Matius 27 (SANGIR)

1Deng mal᷊uka-l᷊ukadẹ̌, kal᷊awọu imang těmbonange ringangu matatimad'u tau Yahudi nẹ̌sěngkanaungke mamate Mawu Yesus.

2I sire něhapusẹ̌ si Sie, ringangu nẹ̌bawa si Sie, wọu e něnarakang i Sie si Pilatus, guběrnurẹ̌ paparentaengu Roma.

3Ene i Yudas tahapẹ̌sunial᷊ẹ̌ ene nakasilọe u i Yesus seng nihukung, i sie nẹ̌sasěsilẹ̌. Mase i sie něnul᷊ẹeng doitẹ̌ sal᷊aka těllung pul᷊o su kal᷊ěpane ene su manga imang těmbonange ringangu matatimad'u tau Yahudi.

4I sie nẹ̌berạe, "Iạ e mamben nẹ̌dosa, watụ u něnarakangu tau tạ sal᷊ane, sarang i Sie nihukungu papate!" Kai i sire němpẹ̌simbang, "Kaia gunane si kami? Ene kai hal᷊ẹ̌ u!"

5I Yudas něhipen doitẹ̌ ene su Wal᷊em Mawu, mase nẹ̌těngkawitingu watangenge.

6Manga imang těmbonange němpangemongke roitẹ̌ ene kụ němpẹ̌bera, "Doitẹ̌ ini e kai roit'u raha. Tumuhụ toratẹ̌ e, doitẹ̌ ini e kai kumbahang isowa su ral᷊ungu tampạu sasěmba su Wal᷊em Mawu."

7Mase sarạeng i sire sěngkanaungke, i sire něngal᷊ạ doitẹ̌ e piněmělli ěntana kụ isẹ̌sẹ̌bạ Ěntanang Mẹ̌kakoạ Kuring. Ěntana ene nịkakoạ pěndal᷊ẹ̌bingangu taumata raghị.

8Ual᷊ingu ene hakịu sarang orasẹ̌ ini e ěntana ene nisěbạ "Ěntanang Daha".

9Ual᷊ingu ene, nisěhụe kere seng nipaul᷊ịu Nabi Yeremia, u, "I sire něnarimạ doitẹ̌ sal᷊aka těllum pul᷊o su kal᷊ěpane, u kai arẹ̌ga pinẹ̌kiren tau Israel kere wawaehẹ̌ baug'i Sie.

10Kụ doitẹ̌ ene nịpapakẹ i sire piněmělli Ěntanang Mẹ̌kakoạ Kuring e, kerẹewe seng niorong Mawu e si siạ."

11Piạ i Yesus nẹ̌těngom Pilatus, guběrnurẹ̌ u wanua ene, i Pilatus nakiwal᷊o, "I Kau e ratun tau Yahudi?" "Kere niweranu," angkuěngu Mawu Yesus.

12Arawe nạung piạ e manga imang těmbonange ringangu matatimad'u tau Yahudi e měnẹ̌nokeng kal᷊awọu laěnsilẹ̌ su Mawu Yesus, kai i Sie tawe simimbang sarang sěngkamohong.

13Ual᷊ingu ene i Pilatus nẹ̌berạe si Sie, "I Kau kai ta nakaringihẹ̌ kal᷊awọu laěnsil'i sire si Kau?"

14Kai Mawu Yesus e tawe simimbang kadiongeng sěngkamohong hakịu guběrnurẹ̌ e naral᷊ingu tạ sihinge.

15Su apan tempong Sal᷊imbang u Paskah e, guběrnurẹ̌ kai piạ tundune mạměllọu sěngkatau wọu tal᷊oaran taumata mạtatahungkụe walạewe tuhụ pinilen taumata l᷊awọe.

16Su tempo ene piạ sěngkatau taumatang hukumang pinẹ̌tateleng. Arenge i Yesus Barabas.

17Tangu piạ e taumata l᷊awọe natampungke, i Pilatus nakiwal᷊ọe si sire, "Kai i sai tangu su kapulung kamene e takụ ipěllọ? I Yesus Barabas arau i Yesus isẹ̌sěbạ si Kristus?"

18I Pilatus nẹ̌bera kerene u i sie kai masingkạu manga mangangawasa tau Yahudi e němpěnarakang i Yesus si sie ual᷊ingu i sire němpananoi.

19Su tempong Pilatus kụkaiang su wal᷊eng mělahukung, kutẹu kawinge timanatang ini si sie, "Kumbahang i kau mẹ̌těngkal᷊aụ pěrkarang tau tạ sal᷊ane ene, batụ u kai ual᷊ingu i Sie, iạ nipi ral᷊aị ěllo ini."

20Kai manga imang těmbonange ringangu matatimad'u tau Yahudi e měngkai měmpạnahowong taumata l᷊awọ ene mẹ̌deạu i Barabas pakịpěllọ kụ Mawu Yesus pakịpate.

21Mase guběrnurẹ̌ saụ kapia nakiwal᷊o si sire, "I sai su kapulung kamene takụ pěllokang bọu tal᷊oaran dẹ̌dua ěndaịe?" "I Barabas," angkuěng i sire.

22"Kamageng kerene ute, iạ kai hinong mẹ̌koạ a si Yesus isẹ̌sěbạ si Kristus e?" angkuěng i Pilatus si sire. "Kuruise i Sie!" angkuěng i sire kěbị.

23"Kawe apa pẹ̌sasal᷊an'E tangu?" angkuěng i Pilatus. Mase i sire němpamansagẹ̌ limembong kaihạe lai, "Kuruise i Sie!"

24Nạdehọ i Pilatus nakahěngangke u i sie tawe lai makakoạ apa-apa ringangu i sire kawe sarung měmpẹ̌ganohạ. Ene i sie něngal᷊ạe akẹ, kụ su těngon taumata l᷊awọ ene i sie nanguhasẹ̌ l᷊imane ringangu kạpěberane, "Iạ e tawe makatal᷊udẹ̌ su papaten tau ini! Ene kai kasingkạ i kamene!"

25Kutẹu taumata l᷊awọe němpẹ̌simbangke, "Ore, walạe si kami ringangu manga anạ i kami e kahombangengu hukumang su papatene!"

26Mase i Pilatus naměllọeng Barabas baug'i sire, kụ dimoloh'u taumata pinělimadẹ̌ Mawu Yesus dingangu nanarakang i Sie mědeạu pakịkuruisẹ̌.

27Bọu e manga sordadom Pilatus němpẹ̌bawa si Yesus simuẹ̌ su wal᷊eng lawọ u guběrnurẹ̌, kụ kạguwạu wuntuangu sordado e nẹ̌komol᷊ẹ̌ něliwung Mawu Yesus.

28I sire němpẹ̌luạ pakeangu Mawu Yesus, kụ pinẹ̌kakingkaengu kakingkaeng kamumụ si Sie.

29I sire němpělokongu paporong bọu manga lelangu kalu piạ hanggange, kụ tinakạ i sire su těmbọu Mawu Yesus. Bọu e pinakiumpaed'i sire těking sěmpědi su l᷊iman'E koaneng, kụ němpamul᷊angeng su těngon'E, kụ němpẹ̌taghunalangken Sie. "Tabeạ Datun Tau Yahudi!" angkuěng i sire.

30I sire němpěngědụe si Sie, kụ nangal᷊ạe těking sěmpědi ene, mase nipěměbahẹ̌ si Sie su těmbọ'E.

31Bọuten němpẹ̌taghunalang si Sie, i sire němpěluạe kakingkaeng kamumụe wọu e niluheěngken pakeange kapia. Bọu e i Sie niwawa sol᷊ong likude mẹ̌deạu ipakikuruisẹ̌.

32Su tal᷊oarạen dal᷊eng, i sire němpẹ̌sěmạeng sěngkatau wọu Kirene arenge i Simon. I sire něnihasạen tau ene iapạmasaěng kuruis'i Yesus.

33Bọu ene i sire nahumpạe su tampạ sěmbaụ isẹ̌sěbạ Golgota, mangal᷊ene "Tampạu Raran Těmbọ".

34Su tampạ ene i sire napěnginung i Yesus anggorẹ̌ nilaukangu pědu. Kai sarạeng Mawu Yesus bọu nẹ̌temang anggorẹ̌ e i Sie nạdirịe nanginung.

35Bọu e i sire němpanguruise si Sie, kụ němpẹ̌papahiạen pakeang'E kụ pinẹ̌dal᷊ahurị.

36Mase i sire nahungkaiangke němpěhapa si Sie sene.

37Su lantehu těmbọ'E i sire nẹ̌taingu wohẹ laěnsilẹ̌ si Sie kerei: "Ini e kai i Yesus, Datun Tau Yahudi".

38Dingangu Mawu Yesus e, piạko l᷊ai tahapate ruang katau nikuruis'i sire, sěngkatau su sěmběkane koaneng, sěngkatauewe lai su sěmběkane kaihi.

39Taumata apan sụsahe sene měmpẹ̌pakilingu těmbọ i sire kapẹ̌lẹ̌hinakange Mawu Yesus.

40I sire kapẹ̌berane, "I Kau mapulu měnggoghahẹ̌be Wal᷊em Mawu, kụ mamětị kapia su ral᷊ungu těllu ěllo! Kereu i Kau kai Ahus'u Ruata ute ěnnạe e rěllusẹ̌ bọu kuruisẹ̌ ene, kụ pẹ̌těngkasal᷊amateng batangengu."

41Kerene lai manga imang těmbonange ringangu manga mananětiro agama e ringangkewen manga matatimad'u tau Yahudi měmpěbẹ̌baheaun Mawu Yesus. I sire němpẹ̌bera u,

42"I Sie makạsal᷊amatẹ̌ taumata wal᷊ine, arawe watangeng'E sẹ̌sane, i Sie seng tawe makasal᷊amatẹ̌! Kereu i Sie kai ratuwen tau Israel ute mạpiangbe i Sie pẹ̌těngkarěllusẹ̌ bọu kuruisẹ̌ ene buhụe i kami mangimang si Sie.

43I Sie mạngimang su Mawu Ruata, kụ nẹ̌berau i Sie kai Ahus'u Ruata. Ho, ene i kitẹ deng měmanda měnsang Duata e makasal᷊amatẹ̌be si Sie ini e."

44I rẹ̌dua tahapěhampasẹ̌ nikuruisẹ̌ dingang'E mal᷊aing měmpělẹ̌hinakang si Sie kerene.

45Ene, ěllo e mal᷊ětu, karěngụe těllung kaorasẹ̌, kaguwạu wanua ene měngkatewe narěndung.

46Ene mangạe pukul᷊ẹ̌ tatěllu wawěllo, Mawu Yesus nẹ̌kiạ dingangu tingih'E maihạ, "Eli, Eli lama sabakhtani?" kụ mangal᷊ene, "O Ruataku, o Ruataku, unụe i Kau naněntang u Iạ e?"

47Pirang katau sene nakaringihẹ̌ kakiạ ene, kụ němpẹ̌bera, "I Sie mẹ̌kẹ̌kui si Elia!"

48Sěngkatau wọ'i sire měngkatewe nẹ̌bal᷊ikěkasẹ̌ tamai něngal᷊ạ bungan saghẹ kụ nilaehe su anggorẹ̌ mahaesẹ̌. Mase kahian sie nịsasusụe su kotọu kalu sěmpědi kụ niwuhane su wiwih'u Mawu Yesus.

49Arawe angkuěngu wal᷊ine e, "Pěngampal᷊ẹ̌ko, i kitẹ deng kumakělla měnsang i Elia sumongo měngambang si Sie!"

50Ene Mawu Yesus saụewe nẹ̌kiạ maihạ-ihạ, mase něminsul᷊u singongon'E pěngěnsueěnge.

51Gorden kạsasangẹ su ral᷊ungu Wal᷊em Mawu e natingkasẹ̌ napahiạ darua wọu rasị sarang bawa. Banua e nělinuhẹ̌ kụ manga wukidẹ̌ batu e nawawẹ̌ka.

52Manga l᷊ěbing něngkatope, kụ l᷊awọ badang u masasusi nate e, nẹ̌bangung kapia.

53I sire nahunsěbangke wọu manga lěbinge sarạeng i Yesus nẹ̌bangung bọu papaten'E, kụ i sire nahunsuẹ̌ su Yerusalem. Kụ sene lawọ taumata nakasilo si sire.

54Těmbonangu sordado ringangkewen manga sordado apạen mělẹ̌hapa si Yesus mangkewen něngkatakụ tạ sihinge sarang nakasilo l᷊inuhẹ̌, dingangu apạewen nariadie. I sire němpẹ̌berạe, "Mambeng těngadẹ̌, i Sie ini kai Ahus'u Ruata!"

55Sene piạko l᷊ai manga wawine lawọ měmpẹ̌kẹ̌kakẹ̌lla wọu marau. Kai i sire ene nạung nahuntol᷊e si Yesus mẹ̌tangkiang si Sie rokeng bọu Galilea.

56Su ral᷊unge kai i Maria Magdalena, i Maria i ninang i Yakobus dẹ̌duan Yusup, dingang i ninangu manga anạ i Zebedeus.

57Hěbi ene riměntạ e sěngkatau kalạ bọu Arimatea, kụ arenge i Yusupẹ̌. I sie mal᷊aing tumatol᷊e si Yesus.

58I sie nakoạ sol᷊ong anung Pilatus kụ nẹ̌dorong bal᷊unangu Mawu Yesus. Mase i Pilatus nẹ̌parentạe tadeạu wal᷊unang u Mawu Yesus pakịgěllị si sie.

59Tangu i Yusup nangal᷊ạe wal᷊unang'E kụ nipikungu hekạ al᷊usẹ̌ leneng buhu.

60Mase i sie něngomol᷊em bal᷊unang u Mawu Yesus su l᷊ěbing tataghuanenge, nạung seng těbe nipakange su wukidẹ̌ batu. Bọu e i sie nělungging batu masaria sěmbaụ, kere lahěping tukad'u l᷊ěbinge, mase i sie napul᷊ẹ.

61I Maria Magdalena ringangu i Maria wal᷊ine mạhungkaiang sene tụtatěngo l᷊ěbing ene.

62Tangu su sěngkariọěllone su ěllon Sabatẹ̌, manga imang těmbonange ringangu manga tau Farisi sěngkapahunděnta nẹ̌sombang i Pilatus,

63kụ nẹ̌bera, "Mawu, i kami nakatahěndung su tempong i anu kontiang ene wědang biahẹ̌, i Sie kai wọu nẹ̌bera u, 'Mal᷊iun těllu ěllo Iạ e sarung mẹ̌bangung.'

64Ual᷊ingu ene, pẹ̌parentako taumata pěhapa lěbing ene pakapia-pia sarang katěllu ěllone, mạdiringu manga murit'E makatako wal᷊unang u wadange kụ nẹ̌bera su taumata u i Sie kai seng nẹ̌bangung kapia wọu papatene. Kụ pěmamitaugẹ̌ pangěnsueěnge ini sarung limembong karal᷊akịe wọu humotong e."

65"I kamene piạ be sordadong kamene měndal᷊ukadẹ̌," angkuěng i Pilatus si sire, "dakọe riagate pakasěgadẹ̌ lẹ̌binge sěngapam botonge."

66Mase i sire nakoạe sol᷊ong lěbinge, němpanegelẹ̌ lahěping tukadẹ̌, mase nipělloěngu měndariagạe su těngone tadeạu tawe makapěnggohaeng su l᷊ěbing e.

<< Matius 27 >>