Dual Panel1Alua gõi zi mane da'õ ba Nikoniu. Mõi Waulo ba Baranaba ba gosali niha Yahudi. Fahuhuo ira ba da'õ ba ato niha Yahudi ba soi tanõ bõ'õ si faduhu tõdõ khõ Yesu.
2Ba hiza lõ omasi faduhu dõdõ ndra niha Yehuda, lafawe'e niha sato soi bõ'õ si tenga niha Yahudi irege afõkhõ dõdõra ba zamati khõ Yesu.
3Andrõ lõ ara torõi Waulo ba Baranaba ba da'õ. Ba si fao fa'abarani fahuhuo ira sanandrõsa khõ Zo'aya. Ba Iforoma'õ gõi So'aya wa sindruhu duria wa'omasi-Nia andrõ; Ibe'e khõra kuaso wamalua sagahõlihõli dõdõ ba ngawalõ zi lõ harumani.
4Ba oi zara fasõndra dõdõ zowanua ba mbanua andrõ; so zi fao ba niha Yahudi ba so gõi zi fao khõ ndra sinenge andrõ.
5Mamagõlõ ndra niha Yahudi, ira salaw̃a khõra, awõ niha soi bõ'õ si tenga niha Yahudi, wanebu kara ira sinenge andrõ.
6Bõrõ me la'ila zalua andrõ ira sinenge, lalau moloi numalõ ba Lisitera ba ba Derebe, ya'ia mbanua ba Likonia, awõ mbanua si fasui.
7Laturiaigõ zui duria si sõkhi ba da'õ.
8Ba Lisitera so niha sombuyumbuyu i'otarai wa'atumbu, irege lõ irai tola mowaõwaõ ia bõrõ me tebai abõlõ gahenia.
9No dumadao niha andrõ wamondrondrongo huhuo Waulo. I'ila Faulo wa mamati niha andrõ, bõrõ da'õ tola nifadõhõ ia. Ifaigi ia Faulo.
10Ba ebua li Waulo imane, "Ozizio, faoma aheu!" Manaoka niha andrõ ba mowaõwaõ.
11Me la'ila nilau Waulo, mu'ao niha sato ba li Likonia wanguma'õ, "No mõi tou ba gulidanõ Lowalangi tobali niha."
12Labe'e tõi Mbaranaba Zeo, ba tõi Waulo labe'e Heremesi, bõrõ me si fahuhuo ia.
13Ere Zeo, soroi ba nahia wangandrõ si so fõna mbanua, i'ohe zaw̃i si matua ba bungabunga ba mbawa gõli mbanua. Fao ia gõi ba niha sato ba wame'e sumange khõ ndra sinenge andrõ.
14Melarongo ira Baranaba ba Faulo nilau niha sato andrõ, lasika nukhara ba fagohi ira ba gotalua niha sato, mu'ao ira lamane,
15"He, hana wa milau zi mane? Niha gõi ndra'aga si mane ya'ami! So ndra'aga ba da'e wangombakha Turia Somuso Dõdõ khõmi ena'õ mirõi zi lõ boto andre ba mõi ami khõ Lowalangi sauri, sombõi banua, tanõ ba asi awõ nõsinia fefu.
16Ba zi lalõ no Itehe manõ Lowalangi auri dozi soi fefu molo'õ somasi dõdõra.
17Ba hiza lõ olifu Ia wame'e tandratandra sanandrõsa khõ-Nia, ya'ia wolau si sõkhi. Ibe'e khõmi deu moroi ba mbanua si yaw̃a ba bua danõ na inõtõnia. Ibe'e khõmi gõ ba I'omusoi'õ dõdõmi."
18Ba he no law̃a'õ zi manõ ira sinenge andrõ, ba abua nasa khõra wanenaw̃a niha sato wame'e sumange khõra.
19Ato niha Yahudi si tohare ba Lisitera moroi ba Gandriokhia, ba Nikoniu ba danõ Wisidia wamawe'e niha sato ena'õ fao khõra. Latebu Waulo kara, ba lafondrõni hakhi ira moroi ba mbanua. Lawalinga no mate sa'ae ndra Faulo ba Baranaba andrõ.
20Ba hiza, me muzizio zamati wamasui ya'ira, maoso ndra sinenge andrõ ba numalõ ira ba mbanua mangawuli. Mahemolunia mofanõ Waulo numalõ ba Derebe awõ Baranaba.
21La'ombakha'õ Duria Somuso Dõdõ ba Derebe ira Faulo ba Baranaba ba ato niha si faduhu tõdõ khõ Yesu. Aefa da'õ mangawuli ira ba Lisitera. Aefa da'õ zui numalõ ba Nikoniu, ba ba Gandriokhia ba danõ Wisidia.
22Ba mbanua andrõ la'abe'e'õ dõdõ zolo'õ khõ Yesu ba labe'e menemene ena'õ lõ mamalõ faduhu dõdõra khõ Yesu. Lamane ira sinenge ba niha samati khõ Yesu ba mbanua andrõ, "Lõ tola lõ tatõrõ wamakao ua, awena dania tasõndra wa'ohahau dõdõ ba gamatõrõw̃a Lowalangi."
23Ba zi dozi banua Niha Keriso, lafataro zondrõnia'õ ba mbanua Niha Keriso andrõ ira Faulo ba Baranaba. Faoma fangandrõ ba fuasõ latou'õ ndra sondrõnia'õ nifaduhusira tõdõ andrõ khõ Lowalangi.
24Aefa da'õ latohugõ wofanõra ira Faulo ba Baranaba numalõ ba Wisidia ba Wamefilia.
25Ba me no aefa laturiaigõ daroma li Lowalangi ba Warega, numalõ ira ba Gatalia.
26I'otarai da'õ moloyo ira mangawuli ba Gandriokhia. Ba mbanua andrõ mbõrõta nahia tetou'õ ira ba wa'omasi Lowalangi, ya'ia ena'õ lahalõ halõw̃õ andrõ ni'asiwaira iada'e.
27Ba me larugi Gandriokhia, la'owuloi mbanua Niha Keriso ba da'õ, ba latutunõ khõra hadia zi no Ilau Lowalangi ba khõra. Latutunõ gõi hewisa wa no Ibokai lala Lowalangi ena'õ tola faduhu dõdõ soi niha si tenga niha Yahudi khõ Yesu.
28Ara torõi Waulo ba Baranaba ba mbanua andrõ ba gotalua niha samati.