Dual Panel1Ba ginõtõ fõna no asese muhede Lowalangi khõ ndra tuada nifa'ema ndra sama'ele'õ, ba oya ngawalõ lala I'oguna'õ.
2Ba ginõtõ safuria andre muhede Ia khõda nifa'ema Nono-Nia. Ba khõ Nono-Nia andre Iwõwõi gõlia ulidanõ. Ba no Ihonogõi Lowalangi wa Ono-Nia andre gõi zangokhõgõ hadia ia fefu.
3Ya'ia zamohaga lakhõmi Lowalangi andrõ si takile; Ya'ia wamaedo mboto Lowalangi. Ya'ia gõi zangaro õlia ulidanõ andre faoma taroma li-Nia sabõlõ sibai. Me no aefa Ihaogõ ba I'efa'õ niha moroi ba horõra, ba mudadao Ia ba dadaoma wamatõrõ ba zorugo fao awõ Lowalangi, Samatõrõ fondrege zalaw̃a.
4Isõndra dadaomania Ono andrõ sabõlõ alaw̃a moroi ba mala'ika, bõrõ me tõi nibe'e Lowalangi khõ-Nia andrõ abõlõ tefosumange moroi ba dõi nibe'e ba mala'ika.
5Lõ irai Iw̃a'õ Lowalangi zi mane ba zi samõsa mala'ika gõi, "Onogu Ndra'ugõ; ma'õkhõ andre Ama-U Ndra'o." Lõ irai gõi Iw̃a'õ Lowalangi zi mane sanandrõsa ba mala'ika gofu heza, "Ama-Nia Ndra'o, ba Ono-Gu Ia."
6Ba ginõtõ Ifatenge Nono-Nia sia'a Lowalangi ba gulidanõ andre, Iw̃a'õ Lowalangi si mane, "Fefu mala'ika Lowalangi lõ tola lõ mangalulu khõ Nono andrõ."
7Sanandrõsa ba mala'ika, Iw̃a'õ Lowalangi si mane, "Lowalangi zamali'õ mala'ika-Nia tobali angi, ba enoni-Nia tobali holahola galitõ."
8Ba khõ Nono andrõ, Iw̃a'õ Lowalangi, "Ya'ugõ Lowalangi, ba fetaromõ si mane razo, lõ tebulõ irugi zi lõ aetu! Famatõrõ-Mõ andrõ ba no famatõrõ satulõ.
9No somasi fa'atulõ Ndra'ugõ, ba fatuwu'Õ ba zamarukhu; Da'õ mbõrõ wa Lowalangi, ya'ia Lowalangi-U, no Ituyu Ndra'ugõ ba I'owuawua'õ dõdõ-U faoma sumange, si tohude moroi ba nawõ-U."
10Iw̃a'õ Lowalangi gõi, "Ya'ugõ, So'aya, ba mbõrõta no Õfazõkhi gulidanõ, ba faoma tanga-U samõsa zamazõkhi banua si yaw̃a.
11Fefu da'õ ba si taya dania, ba tobali atua si mane nukha; ba Ya'ugõ lõ awu'a.
12Õlia ulidanõ andre dania ba Õfurui si mane famurui baru, Õ'angali'õ dania faoma tanõ bõ'õ. Ba Ya'ugõ lõ mamalõ wa Ya'ugõ manõ, ba dõfi-U lõ dania mo'aetufa."
13Lõ irai Iw̃a'õ Lowalangi khõ zi samõsa gõi moroi ba mala'ika-Nia, "Dadao ba da'e ba dadaoma wamatõrõ fao awõ-Gu, irugi Ubali'õ zi fa'udu khõ-U latuhi danõ fõna-U."
14Na si manõ, hadia zindruhunia mala'ika Lowalangi andrõ? Ya'ira ba no eheha, enoni Lowalangi, ba nifatenge Lowalangi ba wanolo niha sanema fangorifi dania.