Alkitab Mobile SABDA
[VER] : [SANGIR]     [PL]  [PB] 
 <<  Filemon 1 >> 

1Anạ u sěmbaụ kụ i Filemon, hapị ore lai ringang i kami! Iạ i Paulus, sěngkatau taumatan tahungkụ ual᷊ing i Kristus Yesus, dingangu anạ u sěmbaụ i kitẹ i Timotius, němohẹ u surate ini si kau,

2ringangu su jamaatẹ̌ kụ mẹ̌tẹ̌tampung su wal᷊enu, ringangu l᷊ai su wawineng kitẹ, i Apfia ringangu hapị i kitẹ sěngkapẹ̌tawakal᷊i i Arkhipus.

3I kami mělẹ̌harapẹ̌ mal᷊owọko Ruata i Amang i kitẹ e ringangu Mawu Yesus Kristus měngonggọu al᷊amatẹ̌ dingangu karal᷊unsemahẹ̌ si kau.

4Balạewe apang iạ mẹ̌doa e iạ e mẹ̌sẹ̌sẹ̌bạ arengu ringangu makịtarimakasẹ su Ruata.

5U iạ e nakaringihẹ̌ u i kau e kahěnga-hěngang mạngimang su Mawu Yesus dingangu kụkěndagu kal᷊awọu kawanuan Duata e.

6Iạ e mẹ̌kal᷊iomaneng u mal᷊owọko pẹ̌dal᷊ahapị i kitẹ lawọ taumata mạngimang sarung makaual᷊i katatahuěnna limembong kasariane waugu kal᷊awọu al᷊amatẹ̌ kụ tẹ̌taghuaneng i kitẹ e ual᷊ingu nasěmbaụ dingang i Kristus.

7Anạ u sěmbaụ kụ i Filemon e, kakěndagu patikụ kawanuan Duata e, makal᷊uasẹ̌ si siạ dingangu mạngonggọu wawahansang si siạ e! Kal᷊awọu kawanuan Duata e seng němpahul᷊uasẹ̌ ual᷊ingu i kau e.

8Ual᷊ingu ene, kere sěngkatau anạ u sěmbaụ tamba pangangimang, iạ e wotonge wue měngoro si kau pẹ̌koạ apang hinong koatengu e.

9Kaiso ual᷊ingu iạ e kụkěndagi kau, iạ e samatang mědẹ̌dorong. Iạ ini e sěngkatau seng maghurang dingangu su orasẹ̌ ini e iạ kạl᷊aaresẹ̌ su ral᷊ungu tahungkụ ual᷊ing i Kristus Yesus.

10Iạ i Paulus měhumpạu rorongku sěmbaụ si kau, mạanung Onesimus, anạku su ral᷊ung i Kristus. Batụu su ral᷊ungu tahungkụ ini e iạ seng nakoạ i amang su marohkẹ̌.

11Humotong i sie tawẹ gunane waug'i kau e, arawe orasẹ̌ ini e i sie piạ gunane, bal᷊inewe tumbạeng baug'i kau, kaiso waugu iạ e lai.

12Orasẹ̌ ini taumata takụ ikẹ̌kěndagẹ̌ ene e takụ i ringọ si kau e kapia.

13Tumuhụ hinone iạ e mapulu měmaedẹ̌ si sie ringangku e kere pěngaweng si kau, tadeạu wotonge i sie paontol᷊ẹ̌ si siạ, karěngụeweng iạ e mạtatahang su ral᷊ungu tahungkụ ini ual᷊ingu mělẹ̌habaru Hengetang u Mawu e.

14Arawe iạ e mạdiri mẹ̌koạ manga apa kereu i kau wẹ̌dang tawe kimẹ̌kire. Iạ e limembong mapulu kereu i kau e mẹ̌koạbe ringangu naungu e mal᷊uasẹ̌; u iạ e mạdiri měnihasa si kau.

15Aramanung i Onesimus kawe nẹ̌tal᷊ei wọ'i kau e pạněntal᷊ang, tadeạu i kau e wotonge makareạ si sie kapia sol᷊ong karěngụe.

16Orasẹ̌ ini e i sie wal᷊inewe kětạeng sěngkatau makoạ ěllangu; kaiso kawe něngalembo wọu ene. I sie e kai sěndinganengu tau sahani ikẹ̌kěndagẹ̌. I sie kai ghẹ̌guwạ gunane si siạ, něngalembọete si kau! Nal᷊ahẹ u i sie masaria gunane baẹbe i sie kere sěngkatau ěllang arau katewe sěngkatau anạ u sěmbaụ su ral᷊ungu Mawu e!

17Ual᷊ingu ene, i kau e mạngěnnau iạ kawe hapị lawọ taumatan Sahani e, ute tarimạko kapia i Onesimus mẹ̌sul᷊ungkeweng i kau e něnarimạ u iạ.

18Kereu i sie piạ sal᷊ane arau piạ utange si kau e, ute walạ e iạ e měnal᷊udẹ̌ kěbị ene e.

19Kụ, mapiawe iạ e měmohẹ hala sini: Iạ i Paulus sarung měmaehẹ̌ pakasue-sue. (Nal᷊ahẹu tawahal᷊uasu iạ e mapẹ̌tahěndung u i kau sẹ̌sanu e piạ utangu e si siạ, kụ kai pẹ̌bawiahu wuhu e kere taumatan Sahani.)

20Ual᷊ingu ene, su arengu Mawu e kěnangko tul᷊ung iạ e, luase wue naungku e kere sěhapikang su ral᷊ung i Kristus.

21Iạ e měmohẹ u suratẹ̌ ini ual᷊ingu iạ maiaking u i kau e sarung mẹ̌koạ apang kụ nighausangku. Ore lai iạ masingkạ u i kau e sarung mẹ̌koạ něngalembo wọu ene.

22Těntal᷊ang ene, tul᷊ungko sadiai kamarẹ̌ baugu iạ e su wal᷊enu, u iạ e mělẹ̌harapẹ̌ Duata e rumaringihẹ̌ bue kakal᷊iomaneng i kamene manga anạ u sěmbaụ patikụ e ringangu mẹ̌bawa siạ kapia sol᷊ong anung kamene.

23I Epafras, kụ ene ringangku e su ral᷊ungu tahungkụ ual᷊ing i Kristus Yesus, něndingọ u adate si kau e.

24Tarimạko lai laadat'u manga ringangku: i Markus, i Aristarkhus, i Demas dingangu i Lukas.

25Mal᷊owọko Mawu Yesus Kristus měngal᷊amatẹ̌ si kamene. Adat'i kami, Paulus


  Share Facebook  |  Share Twitter

 <<  Filemon 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel