Alkitab Mobile SABDA
[VER] : [NIAS]     [PL]  [PB] 
 <<  1 Timotius 5 >> 

1Bõi ofõnu si fao li sabe'e ba niha sabõlõ atua moroi khõu. Dõnisi ia wamondrondrongo fehedeu, hulõ na amau ia. Faigi ndra si bohou ebua hulõ na talifusõu,

2ira alawe satua hulõ na inau. Ira alawe si bohou ebua faigi ira hulõ dalifusõu alawe, si fao buabua satulõ.

3Fosumange lakha mbanua si ha ya'iya'ia ba wa'aurinia.

4Ba na so lakha mbanua si so iraono ba ma ma'uwu, khõra andrõ ofõnai'õ wame'e fa'aboto ba dõdõ, wa lõ tola lõ larorogõ zoroiyomora, ba wanulõni fa'asõkhi dõdõ zatua ba ma gawera, bõrõ me omasi Lowalangi zi manõ.

5Ira alawe lakha mbanua si ha ya'iya'ia, ba lõ si tola mondrorogõ ya'ia, ha khõ Lowalangi manõtõna ia. Bongi ma'õkhõ bõi ibõhõli wangandrõ khõ Lowalangi ba wangandrõ fatolosa-Nia.

6Ba na so lakha mbanua somasi hufa awõ gomasiõ dõdõ ba gulidanõ, no mate zi manõ hew̃a'ae auri nasa ia.

7Fa'ema wanuturu lala andre khõra, ena'õ si lõ sinegu ira.

8Na so niha si lõ mondrorogõ sahatõ khõnia, lõ mendrua manõ zoroiyomonia samõsa, no i'osilõ'õgõ wamatinia niha si manõ; ba abõlõ wa lõ sõkhinia moroi ba niha si lõ mamati.

9Lakha mbanua si tola lafaogõ bakha ba ngenoli dõitõi lakha mbanua ya'ia da'õ: lõ ambõ moroi ba zi õnõ ngafulu fakhe ndrõfinia, me fõna ha samuza mangowalu ia,

10teturia ia wa no ira alawe samalua ngawalõ zi sõkhi, si mane: fangebua'õ iraononia ba zi sõkhi, sohahau tõdõ ba wanema tome si mõrõ ba nomonia, sanema'õ fao sumange niha samati, sanolo niha sabu tõdõ, ba samalua sindruhundruhu ngawalõ halõw̃õ si sõkhi.

11Bõi be'e bakha ba ngenoli da'õ ndra lakha mbanua sawuyu dõfi nasa. Bõrõ na alua wangisõ nõsi sabõlõ khõra, lafuli lalau mangowalu ba larõi Keriso.

12Ba mosala ira bõrõ me no lasawõ wawu'usa lira si fõfõna khõ Keriso.

13Lõ mendrua manõ wa latibo'õ ginõtõra ba wanõrõnõrõi omo niha. Ba sabõlõ lõ sõkhi nasa, ya'ia wa lafahaõ ira ba wangobongobousi tõi niha bõ'õ, ba la'urusai urusa niha bõ'õ awõ wa lahuhuo'õ ngawalõ zi tebai mufatunõ.

14Da'õ mbõrõ wa omasi ndra'o na mangowalu manõ lakha mbanua sawuyu dõfi andrõ, lasõndra nono ba la'ehao zoroiyomora, ena'õ lõ lasõndra ginõtõ si fa'udu khõda andrõ ba wangobongobousi tõida.

15So ndra lakha mbanua si no elungu solo'õ Afõkha.

16Ba na so moroi ba zoroiyomo ndra alawa Niha Keriso lakha mbanua, lõ tola lõ itolo lakha mbanua andrõ; bõi mitehegõ mbanua Niha Keriso zangonorogõ tõdõ ya'ira. Ba zi manõ tola latolo lakha mbanua si lõ manõ hadõi sahatõ khõnia banua Niha Keriso andrõ.

17Sondrõnia'õ banua Niha Keriso sohalõw̃õ si sõkhi, sinangea tebe'e dua winaeta zumangera, si ofõna sibai ya'ira sowõlõ'õlõ fahuhuo ba mamahaõ.

18Ba Mbuku Ni'amoni'õ no tesura, "Saw̃i samõbõrõ gandru ba wangefa'õ gandru moroi ba ngalainia, bõi ko'u mbawania", si manõ gõi, "Niha sohalõw̃õ so luonia wanõndra gajinia".

19Na so samõsa zatua mbanua Niha Keriso ni'angadugõ, bõi tema wangadu da'õ na lõ samaduhu'õ mato darua ba ma tõra.

20Niha samazõkhi horõ, lõ tola lõ lategu fõna mbanua Niha Keriso sato, ena'õ ata'u gõi danõ bõ'õ.

21Fõna Lowalangi, Yesu Keriso ba mala'ika nituyu andrõ, u'andrõ sibai ena'õ õ'o'õ menemene da'e awõ wa lõ fanahõ tõdõ gofu ha'õkhõ, ba lõ fango'awõgõ zamõsa.

22Bõi aliolio tufa tanga hõgõ ba wombali'õ ya'ia enoni Zo'aya. Na no lafalua horõ niha bõ'õ, ba bõi farahu ndra'ugõ ba horõ da'õ. Rorogõ ndra'ugõ ena'õ lõ faruka zogoro ita.

23Bõi sa'ae ha sambalõ idanõ manõ õbadu; badu gõi ma'ifu agu ba wanolo talumõ andrõ, bõrõ me asese mofõkhõ'õ.

24So õsa zoroma sibai olalõw̃ania, fatua lõ muhuku na. Ba so õsa gõi zawena mu'ila olalõw̃a na no aefa wanguhuku.

25Si manõ gõi gamuata si sõkhi i'anemai'õ oroma. Ba si lõ aoha mu'oroma'õ na'i, ba tebai sa'atõ i'osagõtõ'õ mubini'õ.


  Share Facebook  |  Share Twitter

Download Audio MP3 (1 Timotius 5):
Mobile (Low Quality) - CD (High Quality)

 <<  1 Timotius 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran