Dual Panel1Keranaq nike, semeton-semeton saq suci, saq nerimaq bagian lẽman Allah saq sampun ngemanikang lẽman sorge, side pade harus merhatiang Rasul dait Imam Agung saq sampun ite percaye, nike Deside Isa.
2Ie setie lẽq Allah saq sampun milẽq Ie lẽq karye nike, pade maraq Musa laẽq setie ngelaksaneang tugasne lẽq Gedẽng Allah.
3Laguq Deside Isa patut nerimaq penghormatan saq belẽqan lẽman Musa. Sẽngaq dengan saq piaq balẽ harus lebih tehormatin tebanding balẽ nike mẽsaq.
4Mule sebilang balẽ araq saq miaq, laguq saq miaq selapuq-lapuqne nike Allah mẽsaq.
5Musa setie jari pelayan lẽq dalem gedẽng Allah jari ngebẽng kesaksian mengenai napi saq gen teberiteang lẽq jaman saq gen dateng.
6Laguq Almasih setie sebagẽ Bije saq asalne lẽman Allah saq betanggung jawab lẽq gedẽng Allah. Dait ite niki gedẽng Allah, lamun ite tetep besemanget dait tetep yakin jari mauq napi saq ite harepang.
7Keranaq nike, maraq manik Roh Allah, "Lamun lẽq jelo niki side dengahang Manik Allah,
8ndaq side pagah maraq leluhurde, sewaktu ie pade ngelawan Allah, dait nguji Allah lẽq padang gurun.
9'Lẽq derike leluhurde cobe Tiang dait nguji Tiang,' Manik Allah, 'Padahal ie pade sampun serioq karye Tiang petang dase taun ngonẽqne.'
10Keranaq nike Tiang menggah lẽq ie pade dait Tiang bemanik, 'Atẽ ie pade tetep sesat, ie pade ndẽq mẽlẽ taat lẽq prẽntah-prẽntah Tiang.'
11Tiang menggah dait besumpah, 'Ie pade ndẽq gen tame ojok negeri nike jari mauq mentelah bareng kance Tiang.'"
12Semeton senamian, onyaq-onyaq ndaq jangke araq sopoq dengan juaq lẽq antare side bedowẽ angen saq jahat dait ndẽq percaye, sehingge ie murtat lẽman Allah saq idup!
13Jari, adẽq ndẽq araq sopoq dengan juaq lẽq antare side saq pagah lantaran tipu muslihat dose sehingge nentang Allah, side pade harus saling nasẽhatin sebilang jelo sengonẽq masih tesebut "Jelo Niki".
14Ite selapuq sampun mauq bagian lẽq dalem Almasih lamun ite tetep percaye lẽq pengharepante saq penembẽq jangke penutuqne.
15Araq tetulis, "Lamun lẽq jelo niki side dengahang Manik Allah, ndaq side pagah maraq sewaktu ngelawan Allah."
16Sai dengan-dengan saq dengah Manik Allah terus ngelawan Ie? Tekan ie pade saq tepimpin siq Musa sugul lẽman Mesir?
17Dait tipaq sai Allah murke petang dase taun ngonẽqne? Tekan tipaq ie pade saq bedose, dait saq ninggal lẽq padang gurun?
18Tipaq sai Allah sampun besumpah bahwe ie pade ndẽq gen tame ojok taoq-Ne mentelah, selain tipaq ie pade saq ndẽq taat nike?
19Jari, sampun jelas lẽq ite, bahwe ie pade ndẽq bau tame sẽngaq ie pade ndẽq percaye.