Dual Panel1Manga anạ u sěmbaụ apang kalạ! Pěmpẹ̌daringihẹ̌ko sasasaku. Pěmpahunsangị dingangu pěmpẹ̌kěndung u i kamene sarung makahombang sigěsạ!
2Kakakalạ i kamene seng nahenẹ. Pakeang i kamene seng nasueng kinạ e su uane.
3Bul᷊aeng dingangu sal᷊akang kamene seng natukusu taine; kụ taine tangu sarung makoạ sahidi rumokạ si kamene ringangu sarung kumaěng gẹ̌sing kamene kere putung. I kamene seng němpangěmmung arětạ su ěllo kasamuriange.
4I kamene tawe němpamaehẹ̌ sasewang mělahěnsinuang bael'i kamene. Kụ daringiheko rorong i sire! I sai-sain měmpạměnsạ bael'i kamene, měngkate ghụgahiorọ u mědẹ̌dorong tul᷊ung, kụ kakahiorọ i sire e seng nikaringihu Mawu Ruata Makawasa.
5I kamene seng němpẹ̌biahẹ̌ masorogạ, dingangu nakateěng kawawusang dunia ini. I kamene al᷊ingkai mětẹ̌těngkatawang batangeng měngẹ̌ngampal᷊ẹ̌ ěllong pamamotọ e.
6I kamene němpěhukung dingangu němpěmate taumata tawẹ sal᷊ane, kai i sire tawe rimokạ si kamene.
7Ual᷊ingu ene, pakakakědang manga anạ u sěmbaụku, sarang Mawu e ruměnta. Kakěllạ e kereapa kararage sěngkatau mělahěnsinuange mělẹ̌hědo sarang ěntanane měngonggọu ghẹ̌sine maarěga si sie. Kụ měngkai mararagẹ̌ i sie rụdal᷊ahědo tahiting musungu kalalolang dingangu tahiting musungu mẹ̌burạ.
8Kụ i kamene pakakakědangko l᷊ai ringangu pěmpanoghasẹ̌ko ral᷊ungu naung'i kamene, u ěllon darěntang Mawu e seng masandigẹ̌.
9Kumbahangbe měmpẹ̌kurubụ dingangu mětatatokeng sal᷊a, tadeạu i kamene tawe ihukungu Mawu Ruata. Pẹ̌tahěndung! Mělahukunge seng dụdarisị su těngon tukadẹ̌ kụ seng masarạ marěnta.
10Manga anạ u sěmbaụ, pẹ̌tahěndung manga nabi kụ měmpẹ̌bẹ̌bisara ringangu arengu Mawu. I sire kai mararagẹ̌ dingangu makakědang su sigěsạ. Kụ pěngal᷊ạko si sire makoạ pẹ̌tatěnoěng.
11I sire isěsẹ̌bạ maral᷊unsemahẹ̌ batụu i sire makakědang. I kamene seng nakaringihẹ̌ kereapa kasabare i Ayub, dingangu i kamene masingkạ u kereapa wue Mawu e kụ pangěnsueěnge něngal᷊amatẹ̌be si sie. Batụu Mawu e měngkai matal᷊ěntụ dingangu kerẹeng kapiane naung'E.
12Limembong kasariaěnge ute kai: Kumbahang mẹ̌salu, waẹbe maněbọ l᷊angị, arau l᷊ai maněbọ ěntana, arau walạewe mẹ̌salun sasalu wal᷊ine. Měngkate pẹ̌bera u "Ore" kereu timonan'u e kerene wue, ringangu "Tala" kereu timonan'u e wal᷊inewe kerene; tadeạu i kamene e kumbahang kaěnsakeng u hukumang kahian Duata.
13Kereu sutal᷊oarang kamene piạ u lụl᷊ahunsusa, ute mapiawe i sie pẹ̌kal᷊iomaneng. Kereu piạ u lụl᷊uasẹ̌ e, ute mapiawe i sie pẹ̌kantarị pẹ̌dalo Ruata.
14Kereu piạ u masakị, ute mapiawe i sie pẹ̌kui manga těmbonang u jamaatẹ̌. Dingangu kěnangko manga těmbonange ene mẹ̌kal᷊iomaneng i saing masakị ene ringangu měmuhang lana ringangu arengu Mawu.
15Kakal᷊iomaneng iwẹ̌bunạ su Mawu ringangu pangangimang matoghasẹ̌ e, sarung makakaul᷊e masasakị, dingangu mangampungbe patikụ dosa kinoạ e.
16Ual᷊ingu ene, pěmpẹ̌papangakungkong pẹ̌sasal᷊a lawọ i kamene, ringangu pěmpẹ̌kakal᷊iomaneng lawọ i kamene, tadeạu i kamene ipakaul᷊e wọu kasasakị. Kakal᷊iomaneng i sain tụtuhụ kapulun Duata e, mambeng masaria kawasane.
17I Elia, mal᷊aing taumata mẹ̌sul᷊ung i kitẹ. I sie měkẹ̌kal᷊iomanembeng kasěllahu ral᷊ungu naunge tadeạu tawe rumasehẹ̌ e, tangu tawe rimasehẹ̌ gěnnangu těllu taung ěnnungu wul᷊ang.
18Mase i sie nẹ̌saụ e nẹ̌kal᷊iomaneng tangu langị e naparaseheng tahiti hakịu ěntana e nẹ̌gěllịeng lai ghěsine.
19Manga anạ u sěmbaụku! Kereu wọu i kamene piạu sěmbaụ kụ semben tawe tumatol᷊e lai těntirong Duata, bọu ene sěngkatau lai wal᷊ine napẹ̌bal᷊ị u tau ene kạpia e su Mawu Ruata,
20pẹ̌tahěndungko ayetẹ̌ ini: Taumata apang nakapamal᷊ị u taumata waradosa wọu ral᷊enge nẹ̌sal᷊a e, taumata ene napakasal᷊amatu diwang tau waradosa e wọu papate ringangu makạkaual᷊i rosang taumata lawọ e gěllirambeng kal᷊aampung. Adat'i kami, Yakobus