oyuíon in notubag, "Totu'u, sia na'a." Ta'e oyuíon doman in noguman, "De'eman, sia nion tongaíbií notombatangan in intau tatua." Ta'e intaudon tatua tontanií in nongaku, "Aku'oibií na'a inta i makusud monimu."
10Daí iliboídon monia, "Naondabií sin ikow in noko'ontong bidon?"
11Sia notubag, "Intau inta ki Yesus in tangoi-Nya nogamaí kom butaí topilik bo nopoyokitog in duyak-Nya bodongka pinolepo-Nya kom mataku poḷat noguman ko'inakoí. Bayakdon kon tabang Siloam bo pongiamot. Bo minayak domandon in aku'oi. Naonda in nongiamot aku'oi, noko'ontongdon.'"
12Daí iliboí monia, "Kon onda intau tatua?" Sia notubag, "Diaíbií kinota'auanku."
13Dodai intua singgai in Sabat wakutu ing ki Yesus nopoyokitog im butaí takin duyak-Nya sin pinongundam kon intau bilog tatua. Daí intau inta bagupa noko'ontong tatua dinia kon intau mita im Parisi.
14(9:13)
15Mosia noliboí doman ko'inia mongo naondabií sin sia in noko'ontong bidon.Sia notubag, "Sia nopolepo in yonak kom mataku, bo nongiamotdon in aku'oi bo poḷatdon noko'ontong."
16Ta'e tongonumai intau kon sigad intau mita im Parisi tatua noguman, "Diaíbií domanta intau inta nomia kon soaáḷ tatua nongkon i Allah, sin diaídon pinaraduli-Nyamai singgai in Sabat." Ta'e intau ibanea nosingog, "Diaíbií doman ta intau binaradosa momia kon soaáḷ mita inta mokoherang naí tana'a?" Bo nomukaídon im bobayowan kon sigad monia tua.
17Daí intau mita im Parisi noliboí bui kon intau tatua, "Aka podudui in raianmu, yo naonda in soaáḷ Sia inta nongundam kom matamu nion?" Sia tua in nabibií! Tubag in intau tatua.
18Ta'e itoi mita intau Yahudi tatua doií mopirisaya kon intau inta ko'ina nobilogpa bo tana'a ain noko'ontong. Tuamai mosia nogoiniídon kon guyanganya,
19bo noliboí, "Totu'u degaí kong ki adiímu in na'a inta kai monimu no'ilahir bilog? Yo Naondabií sin Sia in noko'ontong bidon in tana'a?"
20Ki inaí bo ki amaí intau tatua notubag, "Totu'u ki adií nami in sia; bo totu'u kon sia bilog no'ilahirpabiímai.
21Ta'e soaáḷ sia noko indoidon nion, diaíbií kinota'auan nami. liboídon ko'inia tontanií, sin noguyang bidon in sia; mota'au bidon motubag tontanií."
22Guyanganya noguman natua sim mo'ondok mosia kon itoi mita in Yahudi; sim mosia ain noyopakat kon intau inta mongaku kong ki Yesus tua in Raja Mopoposaḷamat, diaídon mota'au tumu'ot kom baḷoi pososambayangan.
23Tuamai ki inaí bo ki amaí in intau bilog tatua noguman, "Noguyangdon in sia, liboídon ko'inia tontanií."
24Bo mosia buidon nogoinií kon intau inta ko'ina nobilog tatua, bo noguman ko'inia, "Pongibotdon kon ikow im mogumanbií kon totu'u. Kinota'auan nami kon intau tatua intaubií binaradosa."
25Daí kai intau tatua doman, "Dinosa andeka diaí in Sia, tua in diaíbií kinota'auanku. Ta'e totontaga ing kinota'auanku, kolipod aku'oi bilog ta'e masai na'a noko'ontong bidon in aku'oi."
26Bo mosia bui noliboí ko'inia, "Onu im pinomia-Nya ko'inimu? Naonda im pinogogaid-Nya sin noko'ontong bidon in ikow?"
27Intau tatua notubag, "Aindon ino'umanku ko'inimu, ta'e mo'ikow doií mopirisaya. Nongonu sim buipabií i mo'ikow moliboí? Degaí mo'ibog doman i mo'ikow mobalií dumodudui-Nya?"
28Daí siniba'an monia in sia bo poḷat noguman, "Ikowbií in dumodudui-Nya; kami in de'emanbií! Kami in dumoduduibií i Musa.
29Kinota'auanbií nami kong ki Allah ain nobogoi im pirman-Nya ko'i Musa. Ta'e aka Intau tatua, diaíbií kinota'auan nami in asaḷ-usuḷ-Nya."
30Intau tatua notubag, "Moko herangbií totok aka diaí kinota'auan monimu mongo nongkon onda in Sia, padahaḷ bo binalií-Nyadon noko'ontong in Aku'oi.
31Kinota'auanbií naton kong ki Allah in diaíbií mokidongog kon intau mita inta binaradosa, ta'e tongaíbií mosia inta mohormat ko'i Allah bo inta mogaid kon onu ing kino ibog-Nya.
32Nongkon pinomangkoianmai in dunia na'a diaípa dodai onda kino dongogan oyuíon intau nopobalií kon intau bilog inta nongkon no'ilahirpamai nobalií noko'ontong.
33Aka intau tatua de'eman nongkon i Allah, tantuí diaíbií in Sia mokoaíid kon onu bo onu."
34Daí tubag monia ko'inia, "Onu? Ikow inta nopuling in dosa nongkon no'ilahirpamai, ikow mo'ibog motunduí ko'inami?" Daí mulaidon singgai tuata sia diaídon inogoi monia sinumu'ot kom baḷoi pososambayangan.
35Kino dongogandon i Yesus kon intau tatua diaídon inogoi monia sinumuot kom baḷoi pososambayangan. Daí sinayak-Nya intau tatua bo noguman ko'inia, "Degaí ikow mopirisaya ko'i Adií Intau?"
36Intau tatua notubag: "Ki ine in Sia tua, Tuang? Tuḷungaipa poguman ko'inakoí simbaí mopirisaya in aku'oi ko'i-Nia."
37"Ikow noko'ontongdon ko'i-Nia," tubag i Yesus. "Sia tuata inta moyosingogmumai na'a."
38'Daí intau tatua sinumungkud kon tayowon i Yesus bo poḷat noguman, "Aku'oi mopirisaya, Tuhan."
39Ki Yesus noguman, "Aku'oi mamangoi in dunia na'a si mohakim; simbaí intau inta bilog mobalií moko'ontong, bo intau inta moko'ontong, mobalií bilog."
40Tongonumai intau im Parisi inta kon tua nokodongog ko'i Yesus nosingog natua, bo mosia noliboí ko'i-Nia, "Makusud-Mu ing kami na'a im bilog doman?"
41Ki Yesus notubag, "Aka kuma bo mo'ikow bilog, yo diaíbií im mo'ikow binaradosa. Ta'e lantaranbií mo'ikow noguman, kami moko'ontongbií, daí tua mangalenya mo'ikow binaradosapa."