Dual Panel1Ini i kitẹ seng saụ nẹ̌sěngkapian Duata, ual᷊ingu i kitẹ nangimang. Kụ ual᷊ingu ene ute i kitẹ nẹ̌biahẹ̌ su ral᷊ungu pẹ̌darame ringangu Ruata wọu Mawung kitẹ i Yesus Kristus.
2Ual᷊ingu i kitẹ mạngimang su Mawu Yesus ute i Sie makạdiading kitẹ e makạpěndang kakěndagu Mawu Ruata, kụ kai ual᷊ingu kakěndagẹ̌ ene e i kitẹ biahẹ̌ tempo ini. Ual᷊ingu ene i kitẹ mạhul᷊uasẹ̌ ual᷊ingu i kitẹ piạbe pělaharapẹ̌ u i kitẹ e sarung makatemang karal᷊uensang kụ nighěllị u Mawu!
3Dingangu nangělembo wọu ene i kitẹ e kai lumiagẹ̌ u su ral᷊ungu kasasigěsạ, batụu i kitẹ masingkạ u kasasigěsạ e makạdiadi taumata maasagẹ̌,
4dingangu kal᷊aasagẹ̌ e makạdiadi taumata makạkědang; ini e kai makạděntang pělẹ̌harapẹ̌.
5Pẹ̌laharapẹ̌ kere ini e tawe mapakakěllohi kitẹ, batụu naung i kitẹ seng nilohoěng u Mawu Ruata ringangu kakěndag'E. Mawu Ruata něnganoạ ene ringangu karadiahangu Rohkẹ̌'E, kụ seng nighěllị si kitẹ.
6Su tempọeng i kitẹ su ral᷊ungu karalome, i Kristus e nate waugi kitẹ kụ su tempone mapia tinantun Mawu Ruata; sěmbal᷊iau i kitẹ taumata e kai marau wọu anun Mawu Ruata.
7Baugu pẹ̌sěngkatau taumata adilẹ̌ e mamben masigěsạ taumata mapulu mate. Aramanung baugu sěngkatau mapia, piạ lai taumata wahani mẹ̌tumpate.
8Arawe Mawu Ruata nělahẹu kakěndag'E si kitẹ su tempong i Kristus napohong baugi kitẹ su tempong i kitẹ bědang taumata marosa.
9Ini e i kitẹ seng nẹ̌sěngkapian Duata ual᷊ingu kapapohong i Kristus; ual᷊ingu ene těngadẹ̌ i kitẹ e sarung iapakasal᷊amatẹ̌ lai wọu ral᷊angehu Mawu Ruata kahiang Kristus.
10Kereu su tempong i kitẹ mẹ̌sẹ̌sẹ̌dụ u Mawu Ruata; i kitẹ e iapẹ̌damen Sie ual᷊ingkeng kapapohong u Ahus'E, apa lai ini sarạeng pěkakauhi kitẹ dingangu Mawu Ruata e naul᷊ị kapia, tantu i kitẹ sarung iapakasal᷊amatẹ̌ lai ual᷊ingu pẹ̌bawiahi Kristus.
11Kụ limembo wọu ene tangu i kitẹ mahul᷊uasẹ̌ lai su kapian Duata ual᷊ingu Mawung kitẹ i Yesus Kristus. U kai ual᷊ingu i Yesus Kristus, orasẹ̌ ini i kitẹ makạtemang pẹ̌kakauhi kitẹ mapia e ringangu Mawu Ruata.
12Dosa simuẹ̌ su ral᷊ungu dunia ual᷊ingu sěngkatau, kụ bọu rosa ene siměpụe papate. Něnggạe, papate timẹ̌pasẹ̌ su patikụ taumata, batụu kěbị taumata seng nanawo su ral᷊ungu rosa.
13Dokeng torat'u Yahudi e reng tawe nịgaghěllị, dosa e seng ene su ral᷊ungu dunia. Kai tangu rosa e tawe tatuntukang, ual᷊ingu tawẹ apa toratẹ̌ kụ botonge lampaěng.
14Maning kerene, wọu tempong Adam sarạewen tempom Musa e, papate nangawasa patikụ taumata. Sarangkatewe taumata kụ tawe limawang kere kinoạ i Adam taumata kerene mal᷊aing nipẹ̌kawasaěngu papate. I Adam mal᷊aing tul᷊adang apang bọ'i Sie kụ sarung duměnta samurine.
15Kai i rẹ̌dua ene e tawe nẹ̌sul᷊ung; batụu laonggọ u Ruata e nangělembong kasěllahe kereu isihing dingangu ral᷊awang kụ kinoạ i Adam. Dal᷊awang u sěngkatau nakawodaị taumata l᷊awọ nihombangengu papate. Nangělembong kasěllahe lai něnggạ u tatal᷊ěntụ u Ruata ringangu laonggọ kasasal᷊amatẹ̌ kụ nịgaghěllị su taumata kereng kakěpal᷊e, ual᷊ingu kapian naungu sěngkatau mangal᷊ene i Yesus Kristus.
16Laonggọ u Ruata mal᷊aing nangělembong kasěllahe marau wọu rosan sěngkatau ene. Batụu samurin sěngkatau nẹ̌koạ dal᷊awang ute simẹ̌bangke ponesẹ̌, "Nẹ̌sal᷊a". Kai sarạeng taumata lawọ e němpẹ̌dosa, narěntạe laonggọ bọu Ruata kụ mělẹ̌lahẹ, "Tawe nẹ̌sal᷊a".
17Ual᷊ingu ral᷊awang u sěngkatau, ute papate nẹ̌darakị su apan tampạ ual᷊ingu sěngkatau ene. Kai nangělembong kasěllahe lai něnggạe wọu apan nịkakoạ u sěngkatau wal᷊ine, mangal᷊ene i Yesus Kristus. Ual᷊ingu i Sie, Mawu Ruata měngkai napẹ̌dal᷊embon tatal᷊ěntụ'E su kakěpal᷊u taumata, kụ dingangu tạ bawaehe nakariadi si sire saụ nipẹ̌sěngkapian Duata; i sire sarung mẹ̌kawasa su dunia ini ual᷊ingu i Kristus.
18Kụ kereapạewen dal᷊awang u sěngkatau e něnggạe su kěbị taumata nihukung, kerene lai kakanoạ u sěngkatau kụ tụtol᷊e kapulun Mawu Ruata, něnggạe ute kěbị taumata mal᷊iwirẹ̌ bọu pẹ̌sasal᷊a ringangu kaonggotangu pẹ̌bawiahẹ̌.
19Kụ kereapạewen taumata l᷊awọ e nariadi taumata marosa ual᷊ingu sěngkatau ta tumatuhụ, ute kerene lai lawọ taumata wotonge saụ mẹ̌sěngkapian Mawu Ruata ual᷊ingu sěngkatau matuhụ su Ruata.
20Něgěllịu torat'u Yahudi e kai Mawu Ruata sẹ̌sane. Kaiso mangkewelain kạpahuntinamban tatuhụe su toratẹ̌ e kaiso i sire mangkewelain kạpahuntinamban dal᷊awang e ringangu němpẹ̌dosa su těngon Duata. Kaiso mangkeng kạpahuntinambane taumata němpẹ̌dosa, Ruata e mangkewelain limembong kakěndage, si sire.
21Ho! i kitẹ e harusẹ̌ mate ual᷊ingu i kitẹ e němpẹ̌dosa. Kai Mawu Ruata e kụkěndagi kitẹ dingangu nẹ̌gěllị u ral᷊eng si kitẹ tadeạu saụ mẹ̌sěngkapian Sie. Kụ ual᷊ingu pẹ̌kakauh'i kitẹ dingangu Mawu Ruata e seng saụ mapia, tangu i Sie mal᷊aing mangonggọu pẹ̌bawiahẹ̌ tutune ringangu kakalẹ̌ si kitẹ su ral᷊ung i Yesus Kristus, Mawung kitẹ.