Markus 14 (SASAK)

1Due jelo sendẽqman Jelo Paskah dait Perayaan Ruti Ndẽq Beragi. Imam-imam kepale dait ahli-ahli Taurat kenyeke boyaq langan jari bau Deside Isa secare tedoq-tedoq dait nyematẽq Ie.

2Ie pade bebase, "Ndaq laksaneang hal nike waktu dengan-dengan kenyeke ngerayeang Paskah, adẽq rakyat ndẽq jari biur lantur."

3Sewaktu Deside Isa araq lẽq Betania, lẽq gedẽng Simon saq piranan sakit kuste, araq sopoq dengan nine parek tipaq Deside Isa. Ie jauq sopoq botol pualam berisi minyak sengẽh saq mahel, tepiaq lẽman ramuan akah saq sengẽh. Sewaktu Deside Isa kenyeke melinggih medaran, dengan nine nike belaqang botol nike dait tumpahangne minyak sengẽh nike lẽq sirah Deside Isa.

4Pire dengan saq araq lẽq derike jari sili dait bebase sopoq kance saq lain, "Napi manpaatne minyak sengẽh nike tesẽdaq-ẽdaq?

5Minyak nike bau tejual siq aji lebih lẽman telu ratus kẽpẽng perak, dait kẽpẽngne tesedekahang tipaq dengan miskin!" Make ie pade sili lẽq dengan nine nike.

6Laguq Deside Isa bemanik, "Alurang ie! Kembẽq side pade nyusahang ie? Ie ngelaksaneang hal saq solah tipaq Tiang.

7Dengan miskin tetep araq lẽq antare side pade. Sebilang waktu lamun side pade mẽlẽ, side pade bau nulung ie pade. Laguq Tiang ndẽq seterusne araq bareng kance side pade.

8Dengan nine niki sampun ngelaksaneang napi saq bau ie laksaneang. Awak Tiang sampun ie minyakin sebagẽ persiepan jari pemakaman Tiang.

9Tiang badaq side: Setetune lẽq seantẽro dunie, lẽq mbẽ juaq Kabar Solah lẽman Allah tesiarang, perbuatan dengan nine niki gen teceriteang ẽndah jari nginget ie."

10Beterus Yudas Iskariot, salaq sopoq lẽman kedue olas pengiring Deside Isa, lumbar ojok imam-imam kepale siq maksut jari nyerahang Deside Isa tipaq ie pade.

11Ie pade seneng gati pireng maksut nike, dait bejanji gen ngebẽng Yudas kẽpẽng. Sesampun nike Yudas mulai boyaq kesempatan jari behianat lẽq Deside Isa.

12Lẽq jelo penembẽq Perayaan Ruti Ndẽq Beragi -- lẽq waktu dengan sembelẽh dombe Paskah -- pengiring-pengiring Deside Isa metakẽn lẽq Ie, "Junjungan Saq Mulie, lẽq mbẽ Pelungguh kayun adẽq tiang pade siepang Pelungguh keloran Paskah?"

13Make Deside Isa ngemanikang due dengan lẽman ie pade, "Silaq lumbar ojok kote, lẽq derike araq sopoq dengan mame saq kenyeke jauq cẽrẽt berisi aiq gen bedait kance side pade. Turut ie

14ojok balẽ saq ie tamein, dait badaq ẽpẽn balẽ nike, 'Manik Guru tiang, lẽq mbẽ Ie dait pengiring-pengiring-Ne gen medaran keloran Paskah?'

15Dengan nike gen petitoq side sopoq kamar belẽq saq araq lẽq atas. Kamar nike sampun tesiepang lengkap kance perabotanne. Siepang ite selapuqne lẽq derike."

16Terus kedue pengiring Deside Isa nike lumbar ojok kote. Lẽq derike ie pade ndait selapuqne tepat maraq saq temanikang siq Deside Isa. Beterus ie pade nyiepang keloran Paskah.

17Kelemne, Deside Isa rauh teiring kedue olas pengiring-Ne.

18Sewaktu ie pade kenyeke melinggih medaran, Deside Isa bemanik, "Tiang badaq side: Setetune salaq sopoq lẽq antare side pade, saq mangkin niki milu medaran kance Tiang, gen behianat lẽq Tiang."

19Sesampun dengah hal nike pengiring-pengiring Deside Isa jari asẽq gati. Terus sopoq-sopoq mulai metakẽn lẽq Deside Isa, "Junjungan Saq Mulie, pasti ndẽqne tiang saq temaksut nike?"

20Jawab Deside Isa, "Ie salaq sopoq lẽman side pade saq due olas niki, saq medaran sepiring kance Tiang.

21Mule Bije Manusie gen ninggal maraq saq tetulis lẽq Kitab Suci. Laguq celake gati dengan saq behianat lẽq Bije Manusie nike! Solahan lamun dengan nike ndẽq tebijeang!"

22Sewaktu Deside Isa dait pengiring-pengiring-Ne kenyeke medaran, Deside Isa bait ruti, terus ngucapang do'e syukur. Beterus Ie peleng-peleng ruti nike kadu gading-Ne, terus ngicanin tipaq pengiring-pengiring-Ne, sambil bemanik, "Silaq bait, niki ragen Tiang."

23Sesampun nike Deside Isa bait sopoq cawan saq berisi anggur. Ie ngucapang do'e syukur tipaq Allah, terus ngicanin cawan nike lẽq pengiring-pengiring-Ne. Beterus ie pade selapuq nginem anggur nike.

24Sesampun nike, Deside Isa bemanik, "Niki daraq Tiang saq ngesahang perjanjian Allah, daraq saq tetumpahang tipaq dengan luwẽq.

25Tiang badaq side, setetune Tiang ndẽq gen nginem anggur niki malik, jangke dateng waktune Tiang nginem anggur saq baru bareng kance side pade lẽq Kerajaan Allah."

26Beterus ie pade nyanyiang lagu pujian. Dait sesampun nike ie pade lumbar ojok Bukit Zaitun.

27Beterus Deside Isa bemanik lẽq ie pade, "Side selapuq gen pelai bilin Tiang. Sẽngaq dalem Kitab Suci tetulis, 'Tiang gen nyematẽq pengaratne, dait selapuq dombe-dombene gen bekelin sopoq kance saq lain.'

28Laguq sesampun Tiang idup malik, Tiang gen senjuluq side pade ojok Galilea."

29"Nẽnten," jawab Petrus, "timaq ie pade selapuq bilin Pelungguh, tiang nẽnten."

30Manik Deside Isa lẽq ie, "Tiang badaq side, setetune kelem niki ẽndah, sendẽqman manuk ngungkung due kali, side sampun telu kali nilas Tiang."

31Jawab Petrus secare teges, "Timaq tiang harus matẽ bareng kance Pelungguh, tiang nẽnten gen nilas Pelungguh!" Dait pengiring-pengiring saq lain ẽndah matur maraq nike.

32Ie pade rauh lẽq sopoq taoq aranne Getsemani, dait Deside Isa bemanik lẽq pengiring-pengiring-Ne, "Tokol lẽq deriki, sewaktu Tiang bedo'e."

33Beterus Deside Isa tẽnaq Petrus, Yakub dait Yahya lumbar bareng kance Ie. Deside Isa takut gati dait osah.

34Deside Isa bemanik lẽq pengiring-pengiring-Ne nike, "Angen Tiang sedih gati, idapne maraq gen matẽ doang. Ndot lẽq deriki dait bejage-jage!"

35Deside Isa lumbar jaoqan sekediq, beterus sujut lẽq tanaq dait bedo'e. Lẽq dalem do'e-Ne, Ie tunas lamun bau Ie sampunang ngalamin waktu penderitean nike.

36Ie matur, "Bapa, ya Bapa, nẽnten araq sopoq hal saq mustahil bagi Deside. Jaoqang cawan penderitean niki lẽman Tiang. Laguq sampunang menurut kemẽlẽq Tiang, laguq pekayunan Bapa."

37Sesampun nike, Deside Isa tulak dait-Ne pengiring-pengiring-Ne kenyeke tindoq. Ie bemanik lẽq Petrus, "Simon, napi side tindoq? Cume sejam doang, side ndẽq sanggup bejage-jage?"

38Terus Deside Isa bemanik lẽq ie pade, "Bejage-jage, dait bedo'e, adẽq side pade ndẽq ngalamin cobe. Mule roh side mẽlẽ ngelaksaneang saq kenaq, laguq side pade ndẽq sanggup sẽngaq awakde nike lemah."

39Karing sekali Deside Isa lumbar bedo'e, ngucapang do'e saq pade.

40Sesampun nike Ie tulak malik tipaq pengiring-pengiring-Ne, dait-Ne ie pade masih tindoq, sẽngaq ie pade ngantok gati. Jari ie pade ndẽq nenaoq napi saq harus ie pade sampẽang tipaq Deside Isa.

41Sewaktu Deside Isa tulak tipaq ie pade saq ketelu kaline, Ie bemanik, "Napi side pade masih tindoq dait mentelah? Sampun cukup! Sampun waktune Bije Manusie teserahang ojok ime dengan-dengan bedose.

42Pade ures! Silaq ite lumbar. Serioq! Dengan saq behianat lẽq Tiang sampun dateng!"

43Sewaktu Deside Isa masih bebaos, Yudas salaq sopoq lẽman kedue olas pengiring-Ne nike dateng. Bareng kance ie dateng ẽndah luwẽq dengan saq jauq klẽwang dait gegitik. Ie pade tesuruq siq imam-imam kepale, ahli-ahli Taurat dait pemimpin-pemimpin Yahudi.

44Penghianat nike sendẽqmanne sampun badaq tande niki tipaq ie pade, "Dengan saq tiang siduk, Ie uwah denganne. Bau dait onyaq-onyaq jauq Ie."

45Lẽq waktu Yudas dateng, ie langsung ojok Deside Isa, dait matur, "Bapaq Guru!" terus ie siduk Deside Isa.

46Beterus dengan-dengan saq dateng bareng kance Yudas nike bau Deside Isa dait sẽkoq Ie.

47Laguq salaq sopoq dengan saq araq lẽq derike serẽt klẽwangne, dait ngerantek pelayan Imam Agung jangke pegat kentokne.

48Beterus Deside Isa bemanik tipaq ie pade, "Napi Tiang niki perampok, jangke side pade dateng jauq klẽwang dait gegitik jari bau Tiang?

49Sebilang jelo Tiang ngajahang lẽq Gedẽng Allah lẽq julu side pade dait side pade ndẽq bau Tiang. Laguq mule seharusne maraq nike adẽqne telaksane napi saq tetulis dalem Kitab Suci."

50Beterus selapuq pengiring-Ne pelai bilin Ie.

51Sopoq terune saq cume ngadu kẽrẽng lẽnen jari ngilipang awakne, ngiring Deside Isa. Dengan-dengan mẽlẽ bau ie,

52laguq ie lekaq kẽrẽngne nike terus pelai belondan.

53Deside Isa tejauq ojok gedẽng Imam Agung. Lẽq derike selapuq imam kepale, pemimpin Yahudi dait ahli Taurat kenyeke bekumpul.

54Petrus ngiring Deside Isa lẽman jaoq jangke tame ojok dalem lelẽah gedẽng Imam Agung. Lẽq derike ie tokol sambil mindu dẽkẽt api bareng kance pengawal-pengawal.

55Imam-imam kepale dait selapuq Mahkamah Agame berusahe boyaq bukti-bukti saq nyalahang Deside Isa adẽqne bau mutusang hukuman matẽ tipaq Ie. Laguq ie pade ndẽq mauq bukti.

56Luwẽq saksi saq tempoh jari ngebẽng kesaksian palsu tipaq Deside Isa, laguq kesaksianne betentangan sopoq kance saq lain.

57Beterus araq pire saksi nganjeng dait ngebẽng kesaksian palsu niki mengenai Deside Isa,

58"Tiang pade dengah dengan niki bebase, 'Tiang gen ngerobohang Gedẽng Allah niki saq tepiaq siq manusie, terus dalem telu jelo, Tiang gen penganjeng saq lain saq ndẽq tepiaq siq manusie.'"

59Laguq kesaksian dengan-dengan nike ẽndah betentangan sopoq kance saq lain.

60Beterus Imam Agung nganjeng lẽq julu ie pade selapuq dait metakẽn lẽq Deside Isa, "Pelungguh kayun jawab napi saq tetuduhang nike atao nẽnten?"

61Laguq Deside Isa meneng doang. Ie nẽnten bejawab same sekali. Beterus karing sekali Imam Agung nike metakẽn lẽq Ie, "Napi Pelungguh Almasih, Bije saq asalne lẽman Saq Maheagung nike?"

62Jawab Deside Isa, "Tiang niki Ie, dait selapuq side pade gen serioq Bije Manusie melinggih lẽq sedi kanan Allah Saq Mahekuase dait rauh dalem awan lẽman langit!"

63Sesampun nike Imam Agung ngeroẽk-roẽk kuacene, dait bebase, "Ndẽq perlu saksi malik!

64Side pade sampun dengah mẽsaq ucapan-ucapan-Ne saq menghine Allah. Mangkin napi keputusande?" Ie pade selapuq mutusang Deside Isa patut tehukum matẽ.

65Beterus pire dengan mulai tijuh Deside Isa, dait ie pade tungkem penjarupan-Ne dait ngempuk Ie, terus bebase, "Cobaq badẽq, sai saq ngempuk Side?" Pengawal-pengawal ẽndah milu ngempuk Deside Isa.

66Sewaktu Petrus masih araq lẽq lelẽah, salaq sopoq pelayan nine Imam Agung dateng ojok derike.

67Waktu ie serioq Petrus mindu lẽq dẽkẽt api, ie perhatiang pacu-pacu muen Petrus, dait bebase, "Ndẽq napi side ẽndah bareng-bareng kance Deside Isa dengan Nazaret nike?"

68Laguq Petrus nilas. "Mindah tiang dait tiang ndẽq ngerti napi maksut side," basen Petrus lẽq pelayan nike. Beterus Petrus lumbar ojok jebak gedẽng imam agung nike. [Lẽq waktu nike, manuk ngungkung.]

69Pelayan nine nike serioq Petrus malik, dait bebase ẽndah tipaq dengan-dengan lẽq derike, "Ie mule salaq sopoq lẽman ie pade!"

70Laguq Petrus nilas malik. Ndẽq ngonẽq sesampun nike, dengan-dengan lẽq derike bebase ẽndah tipaq Petrus, "Ndẽq bau tetilas malik side mule salaq sopoq dengan lẽman ie pade, sẽngaq side lẽman Galilea!"

71Beterus Petrus mulai besumpah-sumpah, dait bebase, "Tiang ndẽq kenal dengan saq side pade maksut nike!"

72Waktu nike ẽndah manuk ngungkung saq kedue kaline. Dait Petrus inget bahwe Deside Isa sampun bemanik lẽq ie, "Sendẽqman manuk ngungkung due kali, side telu kali nilas Tiang." Beterus Petrus nangis ẽroq asẽq.

<< Markus 14 >>