Dual Panel1Melekhisede andre ya'ia razo si otarai Zalema ba ere Lowalangi Fondrege Zalaw̃a. Me mangawuli Gaberahamo moroi ba wasuwõta, me i'alani ndra razo, tohare Melekhisede ba wamaondragõ ya'ia awõ wa ifahowu'õ.
2Bõrõ da'õ ibe'e Aberahamo khõ Melekhisede sambua ni'ofulu moroi ba zi no isõndra fefu moroi ba wasuwõta andrõ. (Tõi Melekhisede eluahania, si ofõna, "Razo Wa'atulõ", ba me ya'ia razo si otarai Zalema, andrõ wa tõinia mo'eluaha gõi "Razo Wa'ohahau Dõdõ".)
3Sanandrõsa khõ Melekhisede andre lõ hadõi fangombakha, gofu heza gõi, wa ya'ia so nama ba ma ina, ba ma bõrõta nga'õtõnia lõ hadõi fangombakha, sanandrõsa ba wa'atumbunia, ba ma gõi fa'amatenia. No faoma ia si mane Ono Lowalangi; ya'ia gere si lõ tebulõbulõ.
4Tobali, ya'ita ta'ila ba da'e ha wa'ebuania Melekhisede andre; fondrege zebua, ia irege Aberahamo, ama wurugõ soida, ibe'e khõnia sambua ni'ofulu fa'oya moroi ba ngawalõ fefu zinõndrania moroi ba wasuwõta andrõ.
5Bakha ba huku agama Yahudi no muhonogõi wa banua Gizera'eli lõ tola lõ labu'a sambua ni'ofulu fa'oya moroi ba haratora fefu khõ nga'õtõ Lewi si tobali ere -- eluahania khõ ndra talifusõra samõsa. Ba sindruhunia na'i soi Gizera'eli ba no nga'õtõ Gaberahamo gõi.
6Melekhisede tenga nga'õtõ Lewi, ba hew̃a'ae si manõ itema gõi sambua ni'ofulu fa'oya moroi ba gokhõta Gaberahamo, awõ wa ifahowu'õ gõi Gaberahamo si no mube'e fawu'usa li soroi Lowalangi.
7Duhu no tebai nifadaõ sa'ae wa niha nifahowu'õ ba no abõlõ ide'ide moroi ba niha samahowu'õ.
8Ira Ere sanema be'elõ si sambua ni'ofulu fa'oya andrõ ya'ia niha si to'õlõ si tola mate. Ba molo'õ Buku Ni'amoni'õ, Melekhisede sanema be'elõ si sambua ni'ofulu fa'oya andrõ ya'ia niha sauri.
9Tobali tola gõi taw̃a'õ, wa Lewi -- samõsa gõi nga'õtõnia zanema be'elõ si sambua ni'ofulu fa'oya moroi ba soi Gizera'eli -- mame'e gõi sambua ni'ofulu fa'oya andrõ khõ Melekhisede sanõrõ Aberahamo, me inõtõ ibe'e Aberahamo khõ Melekhisede.
10Me falukha Melekhisede khõ Gaberahamo, ba lõ si tumbu Lewi; ba tola taw̃a'õ, no so ia bakha ba mboto Gaberahamo, tuania andrõ.
11Barõ wondrõnia'õ ndra ere Lewi, huku agama Yahudi andrõ no tebe'e ba soi mbanua Gizera'eli. Bõrõ me ira ere Lewi fõna tebai lafo'ahonoa wolau hadia ia zi lõ tola lõ la'ohalõw̃õgõi, andrõ lõ tola lõ so gere tanõ bõ'õ, ya'ia moroi ba ngasi gere Melekhisede, ba tenga sa'ae moroi ba ngasi Gere Ga'aroni!
12Na fetaro ndra ere andrõ tewu'a, andrõ huku agama Yahudi gõi lõ tola lõ tewu'a.
13Niw̃a'õ ba da'e ya'ia Zo'aya ya'ita. Ba no soroi soi bõ'õ Ia, ba lõ irai so samõsa gõi zi otarai soi-Nia andrõ zamalua halõw̃õ fa'a'ere.
14Fefu niha la'ila wa So'aya ya'ita, soroi soi mado Yehuda; ba lõ irai itõtõi Moze soi da'õ na fahuhuo ia sanandrõsa ba gere andrõ.
15Ngawalõ nifatunõ andre ba abõlõ oroma sa'ae, na so samõsa gere bõ'õ si mane Melekhisede.
16Tefataro Ia tobali ere, tenga modanedane ba goigoi nga'õtõ, no modanedane ba wa'auri-Nia sabõlõ ba si lõ amozua.
17Bõrõ me ba Mbuku Ni'amoni'õ no muw̃a'õ, "Ya'ugõ ba no ere sirugi zi lõ aetu, si mane Melekhisede."
18Ba hiza, no murõi furi huku fõna andrõ, me lõ mofa'abõlõ ba lõ moguna.
19Huku agama Yahudi andrõ, lõ mofa'abõlõ wombali'õ gofu hadia ia tobali mo'ahonoa. Da'õ mbõrõ wa mube'e khõda iada'e wanõtõna sabõlõ sõkhi; irege bõrõ da'õ tola ta'ondrasi Lowalangi.
20Mendrua manõ nasa, wa tefaogõ wahõlusa soroi Lowalangi. Lõ hadõi fahõlusa si mane da'õ, ba ginõtõ tefataro ndra ere tanõ bõ'õ andrõ.
21Ba hiza, me tefataro Yesu tobali ere te'oguna'õ wahõlusa andrõ me muhede Lowalangi khõ-Nia, "No fahõlu Zo'aya, ba lõ Iwu'ai dania nihonogõi-Nia wa, 'Ere Ndra'ugõ irugi zi lõ aetu.'"
22Andrõ wa no tobali we'ewe'e dõdõ Yesu ba gamabu'ula li sabõlõ sõkhi.
23So nasa sambalõ tõ: Ira ere tanõ bõ'õ andrõ no ato, bõrõ me ya'ira zamõsana mate irege lõ latohugõ halõw̃õra.
24Ba Yesu, auri irugi zi lõ aetu, bõrõ da'õ halõw̃õ-Nia fa'a'ere lõ awu'a ba niha bõ'õ.
25Andrõ bõrõ da'õ irugi zi lõ aetu, Yesu tola mangorifi niha sangondrasi Lowalangi sanõrõ Ya'ia. Tola Ifalua da'õ Yesu bõrõ me auri Ia irugi zi lõ aetu ba wanguma'õ khõ Lowalangi angandrõw̃a niha andrõ.
26Tobali, Yesu andrõ Gere Sebua ni'oguna'õda. No ohauhau Ia: No mufabali Ia moroi ba niha si so horõ, ba no mu'alaw̃a'õ irugi nahia sabõlõ alaw̃a moroi ba zorugo fefu.
27Ya'ia tenga si mane ira ere sebua tanõ bõ'õ, sero ma'õkhõ lõ tola lõ ofõna mame'e sumange bõrõ horõnia samõsa, awena bõrõ horõ niha. Yesu, ha samuza manõ Ibe'e zumange, ya'ia me luo Ibe'e mboto-Nia samõsa tobali sumange.
28Huku agama Yahudi ifataro niha si lõ mo'ahonoa tobali ere Sebua. Ba aefa da'õ moroi ba huku andrõ, Ilau fawu'u li Lowalangi si fao fahõlusa wa Ifataro tobali Ere Sebua Nono si no mo'ahonoa irugi zi lõ aetu.