Dual Panel1Omasido na aboto ba dõdõmi ha wa'abõlõ wasõndrata dõdõgu ba khõmi, ba ba khõra ba La'odikia, ba ba khõra si lõ irai fa'ila khõgu gõi.
2Ufalua da'õ fefu, ena'õ aro dõdõra, ba faoma la'omasi'õ nawõra, irege ha sambua ira. Ba zi manõ aboto ba dõdõra sindruhundruhu ba aro dõdõ, awõ wa aboto ba dõdõra zi tobini andrõ khõ Lowalangi, ya'ia Keriso.
3Ha Keriso manõ zamokai khõda ngawalõ wa'atuatua ba fangi'ila Lowalangi, si tobini khõda me fõna.
4Andrõ u'ombakha'õ khõmi da'e fa bõi lafowõhõ ami niha sangehaogõ fehede khõmi.
5Hew̃a'ae no arõu ndra'o khõmi, ba tõdõgu so so khõmi. Ba omuso dõdõgu ba wamaigi ya'ami, me aro wamatimi khõ Keriso.
6Ba ya'ami no mitema Yesu Keriso, ya'ia Zo'aya. Bõrõ da'õ ena'õ auri ha sambua ba khõ-Nia ami, ba mow̃a'a ba khõ-Nia.
7Ena'õ mi'otomosi wa'aurimi sodanedane Keriso. Ena'õ itugu abe'e wamatimi, molo'õ si no mufaha'õ ya'ami. Ba ena'õ falawu dõdõmi ba wangandrõ saohagõlõ.
8Ba ya mangenanõ ami, bõi so zamõbõ ya'ami faoma fa'atuatua niha gulidanõ si lõ moguna, samaelungu ya'ami. Fa'atuatua si manõ tenga soroi Keriso, no soroi gera'era niha ba soroi geheha zamatõrõ ulidanõ.
9Bõrõ me fa'auri Lowalangi andrõ ma'afefu, so khõ Keriso, ya'ia ba wa'aniha-Nia.
10Ba bõrõ me ha sambua khõ Keriso, tebe'e gõi khõmi wa'auri so'ahonoa. Keriso ba no hõgõ geheha sabõlõ (salaw̃a) ba samatõrõ andrõ.
11Ba wa ha sambua khõ Keriso, no muboto ami. Tenga famoto nilau niha, no famoto nilau Keriso, ya'ia wangeheta ya'ami moroi ba wa'abõlõ nõsi niha umbu horõ.
12Me luo tebayagõ idanõ ami, no muko'o ami awõ Keriso, ba ba wamayagõ idanõ andrõ gõi no tesusugi ami awõ Keriso, bõrõ wamatimi ba fa'abõlõ Lowalangi andrõ si no manusugi Keriso moroi ba ngai zi mate.
13Me fõna, no mate wa'aurimi ba horõmi, ba bõrõ me lõ muboto ami dali zoroma ba hõrõ. Iada'e Lowalangi zangorifi ya'ami awõ Keriso. No I'efa'õ horõda fefu Lowalangi,
14awõ wa no Itayaigõ zura wo'õmõda andrõ, sangalani ya'ita ba ngawalõ gamakhoita si tebai tafalua. Ba wamorõfa sura andrõ ba dõla rõfa, no Ibunu fefu ngawalõ wanandraw̃aisi ya'ita Lowalangi.
15Ba rõfa andrõ Itayaigõ Keriso wa'abõlõ geheha zalaw̃a ba samatõrõ andrõ. No Ibali'õ ira nifaigifaigi niha sato Keriso, tobali niha gurunga, me luo I'ohe ira Keriso ba wanuriaigõ femõna-Nia andrõ.
16Bõrõ da'õ bõi sa'ae mitehe ihuku ami niha ba gõ ba ma ba nibadu, ba ma ba ngawalõ luo ni'amoni'õ ba agama, ba ma ba wanõrõ tõdõ bõrõta mbaw̃a, ba ma ba zanandrõsa ba luo Sabato.
17Fefu da'õ ha lumõ moroi ba ngawalõ hadia ia zi so dania, ba boto soroma moroi ba da'õ fefu ya'ia Keriso!
18Bõi mitehe ifa'ala ami niha sofaya, sangidengide'õ ya'ia ba samosumange mala'ika. Fayaw̃a niha si manõ ba gera'era fa'a'ulidanõ khõnia, niha sanunonuno angilatania ia,
19ba tenga khõ Keriso molemba ia, si no tobali hõgõ. Bõrõ wamatõrõ Keriso, terorogõ ba te'osambua'õ ndrotondroto mboto andrõ ma'afefu, ba manõi molo'õ somasi Lowalangi.
20Ba no mate ami awõ Keriso, ba no te'efa'õ ami moroi ba geheha samatõrõ õlia andre. Ba hana wa fa'aurimi hulõ niha nifatõrõ gulidanõ nasa? Hana wa mibe'e ami nifatõrõ gamakhoita da'e,
21"Bõi babaya da'e", "Bõi a da'õ", "Bõi tufa da'e ba ma da'õ"?
22Ba fefu gamakhoita si manõ, no si lõ moguna na no lafake. Da'õ fefu no amakhoita ba famahaõ nifazõkhi niha.
23Fa'atuatua sa law̃a'õ, ba wango'ou niha ba wamosumange mala'ika, ba wangidengide'õ, ba ba wamakao boto; ba fefu da'õ lõ moguna ba wangalani fa'abõlõ nõsi niha.