Dual Panel1Ba moguna uhõndrõgõ wangombakha wa na ba wa'a'iraono nasa so zanema ondrõita, so niha samaigimaigi ba sondrorogõ ya'ia gasagasa wa irugi dõfi nihonogõi namania. Lafalua khõnia zi mane nifalua ba zawuyu, hew̃a'ae ya'ia zindruhunia zokhõ harato andrõ fefu.
2(4:1)
3Si manõ gõi ita: Gõtõ wa iraono ita, no i'osawuyu ita fa'abõlõ geheha gulidanõ andrõ.
4Me no irugi inõtõnia andrõ, Ifatenge Nononia Lowalangi ba gulidanõ. Ono-Nia andrõ no ni'adonogõ ndra alawe ba no si so barõ mbawa huku agama.
5Bõrõ da'õ ihõli niha si so barõ mbawa huku agama; ba ena'õ tobali ono ita khõ Lowalangi.
6Ba me no ono ami khõ Lowalangi, ba no Ifatenge Lowalangi Geheha Nono-Nia andrõ bakha ba dõdõda, ya'ia Geheha si'ao andrõ, "Ama, he Amagu."
7Tobali, tenga sa'ae sawuyu ami, no ono. Ba me ono ami khõ Lowalangi, Ibe'e khõmi Lowalangi ngawalõ zi no Ifa'anõ ba ndraono-Nia.
8Me fõna ba lõ saboto ba dõdõmi Lowalangi, da'õ mbõrõ wa no tobali ami sawuyu wa'abõlõ lowalangi bõ'õ, ba sindruhunia tenga Lowalangi.
9Iada'e, ba no aboto ba dõdõmi Lowalangi. Ba hana wa mifuli ami nasa ba geheha wa'a'ulidanõ andre, si lõ fa'abõlõ ba si numana? Hana wa omasi ami nasa ni'osawuyu geheha gulidanõ andrõ?
10Oi so ngaluo ni'owasainimi, si manõ gõi mbaw̃a awõ ndrõfi.
11Aombõ dõdõgu, alai na tobali zayazaya gõlõ wa'erege dõdõgu wohalõw̃õ ba khõmi!
12He ya'ami ira talifusõ! U'andrõ sibai khõmi, ena'õ mi'o'õ zi mane ya'o, me no si mane ya'ami gõi ndra'odo. Lõ nilaumi khõgu hadia ia ngawalõ zi lõ sõkhi.
13Lõ solifu nasa ami hadia ia mbõrõ wa uturiagõ Duria Somuso Dõdõ andrõ khõmi, ba mbõrõta, ya'ia me no gõnado fõkhõ.
14Me luo da'õ lõ sanuzu dõdõmi ndra'o, hew̃a'ae fõkhõ ba mbotogu andrõ no tobali fanandraigõ sebua khõmi. No mitema ndra'o si mane wanema'õ mala'ika Lowalangi, ba ma si mane wanema'õmi Yesu Keriso.
15Odõw̃adõw̃a sibai dõdõmi me luo da'õ. Iada'e, heza so wa'odõw̃adõw̃a dõdõmi andrõ? Aboto ba dõdõgu wa meluo da'õ mitehegõ manõ mikoe hõrõmi ba mibe'e khõgu, na tola mena mifalua da'õ.
16Hadia, no mibali'õ udu ndra'o khõmi, bõrõ me no uw̃a'õ khõmi zi duhu?
17Ya'aboto ba dõdõmi wa no terou sibai dõdõ niha bõ'õ andrõ ba wangalui ya'ami, ba hiza no si lõ sõkhi gohitõ dõdõra. Edõna ira lafabali ami khõgu, ena'õ terou sibai dõdõmi ba wolo'õ khõra.
18Sõkhi sa na si terou tõdõ ba wangalui ngawalõ zi sõkhi, na lõ mamalõmalõ, ba tenga ha na so ndra'odo khõmi.
19He ya'ami iraonogu ni'omasi'õgu! Iada'e, no so ndra'o ba wangabu dõdõ ba wo'angeragõ ya'ami. Fa'afõkhõ zi falukha ya'odo andrõ, si mane fa'afõkhõ ba ndra alawe na luo tumbu nononia. Ba si lõ aetu wanaõgõgu fa'afõkhõ, na lõ mofa'auri mbuabua Keriso ba dõdõmi.
20Humulu sibai dõdõgu, ena'õ na sodo khõmi iada'e, fa tola fahuhuo ndra'odo khõmi faoma ngawua wehede bõ'õ si sõkhi ba soadu, me lõ u'ila sa'ae hadia nilaugu khõmi.
21Ya'ami ira talifusõ somasi nifatõrõ huku agama (oroisa), mifondrondrongo hadia niw̃a'õgu! U'ombakha'õ khõmi hadia zindruhunia zi no musura ba zura Huku Moze.
22Ba da'õ no musura wa dombua nono Gaberahamo: Ina nono zi sambua ya'ia zawuyu andrõ, ba ina nono tanõ bõ'õ ya'ia zi tenga sawuyu.
23Ono moroi ba ndra alawe si tobali sawuyu, no si tumbu bõrõ wa'omasi niha. Ba ono, moroi ba ndra alawe si tenga sawuyu, tumbu me no amabu'ula li Lowalangi.
24Tola ni'oguna'õ da'e tobali amaedola. Darua ndra alawe si no amaedola dua ngawalõ wawu'usa li: si sambalõ, moroi ba Hili Zina'i -- ya'ia Hagara; iraono ni'adonogõnia tobali sawuyu.
25Tobali, Hagara no amaedola Hili Zina'i andrõ, ba danõ Arabi. No famaedo mbanua Yeruzalema awõ nõsinia fefu iada'e ia, no tobali sawuyu.
26Ba Yeruzalema si so ba zorugo, ya'ia Yeruzalema si tenga sawuyu, ba ya'ia ninada, ya'ita fefu.
27Noa sa musura ba Mbuku Ni'amoni'õ, "Omusoi'õ dõdõu ya'ugõ ira alawe si lõ ono, si lõ irai wadono! Owuawua'õ dõdõu ba lau a'iki, he ya'ugõ si lõ irai afõkhõ wodono! Me ira alawe si no irõi fo'omonia isõndra dania oya ndraono moroi ba ndra alawe si so ira matua."
28He ya'ami ira talifusõ! No ono Lowalangi ami, ni'adonogõ bõrõ gamabu'ula li Lowalangi; hulõ si mane Giza'aki ami.
29Me luo da'õ ono si tumbu molo'õ fa'omasi niha, ifa'ala nono si tumbu bõrõ wa'omasi Geheha Lowalangi, si manõ gõi iada'a.
30Ba hadia zi no musura bakha ba Mbuku Ni'amoni'õ? Ba da'õ no musura si mane: "Tibo'õ ndra alawe sawuyu andrõ awõ nononia, bõrõ me ono zawuyu andrõ tenga sanema ondrõita, si mane nono ndra alawe si tenga sawuyu andrõ."
31Andrõ ya'ami ira talifusõ. Ya'ita andre tenga ono zawuyu, no ono zi tenga sawuyu, ma ono wangali mbõrõ sisi.