Dual Panel1Manga anạ u sěmbaụ, semben tawahal᷊uasu měnurat'u kasasahẹ u tempong karariadin tamai ini.
2U i kamene hala seng masingkạ mal᷊ahẹ u ěllon darěntan Mawu e sarung marěnta kere tahatako ruděnta hẹ̌bi.
3Kai kereu piạ taumata mẹ̌bera: "Patikụe su karalenehẹ̌ dingangu tạ konsang apa," tangu sěngkal᷊ěndị u i sire kinahombangengu kawawinasa, kụ tawẹu sarang sěngkatau nal᷊iwirẹ̌. Kụ ene kai nariadi sěngkělěndịu, mẹ̌sul᷊ungu tau wawine piạ kapapia sěngkianu hombangengu kal᷊iki.
4Kai manga anạ u sěmbaụ e wal᷊inewe taumata mẹ̌bẹ̌biahẹ̌ su ral᷊ungu kararěndung, hakịbeng ěllo ene kai makạl᷊ahěkosẹ̌ si kamene kere rarěntan tahatako.
5I kamene kěbị kai taumatan tualagẹ̌; i kamene nasowa su ěllo matualagẹ̌. I kitẹ e wal᷊inewe taumata měbẹ̌biahẹ̌ su kararěndung arau nasowa ghal᷊ipohong hěbi marěndung.
6Ual᷊ingu ene ute i kitẹ tawe wotonge kahuntikilang kere i sire wal᷊ine. I kitẹ e kai hinong maral᷊ukadẹ̌ dingangu tiněnnang kitẹ e kawe hinong matualagẹ̌.
7Su tempong hẹ̌bi e taumata měmpẹ̌tẹ̌tikị, dingangu su tempong hẹ̌bi e lai taumata mẹ̌tẹ̌těngkiwukang.
8Arawe i kitẹ ini e kai taumata nasowa su ěllo matualagẹ̌; ual᷊ingu ene ute tiněnnang kitẹ e harusẹ̌be matualagẹ̌. I kitẹ harusẹ̌ mangimang su Mawu ringangu kuměndagu taumata wal᷊ine ringangkeweng mělěharapẹ̌ matinalung u Mawu Ruata e sarung makasal᷊amatẹ̌ si kitẹ. Kai ene e aghidẹ̌ kụ makaěllung si kitẹ su ral᷊ungu pẹ̌sasekẹ mẹ̌sekẹ u kararěndung.
9Mawu Ruata e němile si kitẹ bal᷊inewe tadeạu ihukung, kaiso tadeạu i kitẹ makahombang kasasal᷊amatẹ̌ bọ'u Mawung kitẹ i Yesus Kristus.
10I Sie napohong baụgi kitẹ, tadeạu su tempong i Sie ruměnta kapia -- měnsangbe i kitẹ bẹ̌dang biahẹ̌, arau kai seng nate -- kai i kitẹ e makapẹ̌biahẹ̌be ringang'E.
11Ual᷊ingu ene, pěmpẹ̌dal᷊ahiborẹ̌ dingangu pěmpẹ̌tatoghasẹ̌, mẹ̌sul᷊ungkewen i kamene seng měkẹ̌koạ ene orasẹ̌ ini.
12Manga anạ u sěmbaụ, i kami e mẹ̌dẹ̌dorong sěngapam botonge tadeạu i kamene pěmpangadatẹ̌ su taumata apan měmpěmẹ̌munara sutal᷊oarang kamene; mangal᷊ene si sire ewe apan nipilen Mawu e mědeạu měngahạ dingangu měnasa si kamene.
13Kụ pěmpěngarẹ̌gangben sire pakapia-pia ringangu kakěndagẹ̌ u mẹ̌tahěndungkewelai apa kinoạ i sire. Pěmpẹ̌biahẹ̌ko pakaghaghighilẹ̌ sěntiniạ i kamene.
14I kami e mal᷊aing mẹ̌dẹ̌dorong, manga anạ u sěmbaụ, uriheko pakasikome i sain mạdiri měmpehal᷊ẹ̌; toghaseko naung u apang měngkạtakụ; pẹ̌tul᷊ungkon taumata hinong itul᷊ung dingangu pakakakědang mẹ̌těngong kěbị taumata.
15Pakapapia wue tadeạu mạdirin piạu mẹ̌mal᷊is'u ral᷊akị, ipěmal᷊isẹ̌ dal᷊akị e kaiso sěntiniạ měngkai pěmpẹ̌tatumẹ̌gal᷊ẹ̌ měmpẹ̌koạ mapia sěngkatau su sěngkatau l᷊awọ i kamene ringangu su kěbị.
16Měngkai pahul᷊uasẹ̌ sěntiniạ,
17dingangu pěmpẹ̌kal᷊iomaneng sidutu.
18Su patikụ kakakoạ u pẹ̌bawiahẹ̌ e měngkai pakịtarimakasẹ sidutu su Mawu Ruata e, u kai ene kẹ̌kapulune wọ'i kamene kere sěngkatau měbẹ̌biahẹ̌ nasěmbaụ su ral᷊ungi Kristus Yesus.
19Kumbahangbe měnguhung Rohkẹ̌ u Ruata e.
20Kumbahangbe tawe měngarěgang kal᷊awọu habarẹ̌ ilẹ̌onggọ u Rohkẹ̌ u Ruata e.
21Patikụ sạbarange měngkai pakạbanikate, ringangu apan mapapia e harusẹ̌ tẹ̌tol᷊ei.
22Pẹ̌těngkagheangkom patikụ haghin kararal᷊akisẹ̌.
23Karimạko Mawu Ruata sẹ̌sane e měngonggọ si kitẹ e karal᷊unsemahẹ̌, mạpakariadin taumata e kahěnga-hěngang mẹ̌biahẹ̌ sěmatang baụgu Mawu Kasěllahenge. Mal᷊owọko Mawu e měngkai mělẹ̌lukadẹ̌ si kamene sidutu baẹ su rohkẹ̌, himukudẹ̌ ore lai su wadang i kamene, sarangkewen tawẹ turạe su tempọen Mawung kitẹ i Yesus Kristus e ruměnta kapia.
24Mawu Ruata e, kụ seng nẹ̌kui si kamene, sarung mapakariadin ene e watụ u i Sie kai masatia.
25Doa i wue i kami e manga anạ u sěmbaụ!
26Pěmpẹ̌papangadatẹ̌be kěbị pakasasuměllung lawọ anạ u sěmbaụ tau Sahani.
27Ual᷊ingu kawasan Mawu e, iạ mẹ̌dẹ̌dorong sěngapam botonge tadeạu i kamene mapẹ̌basan suratẹ̌ ini e su patikụ anạ u sěmbaụ tamba pangangimang.
28Mal᷊owọko Mawung kitẹ i Yesus Kristus e, měngal᷊amatẹ̌ si kamene. Adat'i kami, Paulus