Dual Panel1Nah, mengenai diriqte mẽsaq, lẽq sekiterte araq luwẽq gati saksi! Keranaq nike, silaq ite tetẽh selapuq saq nyusahang ite dait dose saq halangin ite. Dait tekun pelai lẽq dalem perlombaan saq tewajibang umaq ite.
2Silaq ite laksaneang nike siq perhatiante cume tetujuang tipaq Deside Isa Almasih, sẽngaq Ie saq mimpin ite lẽq dalem iman, dait saq jauq imante nike tipaq kesempurnean. Deside Isa tahen menderite lẽq kayuq salib! Ie nẽnten peduli bahwe ninggal lẽq kayuq salib nike sopoq hal saq merilaq. Deside Isa cume iling lẽq sukecite saq gen Ie terimaq ẽraq. Mangkin Ie melinggih lẽq sedi kanan tahte Allah.
3Pade inget lẽq Ie saq tekun nanggung penganiayean saq luar biase tipaq diriq-Ne lẽman pihak dengan-dengan bedose, adẽq side ndaq jari lemah dait putus ase.
4Sẽngaq lẽq dalem perjuangande ngelawan dose, side pade ndẽq uwah bejuang jangke harus numpahang daraq.
5Dait ndaq side lupaqang nasẽhat Allah niki, saq teicanin lẽq side jari bije-bije dowẽn Allah: "Bije-bije dowẽn Tiang, perhatiang solah-solah didikan Tuhan, dait ndaq putus ase lamun Ie peringet side.
6Sẽngaq Tuhan ngempuk sebilang dengan saq Ie kasihin, dait Ie gen didik sebilang dengan saq teakuq jari bije-bije dowẽ-Ne."
7Side pade harus nerimaq didikan lẽman Allah jari sopoq perajahan lẽman sopoq amaq. Sẽngaq napi araq sopoq kanak saq ndẽq uwah tempuk siq amaqne?
8Lamun side pade ndẽq milu tehukum maraq selapuq bijene saq lain niki artine side pade ndẽqne bije saq sah, laguq bije saq ndẽq sah.
9Ite bedowẽ amaq lẽq dunie. Ie ngajah ite, dait ite hormat lẽq ie. Lamun maraq nike, lebih-lebih Bapa selapuq roh, pasti ite harus lebihan malik taat lẽq Ie adẽq ite bedowẽ idup.
10Dengan toaqte saq lẽq dunie didik ite cume lẽq waktu saq araq batesne, menurut napi saq ie pade anggep solah. Laguq Allah didik ite jari kesolahante mẽsaq, adẽq ite mauq bagian lẽq dalem kesucian-Ne.
11Mule lẽq waktu ite tedidik ndẽqne miaq angente seneng, laguq cume miaq ite sedih doang. Laguq sesampun nike ngasilang kebenaran saq ngicanin damẽ lẽq ie pade saq tedidik.
12Keranaq nike, kuatang imende saq lemah dait jengkunde saq ngijik nike!
13Side harus tetep lampaq lẽq langan saq rate, adẽq naẽnde saq dẽmpang ndẽqne kedesor, laguq malahan jari selah.
14Pade berusahe idup rukun kance selapuq dengan. Pade berusahe ẽndah jari idup suci. Sẽngaq ndẽq araq sopoq dengan juaq bau serioq Tuhan lamun ie ndẽq idup maraq nike.
15Jagaq adẽq ndaq araq sopoq dengan juaq saq jaoqang diriqne lẽman rahmat Allah, adẽq ndaq jangke araq saq jari maraq taletan beracun lẽq tengaq-tengaq side pade sehingge nimbulang kesulitan dait nyẽdaq luwẽq dengan siq racunne.
16Jagaq adẽq ndaq jangke araq dengan saq gawẽq perbuatan saq cabul atao bedowẽ napsu saq rendah maraq Esau, saq jual hakne sebagẽ bije saq sengake, cume jari sepiring keloran.
17Sẽngaq side pade nenaoq, bahwe sesampun nike, sewaktu ie gen nerimaq berkah nike ie tetolaq, sẽngaq ie ndẽq mauq kesempatan jari pesolah kesalaqanne, timaq ie boyaq jangke nangis.
18Sẽngaq side pade ndẽq dateng tipaq gunung saq bau tekintur dait api saq begelaur, tipaq taoq saq peteng dedet, dait angin pusut;
19tipaq suare terompẽt, dait tipaq suare saq miaq ie pade saq dengah suare nike nunas, adẽq ndaq malik ngeraos kance ie pade.
20Sẽngaq ie pade ndẽq tahen dengah prẽntah saq tesampẽang siq suare nike. Sẽngaq suare nike bebase, "Selapuq saq kintur gunung niki, ndẽqne peduli binatang atao sai juaq, harus tepelẽwas kadu batu jangke matẽ."
21Luar biase gati napi saq teserioq siq dengan-dengan Israel nike jangke Musa bebase, "Tiang takut gati dait ngijik!"
22Sebalikne, side pade sampun dateng ojok bukit Sion dait kote Allah saq idup, nike Yerusalem saq lẽq sorge kance beiyu-iyu malaẽkatne.
23Side pade turut sopoq kumpulan saq meriah -- dait tipaq bije-bije saq sengake, saq aran-aranne tecatet lẽq sorge. Side pade parek tipaq Allah, Hakim selapuq umat manusie. Side pade hadepin roh-roh dengan saq kenaq, saq sampun tejariang sempurne.
24Side pade parek tipaq Deside Isa, Perantare lẽq perjanjian saq baru nike; side pade ngadepin ketisan daraq saq besuare kuatan lẽman daraq Habil.
25Keranaq nike, onyaq-onyaq ndaq jangke side ndẽq mẽlẽ dengahang Ie saq bemanik nike. Ie pade saq ndẽq mẽlẽ dengah Ie saq rauh ojok gumi dait nyampẽang Manik Allah, ndẽqne bau pelai. Lebih-lebih ite niki saq dengahang Ie saq bemanik lẽman sorge! Lamun ite ndẽq mẽlẽ dengahang Ie, ndẽq mungkin ite bau selamet!
26Lẽq waktu nike suare-Ne miaq gumi jari inggur. Laguq mangkin Ie bejanji, "Karing sekali, Tiang gen piaq inggur ndẽqne cume gumi, laguq langit ẽndah."
27Manik-Ne "karing sekali" nyatayang bahwe seantẽro dunie saq sampun tecipteang gen tepiaq inggur dait tesingkirang, adẽq saq masih cume saq ndẽq bau tepiaq inggur.
28Keranaq nike, ite harus ngucap syukur lẽq Allah, sẽngaq ite nerimaq lẽman Ie sopoq kerajaan saq ndẽq bau teguncang. Ite patut besyukur dait beribadah tipaq Allah siq rase hormat dait takut, maraq care saq tekayunang siq Allah.
29Sẽngaq Allahte maraq api saq ngotongang.