Dual Panel1Pahari handiai! Keton kabuat katawan panumah ikei manalih keton dia hayang.
2Keton katawan helo bara ikei dumah manalih keton hong Tesalonika, ikei jari ingapehe tuntang ihina hong Pilippi. Tapi aloh are oloh malawan ikei, Hatallan itah jari manenga kamenteng akan ikei mangat mangabar akan keton Barita Bahalap je asale bara Ie.
3Auh ajar ikei akan keton jete dia sala; tuntang dia kea awi maksud je dia barasih atawa handak manipu.
4Dia! Ikei dia hakotak mangat manyanang atei oloh, malengkan uka manyanang atei Hatalla, je mariksa atei ikei. Basa Hatalla maanggap ikei patut mangabar Barita Bahalap te.
5Keton kabuat katawan ikei dia puji mahapan auh manis atawa mananjaro keton mangat manyahokan kare maksud je babungo. Hatalla jadi saksie!
6Ikei dia kea manyatiar uka manggau tara bara oloh -- aloh bara keton kalote kea bara oloh beken. Sapunae kilau rasul Kristus, ikei tau ih manuntut taloh en-en bara keton.
7Tapi ampin ikei balemo-lowah metoh aton hong bentok keton, sama kilau ije biti ibu je halaluan kare kawan anake.
8Awi sintan ikei, ikei tatap sadia manenga akan keton dia baya Barita Bahalap je bara Hatalla te, tapi pambelom ikei mahin kea. Basa ikei paham sinta keton!
9Batantu keton magon mingat kilen ampin kakarase ikei satiar tuntang mahampas uhat-tulang ikei. Handau hamalem ikei bagawi mangat ikei dia manyusah ije biti kea bara keton katika ikei mangabar Barita Bahalap je bara Hatalla te akan keton.
10Ikei belom barasih, bujur tuntang jaton kapapae dengan keton je jari percaya dengan Kristus. Keton toh kare saksin ikei, kalote kea Hatalla.
11Keton katawan ikei halaluan kare keton mije-mije sama kilau ije biti bapa halaluan kare anake.
12Ikei manasehat keton, ikei manantiring keton tuntang ikei hajajuan keton mangat keton maharagapan ampin pambelom keton sampai manyanang atei Hatalla. Basa Hatalla jari mantehau keton uka manjadi oloh bara Lewu Taheta ain Hatalla tuntang mangkeme kahain Aie.
13Aton ije hal beken tinai je mawi ikei harajur manarimakasih intu Hatalla. Hal te iete, metoh ikei manyampai barita bara Hatalla akan keton, keton mahining tuntang manarima barita te dia ie kilau barita bara olon, tapi kilau barita je toto-toto bara Hatalla. Ie te je metoh kanjerae bagawi huang keton je percaya dengan Kristus.
14Pahari handiai, taloh je buah keton jari kea buah kare ungkup Hatalla hong Yuda je manjadi oloh ain Yesus Kristus. Keton mangkeme kapehe bara bangsa keton kabuat, sama kilau je ingkeme awi kare ungkup Hatalla hong Yuda te bara kare oloh Yehudi.
15Ewen te je jari mampatei Tuhan Yesus tuntang kare nabi, tuntang mangapehe ikei. Ewen mamusoh oloh handiai, tuntang Hatalla samasinde dia sanang dengan ewen.
16Malahan ewen mahambang ikei mambarita akan kare bangsa je dia Yehudi barita je tau manyalamat kare bangsa te. Awi kalote kare oloh Yehudi te harajur mandahang kare dosan ewen sampai sukup karee. Tuntang toh kajariae ewen buah kalait Hatalla!
17Tapi pahari handiai, bara katika ikei hapisah hanjulo dengan keton -- hapisah hong mate tapi dia hong atei -- ikei sasar taharu dengan keton tuntang toto-toto manggau jalan mangat hasondau tinai dengan keton!
18Kahandak ikei mado haguet manalih keton; tuntang aku, Paulus, jari mancoba labih bara sinde, tapi setan mahambang ikei.
19Puna keton ih kaharap tuntang kahanjak ikei. Basa kareh amon Tuhan Yesus dumah, tuntang itah manaharep Ie, maka keton ih je iandal ikei!
20Puna keton ih je eka kaandal tuntang kahanjak ikei.