Dual Panel1He ya'ami ira talifusõ! No fondrege wa'asõkhi Lowalangi khõda. Da'õ mbõrõ wa u'andrõ sibai khõmi ena'õ mibe'e sumange sauri ami ni'oniagõ khõ Lowalangi ba sangomusoi'õ tõdõ-Nia. Si manõ zi lõ tola lõ'õ wamosumangemi Lowalangi.
2Bõi hulõ wa'auri niha gulidanõ andre wa'aurimi. Mitehegõ Ibohouni wa'aurimi Lowalangi ena'õ tehaogõ ami. Ba zi manõ tola mi'ila zomasi Lowalangi -- hadia zi sõkhi, ba hadia zangomusoi'õ tõdõ-Nia ba hadia zo'ahonoa.
3No Ibe'e khõgu wa'ebua dõdõ Lowalangi. Da'õ mbõrõ wa u'amenesi ami fefu: Ba miw̃a'õ tõdõmi abõlõ ebua ami moroi ba zindruhunia. Akha mifaigi ami si fao fangidengide'õ; ya dozi mifaigi ami molo'õ fa'ebua wamati nibe'e Lowalangi.
4No oya ndrotondroto ba mbotoda. Ero ndrotondroto ba mboto so halõw̃õnia.
5Si manõ gõi ita. Hew̃a'ae ato fefu ita, ba hiza ha sambua boto ita bõrõ me ha sambua ita khõ Keriso. Ba dozi ita faoma fariawõ zamõsana hulõ ndrotondroto ba zi sambua boto.
6Dozi ita so mbuala si faehufaehu. Ibe'e khõda mbuala andrõ Lowalangi molo'õ fa'asõkhi dõdõ-Nia khõda. Bõrõ da'õ lõ tola lõ ta'oguna'õ mbuala andrõ. Si so buala ba wangombakha turia soroi Lowalangi, lõ tola lõ i'ombakha'õ duria andrõ molo'õ fa'afaduhu dõdõ si so khõnia.
7Si so buala fanolo niha bõ'õ, akha sindruhundruhu itolo niha bõ'õ. Niha si so buala ba wamahaõ, akha i'osindruhugõ wamahaõ.
8Niha si so buala ba wamarou tõdõ niha bõ'õ, akha i'osindruhugõ wamarou tõdõ niha bõ'õ. Niha si so buala ba wame'e ba niha bõ'õ hadia zi so khõnia, akha ilau si fao fa'ahakhõ dõdõ sindruhundruhu. Niha si so buala ba wondrõnia'õ, akha i'osindruhugõ wondrõnia'õ. Niha si so buala wangahakhõsi tõdõ niha bõ'õ akha i'osindruhugõ wohakhõsi tõdõ niha bõ'õ si fao fa'omuso dõdõ.
9Lau wa'omasi soroi dõdõ. Uduni zi lõ sõkhi, ba olembai zi sõkhi.
10Ya faoma mi'omasi'õ nawõmi hulõ zi fatalifusõ bakha ba zi sambua omo, ba ya faoma fahulõ ami ba wamosumange awõmi.
11Ya'owõlõ'õlõ ami wohalõw̃õ. Bõi areu ami. Mi'ohalõw̃õ khõ Lowalangi bõrõ wamarou Geheha Lowalangi.
12Mi'anõtõna khõ Lowalangi si fao fa'omuso dõdõ, mibologõ dõdõmi ba wamakao ba bõi atage ami wangandrõ.
13Mitolo ba wanga'asogõ soguna ba niha samati khõ Lowalangi ba mitema ira si fao fa'omuso dõdõ ba nomomi.
14Mi'andrõ khõ Lowalangi ena'õ Ifahowu'õ niha samakao ya'ami. Mi'andrõ ena'õ Ifahowu'õ ira Lowalangi, bõi ya mu'elifi.
15Mifao wa'omuso dõdõ awõ niha somuso tõdõ, ba mi'ege'ege awõ zege'ege.
16Ya faoma ha sara dõdõmi. Bõi mifayaw̃a, mifaogõ ami si mane niha side'ide. Bõi miw̃a'õ tõdõmi abõlõ atuatua ami moroi ba zindruhunia.
17Na lalau zi lõ sõkhi khõmi niha, bõi misulõni faoma si lõ sõkhi. Milau zi sõkhi ba niha fefu.
18Moroi khõmi, mi'odõdõgõ ena'õ atulõ wa'aurimi ba niha fefu.
19He ya'ami ira talifusõgu! Ma'ifu bõi misulõni hadia ia, akha Lowalangi zi tobali sanguhuku. Bõrõ me no musura bakha ba Mbuku Ni'amoni'õ, "Ya'odo zanguhuku. Ya'odo dania zanulõni, Iw̃a'õ Lowalangi."
20Ba na olofo nudumi, mibe'e gõnia; na owõkhi dõdõnia, mifabadugõ nidanõ. Ba wolau si manõ, no mibe'e aila ia.
21Bõi mitehe i'alani ami si lõ sõkhi, akha mi'alani zi lõ sõkhi faoma si sõkhi.