Alkitab Mobile SABDA
[VER] : [NIAS]     [PL]  [PB] 
 <<  Matius 4 >> 

1Aefa da'õ I'ohe Yesu Eheha Lowalangi ba danõ si mate ena'õ itandraigõ Ia Afõkha.

2Õfa wulu ngaluo õfa wulu wongi wa'ara lõ manga Yesu. Ba olofo Ia.

3Tohare Gafõkha ba imane khõ Yesu, "Na Ono Lowalangi Ndra'ugõ, ba bali'õ roti gara andre."

4Itema linia Yesu, "No tesura ba Mbuku Ni'amoni'õ: Tenga ha ba roti manõ auri niha, ba ngawalõ daroma li si otarai mbawa Lowalangi."

5Me aefa da'õ, i'ohe Yesu Afõkha ba Yeruzalema ba ifa'aso Ia yaw̃a ba mbumbu Nomo Zo'aya.

6Imane khõ-Nia Afõkha, "Na ono Lowalangi Ndra'ugõ, ba fazaumba'Õ si tou; bõrõ me no so ba Mbuku Ni'amoni'õ sanguma'õ, 'Ifatenge mala'ika-Nia Lowalangi ba wozago Ya'ugõ, latema'õ Ndra'ugõ faoma tangara, ena'õ lõ manendre gahe-U ba gara.'"

7Itema linia Yesu, "Ba Mbuku Ni'amoni'õ no gõi tesura, 'Bõi tandraigõ Zo'aya Lowalangiu.'"

8Aefa da'õ, i'ohe zui Afõkha Yesu ba hili salaw̃a sibai. I'oroma'õ khõ Yesu ba da'õ fefu gamatõrõw̃a-Nia ba gulidanõ awõ lakhõminia.

9Imane Afõkha khõ Yesu, "Fefu da'e ube'e khõ-U, na Õtuhi danõ wangalulu khõgu."

10Itema linia Yesu, "Ofanõ Sanandraigõ! No musura ba Mbuku Ni'amoni'õ: Khõ Zo'aya Lowalangiu mangalulu ndra'ugõ ba ha Ya'ia manõ ni'o'õu li!"

11Ba gafuriatania irõi Yesu Afõkha andrõ, ba tohare gõi mala'ika sato mõi ira ngoningoni-Nia.

12Me Irongo Yesu no labe'e ba gurunga Yohane, numalõ Yesu ba Galilea.

13Irõi mbanua Nazareta, mõi Ia ba Gafana'uma. Ba da'õ torõi Ia. Afana'uma, ya'ia mbanua ba zinga Mbaw̃a Galilea ba danõ Zebuloni ba Nafetali.

14Ba nilau Yesu andrõ, alua zi mane niw̃a'õ Yesaya sama'ele'õ, imane:

15"Tanõ Zebuloni ba tanõ Nafetali, lala numalõ ba mbaw̃a, ba zi tambai Nungo Nidanõ Yoridano Galilea no tanõ niha si tenga niha Yahudi!

16Niha si so ba zogõmigõmi, no la'ila haga sebua! No tumbu luo ba niha si so ba nõri nilumõ'õ wa'amate!"

17I'otarai da'õ Ibõrõtaigõ mangombakha Yesu, "Mifalalini gera'erami ba mirõi horõmi, bõrõ me lõ aratõ Ibõrõtaigõ wamatõrõ-Nia Lowalangi!"

18Me mowaõwaõ Yesu ba zinga mbaw̃a Galilea, I'ila darua zi fagai, si fatalifusõ, ya'ia Zimoni (nifotõi Fetero) ba akhinia, Andrea. Lalau fadiala, me tuka zangalui i'a ira.

19Imane khõra Yesu, "Mi'o'õ Ndra'o. Ufahaõ ami ba wama'u'u niha tobali solo'õ Ya'o."

20I'anema'õ larõi ndrialara si fatalifusõ andrõ ba la'o'õ Yesu.

21Aefa da'õ me mowaõwaõ nasa Yesu, I'ila darua tõ zi fatalifusõ tanõ bõ'õ, ya'ia Yakobo ba Yohane, ono Zebedai'o. Lafazõkhizõkhi ndrialara si fao amara yaw̃a ba dundraha. Ikaoni gõi ira Yesu,

22i'anema'õ larõi dundraha ba amara andrõ, la'o'õ Yesu.

23Ifasui wanõrõ fefu õri Galilea Yesu. Mamahaõ Ia ba gosali ba manuriaigõ Turia Somuso Dõdõ sanandrõsa ba wamatõrõ Lowalangi. Ifadõhõ gõi niha sofõkhõ ba si tebai.

24Ba humõngõ duria Yesu ba zi sagõrõ õri Siria, irege ato niha sangondrasi Ya'ia. La'ohe khõ-Nia fefu niha sofõkhõ soya ngawalõ, awõ fefu ngawalõ wangarõngarõ: niha nifakao mbekhu si lõ sõkhi, saniri, sombuyumbuyu, ba oi Ifadõhõ ira.

25Ato sibai niha solo'õlo'õ Yesu me inõtõ da'õ, so zi otarai Galilea, si otarai Zi Fulu Banua, so zi otarai Yeruzalema, si otarai Yudea, ba so gõi niha si otarai nõri ba zi tambai Yoridano.


  Share Facebook  |  Share Twitter

Download Audio MP3 (Matius 4):
Mobile (Low Quality) - CD (High Quality)

 <<  Matius 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel