Dual Panel1Pangěnsueěnge, manga anạ u sěmbaụku, mal᷊owọko i kamene mahul᷊uasẹ̌ ual᷊ingu i kamene seng nasěmbaụ dingangu Mawu. Iạ tawe nakapěndang mawěhạ baugu mělukạu apang kụ seng takụ niwohẹ si kamene kal᷊amona; baugu hal᷊ẹ̌ ene mapia waugu kasasal᷊amat'i kamene.
2Pakatateghang bue su taumata apam mẹ̌kẹ̌koạ daral᷊akị, taumata kụ hinone isěbạ asu. I sire mạnihasa tadeạu taumata isunatẹ̌.
3Sěmbal᷊iau i kitẹ e taumata seng nanarimạ u sunatẹ̌ kahěngang, bal᷊inewe i sire. I kitẹ mạněmba Ruata e kai ual᷊ingu laahạ u Rohkẹ̌ u Ruata sẹ̌sane, dingangu i kitẹ makitarimakasẹ ual᷊ingu i kitẹ měbẹ̌biahẹ̌ nasěmbaụ dingangi Kristus Yesus. I kitẹ tawe gumaghal᷊ě su manga pẹ̌kakakomol᷊ẹ̌ kụ tụtuhụ gěsi.
4Su hinone iạ botonge gumaghal᷊ě su manga komol᷊ang ene. Kai kereu piạ pẹ̌sěngkatau makapěndangu i sie piạ aị e waugu ghumaghal᷊ě su komol᷊ang kụ tutuhụ gěsi, ute iạ něngalembọ e lai.
5Iạ nisunatẹ̌ tempon umurẹ̌ku ual᷊u ěllo. Iạ kinawantelẹ̌ kere sěngkatau tau Israelẹ̌ bọu hiten Benyamin; iạ e tau Ibrani tutune. Su ral᷊ungu sumasuměllung su torat'u agaman Yahudi, ute iạ kai nasowa sěngkatau ral᷊ohong komol᷊angu Farisi e.
6Sal᷊a anune iạ e kai limembong giange hakịu iạ e nanumbiagẹ̌ jamaatẹ̌. Kereu tinganeng bọu kěhịu torat'u agaman Yahudi ute iạ e taumatawe mapia, tawe kasěngkul᷊ang.
7Kai ual᷊ingu i Kristus, tangu kěbị apang nạung kal᷊amona takụ lẹ̌ěnnaěngu kai untung, ini e takụ nirekeng dugi.
8Bal᷊inewe kětạu manga hal᷊ẹ̌ tamai ene; kaiso patikụ sạbarang kụ takụ lẹ̌ěnaěnge kětạewen makạdugi. Kụ takụ tẹ̌taghuaneng tempo ini e kai něngalembong maarẹ̌ga: ute kai makakiral᷊a si Yesus Kristus, Mawuku. Ual᷊ingu i Kristus tangu iạ seng naměllọ u kěbị-kěbị e. Takụ lẹ̌ěnnaěng kěbị ene kai kětạeng kere onasẹ̌ tadeạu iạ botonge makahombang si Kristus,
9dingangu kahěnga-hěngang nasěmbaụ dingangi Sie. Pẹ̌kakauhẹ̌ mapia ringangu Ruata e bal᷊inewe ual᷊ingu kakanoạku hala su hal᷊ẹ̌ u tatuhụ torat'u agama. Orasẹ̌ ini e iạ kai piạ pẹ̌kakauhẹ̌ ku mapia ringangu Ruata, ual᷊ingu iạ mạngimang su Mawu Yesus Kristus. Kụ pẹ̌kakauhẹ̌ mapia ene rarěntane kai wọu Ruata ringangu wọu pangangimang su Mawu Yesus Kristus.
10Kakěsạ-kěsạ e takụ ilẹ̌ěnning ute kai tadeạu iạ makakiral᷊a si Kristus, dingangu makahombang kawasam pẹ̌bawangung'E wọu papaten'E. Iạ mẹ̌měningu sěngkapẹ̌tatahang dingang'E kụ makoạ mẹ̌sul᷊ungu i Sie su ral᷊ungu papaten'E.
11Kụ iạ e mělẹ̌harapẹ̌ u iạ sẹ̌saku sarung ipẹ̌biahẹ̌ kapia wọu papate.
12Iạ e tawe nẹ̌bera u iạ seng nakaringkau ene arau seng nasukụ. Kaiso iạ mangkewen mẹ̌tẹ̌tatětehẹ̌ sarang makaal᷊ạ laonggọ kụ nisadiang Kristus Yesus. Kai waugu ene i Sie seng nakaal᷊ạ siạ kụ nakoạ tataghuaneng'E.
13Nal᷊ahẹ manga anạ u sěmbaụ, iạ tumuhụ hinone tawe nakapěndangu iạ kawe seng nakaal᷊ạ pěreisẹ̌ ene. Kaiso kai piạ sěmbaụ kụ hinon takụ koateng, mangal᷊ene iạ mẹ̌timbul᷊eng apang su l᷊ikudẹ̌ku, ringangu mětẹ̌tatẹ̌tehẹ̌ sěngapam botonge měndingkau apan su těngo.
14Kai ene hakịu iạ měngkai tụtal᷊ang mẹ̌tẹ̌timona timona pangěnsueěnge mědeạu makahombang kal᷊auntung, mangal᷊ene pẹ̌bawiahẹ̌ su ral᷊ungu sorga; kụ baugu ene e Ruata kimui si kitẹ limiung Kristus Yesus.
15I kitẹ kěbị kụ seng matěllang tuhụ marohkẹ̌, ute hinong piạ pěndangu naung kerene. Kai kereu sutal᷊oarang kamene kawe piạ pěndangu naung bal᷊ine, tangu Ruata e sarung lai mělahẹ si kamene.
16Kaiso hal᷊ẹ̌ ini karimạko nẹ̌naungang: i kitẹ e harusẹ̌ tatapẹ̌ měbẹ̌biahẹ̌ tumol᷊e atorẹ̌ kụ seng kinatol᷊eěng i kitẹ sarang orasẹ̌ ini.
17Manga anạ u sěmbaụ kěbị! Pěmpẹ̌těnoko si siạ. I kami seng něgěllịu pẹ̌tatěnoěng kahěngang, ual᷊ingu ene pěmpẹ̌tatingangko pakapia i sai-saing kụ měmpẹ̌tẹ̌těno kakakoạ i kami e.
18Iạ e seng masau su sul᷊ene mạul᷊ị si kamene, dingangu ini e iạ saụ měndahisẹ̌ kapia ringangu sasangị, u kai lawọ taumata kụ pẹ̌bawiahe mẹ̌gěnggoghahẹ̌ mangal᷊en papateng Kristus su kuruisẹ̌.
19Pẹ̌bawiahu taumata kerene kasueěnge ute kawawinasa, batụu mahang duatan sire e kai kapulung gẹ̌sin sire hala. Manga hal᷊ẹ̌ makạmea e, sěmatangkewen ilẹ̌lansị i sire; batụu i sire měngkate tumbạu mětẹ̌tiněnnang kal᷊awọu apam mětẹ̌tatahinon dunia ini.
20Arawe i kitẹ ute kai kawanuan sorga. Kụ kai wọu ene lai Datu Mananal᷊amatẹ̌ si kitẹ e, Mawu Yesus Kristus kụ sarung duměnta. I Sie ete sěntiniạ lẹ̌antiwang.
21Badang i kitẹ e lome ringangu mahenẹ ini e sarung iwal᷊ui kahiang Kristus makoạ mẹ̌sul᷊ungu wadange hala kụ mawantugẹ̌. I Sie makakoạ ene ual᷊ingu i Sie mạnaghuang kawasa waugu mapạsasuměllungu patikụ sạbarang.