Alkitab Mobile SABDA
[VER] : [NIAS]     [PL]  [PB] 
 <<  Roma 16 >> 

1Omasi ndra'o u'ombakha'õ khõmi Wo'ibe andrõ talifusõda alawe. Ilului halõw̃õ mbanua Niha Keriso ba Kengekirea.

2Mitema ia si mane samõsa ba gotalua ndrotondroto mbanua Zo'aya. Bõrõ me si manõ zi faduhu tõdõ khõ Lowalangi faoma latema'õ nawõra. Mitolo ia, na moguna khõnia watolosami, bõrõ me no ato itolo niha ba fao ndra'o ba da'õ.

3Mifa'ema wangowaigu khõ Wirisikila ba Akila, awõgu si fao wohalõw̃õ khõ Yesu Keriso.

4Arakhagõ mate ira ba wangefa'õ ya'odo. Mangandrõ saohagõlõ dõdõgu khõra -- ba tenga ha ya'odo, fefu mbanua Niha Keriso ba soi bõ'õ si tenga niha Yahudi gõi mangandrõ saohagõlõ khõra.

5Mifa'ema wangowaigu gõi ba mbanua Niha Keriso sowulo ba nomora. U'owai Gafaineto andrõ ni'omasi'õgu. Ya'ia andrõ niha si fõfõna zi faduhu tõdõ khõ Keriso ba danõ Asia.

6U'owai gõi Maria. No erege dõdõnia wohalõw̃õ khõmi.

7Mifa'ema gõi wangowaigu khõ Gandroniko ba khõ Yunio. Iwagu ira ba no irai fao ndra'aga ba gurunga. Fatua lõ si faduhu dõdõgu khõ Keriso, no ofõna faduhu dõdõra. Si teturia ira ba gotalua ndra sinenge.

8U'owai Gambeliato, ni'omasi'õgu bõrõ me si fao ndra'aga ha sambua khõ Zo'aya.

9Mifa'ema zumange fangowaigu khõ Guribano, awõda sohalõw̃õ khõ Keriso. Si manõ gõi zumange fangowaigu khõ Sitakhi ni'omasi'õgu.

10U'owai Gafele. No oroma wa'alõfarõinia khõ Keriso. U'owai gõi zi sambua omo Garisobulu,

11ba Herodiano, iwagu. U'owai gõi zi sambua omo Narikiso, si fao wa'afaduhu dõdõ khõ Zo'aya.

12Sumange fangowaigu khõ Derifena ba Terifosa sangeregesi tõdõ wohalõw̃õ we'amõi enoni Zo'aya. Awõ khõ Weresi ni'omasi'õgu, si no gõi erege tõdõ wohalõw̃õ khõ Zo'aya.

13U'owai Rufo ba inania, si hulõ ninagu gõi. Rufo no niha nifili Lowalangi si tesuno.

14Mifa'ema wangowaigu khõ Gasi-Kerito, Felego, Hereme, Fateroba ba Herema, awõ ndra talifusõ Niha Keriso bõ'õ si fao khõra.

15U'owai Wilologo ba Yulia; khõ Nereo ba talifusõnia alawe; khõ Golifa awõ ba zi faduhu tõdõ fefu awõra.

16Faoma mira'u danga nawõmi ba fa'agosa bawa dalifusõ. Lafa'ema wangowaira khõmi banua Niha Keriso fefu.

17He ya'ami ira talifusõ! U'andrõ sibai: mi'angelama ba niha samatumbu'õ fa'aboto dõdõ awõ zamawukaisi fa'afaduhu dõdõ niha khõ Zo'aya. Lõ faudu da'õ ba zi no lafahaõ ya'ami. Miheta ami moroi ba niha si manõ.

18Bõrõ me niha solau si manõ tenga sohalõw̃õ khõ Keriso So'aya ya'ita, no ba zomasi dõdõra manõ. Lalimo niha si lõ aboto ba dõdõ hadia ia ba wehede nihaogõhaogõ khõra awõ wa'asõkhi li.

19No oi aboto ba dõdõ niha fefu wa si lõ farõi ami ba wamahaõ sanandrõsa ba Duria Somuso Dõdõ soroi Lowalangi. Ba omuso dõdõgu khõmi ba da'õ. Omasido na atuatua ami ba zi sõkhi, ba si bodo ami ba zi lõ sõkhi.

20Lowalangi zame'e fa'ohahau dõdõ ba niha, ya'ia dania zame'e Afõkha barõ wamatõrõmi ba samakiko ya'ia. Ya Ifahowu'õ ami Yesu Keriso So'aya ya'ita!

21Ifa'ema khõmi wangowainia awõgu Timoteo. Si manõ gõi Lukio, Yaso ba Sosifatero, iwagu.

22Ya'odo Toretio zanura sura andre. U'owai ami fangowai fa'atalifusõta.

23Ifa'ema wangowainia khõmi Gayo. Ba nomonia so ndra'odo ba ba da'õ gõi gosali nahia wamosumange Lowalangi khõma. I'owai ami Eraso, satua sololohe kefe ba mbanua. Si manõ gõi Kurato.

24[Ya lõ mamalõ Ifahowu'õ ami fefu So'aya ya'ita Yesu Keriso. Yaduhu.]

25Nisuno Lowalangi! Khõnia wa'abõlõ ba wangabõlõ famatimi molo'õ Turia Somuso Dõdõ soroi Lowalangi nituriaigõgu sanandrõsa khõ Yesu Keriso. U'ombakha'õ duria andrõ molo'õ niforoma'õ Lowalangi khõgu; ya'ia ba ni'era'era dõdõ Lowalangi si no ngaotu fakhe lõ saboto ba dõdõ niha.

26Ba hiza, iada'e, bõrõ goroisa Lowalangi si lõ aetu, no teforoma'õ ni'era'era dõdõ andrõ ba te'ombakha'õ ba soi fefu ba zinura ndra sama'ele'õ, ena'õ fefu oi faduhu dõdõ ba la'o'õ li Lowalangi.

27Ha ya'ia Lowalangi fondrege zatuatua. Ya'ia ni'alaw̃a'õ irugi zi lõ aetu khõ Yesu Keriso! Yaduhu.


  Share Facebook  |  Share Twitter

Download Audio MP3 (Roma 16):
Mobile (Low Quality) - CD (High Quality)

 <<  Roma 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel