Dual Panel1Keranaq nike ite harus sayan pacu-pacu merhatiang pengajahan-pengajahan saq sampun ite dengah, adẽq ite ndaq jangke bilin pengajahan-pengajahan nike.
2Manik Allah saq tesampẽang langan pare malaẽkat tipaq leluhurte ternyate kenaq, dait dengan saq ndẽq turut atao ndẽq taat nerimaq hukuman saq setimpal.
3Berembẽ ite gen lepasang diriq, lamun ite ndẽq merhatiang keselametan saq belẽq nike? Penembẽqne, keselametan nike teberiteang siq Tuhan, terus teteguqang umaq ite siq ie pade saq sampun dengah lẽman Ie.
4Allah sampun neguqang kesaksian dengan-dengan nike siq ngaraqang macem-macem tande dait muqjizat serte paice lẽman Roh Allah saq tebagi-bagiang menurut pekayunan-Ne mẽsaq.
5Sẽngaq ndẽqne tipaq malaẽkat-malaẽkat Allah naklukang dunie saq gen dateng, saq kenyekente raosang niki.
6Sebalikne, araq sopoq kesaksian saq tetulis maraq niki, "Napi manusie nike, Ya Allah, sehingge Deside ilingang ie? Atao bije manusie sehingge Deside merhatiang ie?
7Lẽq waktu saq singket Deside jariang ie bawaqan sekediq lẽman malaẽkat. Deside ngicanin ie mahkote kemuliean dait hormat.
8Selapuq-lapuqne sampun Deside taklukang lẽq ie." Sẽngaq siq naklukang selapuq hal tipaq Ie, nẽnten araq sopoq hal saq Ie kecualiang, saq nẽnten takluk lẽq Ie. Laguq mangkin niki ndẽqman ite serioq, bahwe selapuq hal sampun tetaklukang lẽq Ie.
9Laguq ite serioq bahwe Ie, Deside Isa, dalem waktu saq singket sampun tepiaq bawaqan lẽman malaẽkat, dait Ie sampun teicanin mahkote kemuliean dait hormat sẽngaq sengsare ninggal-Ne nike, adẽq siq rahmat Allah Ie ngalamin maut demi selapuq manusie.
10Mule sampun sepatutne Allah -- lantaran Ie dait siq Ie selapuq-lapuqne sampun tecipteang -- nike Allah saq gadingang luwẽq dengan tipaq kemuliean, nyempurneang ẽndah Deside Isa, saq mimpin ie pade tipaq keselametan, siq penderitean.
11Sẽngaq Ie saq nyuciang manusie dait ie pade saq tesuciang, ie pade selapuq asalne lẽman saq Sopoq; keranaq nike Ie nẽnten ilaq akuq ie pade jari sanak-sanak-Ne.
12Manik-Ne, "Tiang gen beriteang lẽq sanak-sanak Tiang mengenai Deside. Tiang gen memuji Deside lẽq tengaq-tengaq jemaah."
13Deside Isa bemanik ẽndah, "Tiang gen beharep lẽq Allah." Dait Ie bemanik ẽndah, "Niki Tiang, bareng kance bije-bije saq sampun teicanin siq Allah tipaq Tiang."
14Sẽngaq dengan-dengan saq Ie sebut bije, nike mahluk manusie saq bau ninggal, make Deside Isa mẽsaq jari pade kance ie pade dait idup dalem keadaan manusie. Hal nike Ie piaq, adẽq siq ninggal-Ne Ie bau binaseang Belis saq nguasein kematẽan.
15Siq care nike Ie bẽbasang dengan-dengan saq seumur idup tejariang panjak lantaran takut lẽq kematẽan.
16Sampun nyate bahwe ndẽqne malaẽkat saq Ie tulung, laguq keturunan Ibrahim.
17Nike artine bahwe Ie harus jari pade kance sanak-sanak-Ne lẽq dalem selapuq-lapuqne. Dait siq care nike Ie bau jari Imam Agung saq bedowẽ belas kasihan dait setie tipaq Allah. Siq pelayanan-Ne nike dose manusie bau teampunin.
18Dait lantaran Ie mẽsaq sampun menderite dait tecobe, Ie bau nulung dengan-dengan saq mauq cobe, sẽngaq Ie mẽsaq sampun tecobe dait menderite.