Dual Panel1Huku agama Yahudi ha same'e khalakhala sambõ tara sanandrõsa ba ngawalõ zi sõkhi si so fõna, ba tenga khalakhala sindruhu moroi ba ngawalõ huku andrõ. Andrõ wa tebai ifo'ahonoa niha huku andrõ na mu'ohe zumange khõ Lowalangi, hew̃a'ae ero'ero rõfi mu'ohe wasõmbata si mane da'õ.
2Na duhuduhu no tehaogõ niha samosumange Lowalangi andrõ moroi ba horõ, ba lõ sa'ae khõra tõdõ wa mo'olalõw̃a ira, ba tebato niha wame'e sumange.
3Ba soromania, sumange nibe'e andrõ sero rõfi no ba wamasugi ba dõdõ niha horõra,
4bõrõ me duhu wa do zaw̃i ba do nambi si matua tebai i'efa'õ horõ.
5Da'õ mbõrõ wa ba ginõtõ mõi ba gulidanõ Keriso, Iw̃a'õ khõ Lowalangi, "Lõ omasi Ndra'ugõ zumange ba fasõmbata; hiza i no Õhõnagõ sambua mboto khõ-Gu.
6Lõ omasi Ndra'ugõ zumange urifõ nitunu si tobali fasõmbata ba ma sumange fasõmbata ba wangefa'õ horõ.
7Awena Uw̃a'õ, 'Ya'e Ndra'o, he Lowalangi! No so Ndra'o ba wamalua somasi'Õ. Si mane si no musura sanandrõsa khõ-Gu bakha ba Mbuku Ni'amoni'õ.'"
8Ba mbõrõta Iw̃a'õ Keriso, "Lõ omasi Ndra'ugõ zumange ba fasõmbata; lõ omasi Ndra'ugõ zumange urifõ nitunu si tobali fasõmbata ba sumange fasõmbata fangefa horõ." Keriso zanguma'õ si manõ, hew̃a'ae fefu zumange andrõ nibe'e fasõmbata molo'õ huku agama niha Yahudi.
9Aefa da'õ Iw̃a'õ Keriso, "Ya'e Ndra'o he Lowalangi! No so Ndra'o ba wamalua somasi Ndra'ugõ." Bõrõ da'õ, Lowalangi zanayaigõ fefu sumange si no ara andrõ, ba i'angali'õ faoma Keriso si tobali sumange si bohou.
10No Ifalua Yesu Keriso hadia zomasi Lowalangi Ifalua. Da'õ mbõrõ wa fefu ita nihaogõ moroi ba horõ ba zumange boto Yesu Keriso, nibe'e sumange ha samuza ba zi sagõtõ fa'ara.
11Ero samõsa gere ba niha Yahudi ihalõ halõw̃õnia si mane ere ero'ero ma'õkhõ, ba auli'auli ibe'e wasõmbata sumange si ha da'õda'õ manõ. Ba sumange si manõ ma'ifu tebai i'efa'õ horõ.
12Ba hiza i, ha samuza zumange nibe'e Keriso fasõmbata bõrõ horõ; sumange da'õ moguna sagõtõ fa'ara. Me no aefa Ibe'e zumange fasõmbata andrõ, ba dumadao Keriso ba gambõlõ Lowalangi, ba mamatõrõ Ia fao awõ Lowalangi.
13Iada'e Ibalobaloi Keriso nifalua Lowalangi wombali'õ si fa'udu khõ-Nia mangalulu khõ-Nia.
14Tobali bõrõ zumange si samuza andrõ, no Ifazõkhi Keriso niha si no tehaogõ moroi ba horõ, ba mo'ahonoa sagõtõ fa'ara.
15Sanandrõsa ba da'õ no gõi Ifaduhu'õ Eheha Lowalangi khõda. Iw̃a'õ Eheha Lowalangi,
16"'Da'õ wawu'usa li nifazõkhi-Gu dania ba khõra ba ginõtõ si so fõna,' Iw̃a'õ So'aya, 'Ube'e dania huku-Gu bakha ba dõdõra, ba Usura ia bakha ba gera'erara.'"
17Iw̃a'õ zui Lowalangi, "Ba U'olifuagõ dania horõra ba fa'alõsõkhira."
18Tobali, horõ ba fa'alõsõkhi sa'ae no te'efa'õ, lõ moguna sa'ae mube'e zumange fangefa horõ.
19Iada'e, ya'ami ira talifusõ, bõrõ wa'amate Yesu andrõ, tola mõi ita ba Naha Fondrege Ni'amoni'õ.
20No Ibokai Yesu sambua lala si bohou khõda, ya'ia lala same'e fa'auri, sanõrõ ba'aba'a, ya'ia mboto Yesu samõsa.
21Iada'e ba no so khõda gõi samõsa gere sebua, sangonorogõ tõdõ Omo Lowalangi.
22Bõrõ da'õ da ta'ondrasi Lowalangi faoma tõdõ satulõ ba famati saro; ba tõdõ si no mu'amoni'õ moroi ba ngawalõ zala, ba boto si no muhaogõ faoma idanõ sohauhau.
23Ya aro ita wololohe hadia ia zi no tafaduhu'õ si tobali tõtõnafõda, bõrõ me Lowalangi tola nifaduhusi tõdõ, Ifalua zi no Ifabu'u.
24Ba da tafaoma tatundreheni nawõda, ena'õ faoma tafarou dõdõ nawõda ba wamalua fa'omasi awõ wamalua ngawalõ zi sõkhi.
25Da tatohugõ wa'orudu ba wangandrõ, bõi so zawuwu si mane si no lalaulau niha bõ'õ õsa. Ena'õ lõ farõi ita ba wo'amenesi awõda, bõrõ me no ta'ila wa lõ ara tõ tohare Zo'aya.
26Bõrõ na no tefa'ema khõda duria soroi Lowalangi andrõ, ba lõ mamalõ tafazõkhi horõ ni'odõdõgõ, ba lõ hadõi sumange sa'ae si tola mangefa'õ horõda.
27Ha sambua zi so dania khõda ya'ia da'õ mangondrasi fanguhuku ba alitõ wõnu Lowalangi, sahori ikhozi dania niha solaw̃a Ya'ia!
28Niha si lõ molo'õ oroisa Lowalangi si no ifa'ema Moze, nihuku mate lõ fa'ahakhõ dõdõ, na so zamaduhu'õ darua irugi datõlu niha, wa ya'ia no mosala.
29Ba no tõra moroi ba da'õ hukuma nihare'õ ba niha si no manguhundra Ono Lowalangi. Niha andrõ no i'aohasi ba i'o'aya ndro amabu'ula li Lowalangi, ya'ia wa'amate Keriso zangehao ya'ia moroi ba horõ. No i'o'aya Geheha same'e buala fa'ebua dõdõ.
30Bõrõ me no aboto ba dõdõda haniha zanguma'õ, "Ya'o dania zanulõni! Ba Ya'o dania zanguhuku!" ba sanguma'õ gõi, "So'aya dania zanguhuku banua-Nia andrõ."
31Ha wa'ata'uda na aekhu ita ba danga Lowalangi Sauri!
32Ba mitõrõ tõdõmi hewisa ami ba ginõtõ si lalõ. Me inõtõ da'õ me no aefa ihagaini ami haga Lowalangi, oya mitaõgõ wamakao; ba hew̃a'ae si manõ no lõ mamalõ fasõndra ami si fao fa'abõlõ.
33So itaria la'o'aya ami ba lalau khõmi zi lõ sõkhi fõna niha sato. So itaria gõi fao ami ba wanaõgõ famakao fao awõ niha nifakao si manõ,
34ba fao ami gõi wamatõfa ba dõdõmi fa'abu dõdõ niha si no mukuru. Ba me luo terabu fefu zi so khõmi, ba no mitema da'õ fao fa'ahono dõdõ, bõrõ me mi'ila wa so nasa khõmi zabõlõ sõkhi, si lõ tebulõ irugi zi lõ aetu.
35Bõrõ da'õ, bõi aetu wanõtõnami, bõrõ na aro wamatimi, ba so gazi sebua dania ba da'õ!
36Andrõ moguna mibologõ dõdõmi, ena'õ tola mifalua zomasi Lowalangi, ba ba zi manõ tola mitema hadia zi no Ifabu'u li Lowalangi.
37Bõrõ me bakha ba Mbuku Ni'amoni'õ no tesura, "Ha tõ ma'ifu sibaikõ tõ, ba Ya'ia sedõna so andrõ, tohare ba wa'alio; ba lõ dania Ifa'ese'ese mbongi we'aso-Nia andrõ.
38Ba dozi banua-Gu satulõ ba falukha wa'afaduhu dõdõ ba te'orifi; ba na so ba gotaluara zawuwu, ba lõ omasi Ndra'o khõnia."
39Ba ya'ita andre tenga banua sawuwu ba selungu. Hiza i, ya'ita banua si faduhu tõdõ khõ Lowalangi ba si no mu'orifi.