Dual Panel1Ené iạ nakasilo bukẹ̌ madarul᷊ung sěngkal᷊ěpa su l᷊iman Sie kụ mạiang su kaderang kararatuange. Bukẹ̌ ene e napenẹ u wohẹ su ruamběka nịsasegelu segelẹ̌ pitumbaụ.
2Mase iạ e nakasilo malạekatẹ̌ sěngkatau matoghasẹ̌ kapělẹ̌luntingihe maihạ, "Kai i sai wotonge maměka manga segelẹ̌ ini ringangu měmingkahẹ̌ bukẹ̌ ini?"
3Kaiso baẹ su sorga ore lai su dunia e, arau manilaing su al᷊ungu dunia e, tawẹu sarang sěngkatau kụ makawingkahẹ̌ bukẹ̌ ini, ringangu makasilo sol᷊ong dal᷊unge.
4Tangu iạ e měngkatewe apa limungkang marehe batụu tawẹ u sarang sěngkatau relaing botonge mamingkahẹ̌ bukẹ̌ ene, ringangu makasilo sol᷊ong dal᷊unge.
5Mase sěngkatau wọu i sire měngangahạe nẹ̌bera si siạ, "Abe sangị! Kakělla! Singa wọu walag'i Yehuda, pal᷊ahěnton Daud masěllahẹ̌ e, seng nakawatạ. I sie wotonge měměka segelẹ̌ pitu e ringangu měmingkahẹ̌ bukẹ̌ ene."
6Bọu ene iạ e nakasilo Ahusu Domba sěmbaụ dụdarisị sutal᷊oarang kaderang kararatuange, lẹ̌liwungang u riadikang biahẹ̌ ěpạ e ringangu kěbị pangahạ ene. Ahusu Domba ene kakěllaěng al᷊ingkai kere seng bọu nipotọ. I Sie piạ sungene pitu ringangu matane pitu: kụ kai rohkẹ̌ arẹ̌gam pitu wọu Mawu Ruata kụ seng nirolohẹ̌ sol᷊ong kạguwạu dunia.
7Bọu ene Ahusu Domba ene e himaung, kụ něngal᷊ạ bukẹ̌ mạdarul᷊ung ene e wọu l᷊ima koanengu tau mạiang su kaderang kararatuange.
8Ene Ahusu Domba e kapẹ̌kẹ̌koạ e kerene tangu, riadikang biahẹ̌ ěpạ e ringangu manga měngangahạ e i sire ruam pul᷊o ěpạ e němpẹ̌těngkasumage su těngone. I sire nahiạeng kěcapi lẹ̌umbelekang e ringangu wohogẹ̌ bul᷊aeng lohone kamania kụ kai mangạ e kakal᷊iomaneng u kawanuan Duata e.
9I sire měmpẹ̌kẹ̌kantarị u kantarị buhu sěmbua: "I Kau e hinone makapěngal᷊ạ bukẹ̌ ene ringangu makapěměka manga segele. Batụu i Kau e kai seng nipate, ringangu kahiang kapapohongu'E, taumata wọu kěbị hěnto, wọu kěbị haghing bera, něgara ringangu wansa e, niwělliangu waug'u Ruata.
10I Kau e seng napakariadin sire sěmbaụ bansa pamamileěng manga imang, tadeạu i sire mẹ̌tangkiang Duatang kitẹ, dingangu mẹ̌parenta su wowon dunia e."
11Kutẹu iạ nakasilo kapia. Iạ nakaringihẹ̌ tingihu malạekatẹ̌ hiwune ringangu yutane kal᷊awọe. I sire mạhundarisị měmpělẹ̌liwung kaderang kararatuang dingangu riadikang biahẹ̌ ěpạ e ringangkewen manga měngangahạ e.
12Kụ i sire měmpẹ̌kẹ̌kantarị u tingih'i sire mal᷊aihạ, "Ahusu Domba kụ nạung seng nipotọ e, su hinone wue makatarimạ u kawasa, kakakalạ, kapelẹesa ringangu katoghasẹ̌ e; i Sie hinong adateng, bantughang dingangu hanesẹ̌ daloěng!"
13Mase iạ nakaringihẹ̌ patikụ diadikang su l᷊angị, su dunia, su al᷊ungu dunia ringangu su ral᷊ungu l᷊audẹ̌ -- nimbụ e patikụ diadikang su kaguwạu dunia ini e -- měkẹ̌kantarị, "I Sie kụ mạiang su kaderang kararatuange, ore Ahusu Domba e, kai kal᷊ahumpakengu raralo, ringangu adatẹ̌, dingangu kawawantugẹ̌ dingangu kawasa waugu sarang karěngụ e!"
14Tangu riadikang ěpạ e němpẹ̌simbahẹ̌, "Aming!" Kụ měngangahạ e mal᷊aing němpẹ̌těngkasumagẹ̌ němpẹ̌suba.