Alkitab Mobile SABDA
[VER] : [SIMALUNGUN]     [PL]  [PB] 
 <<  1 Raja-raja 12 >> 

Bolah Dua Harajaon ai

1Laho ma si Rehabeam hu Sikem, ai domma roh ganup halak Israel hu Sikem laho manrajahonsi.

2Dob ibogei si Jerobeam, anak ni si Nebat, barita ai (ai i tanoh Masir ope ia, ai hujai do ia maporus marhalanihon ni si Salomo), jadi mulak ma ia hun tanoh Masir.

3Ai domma isuruh sidea hinan na mangalopsi, jadi roh ma si Jerobeam pakon ganup tumpuan ni halak Israel, nini sidea ma hu bani si Rehabeam,

4“Borat do pasangannami ibahen bapanta ondi. On pe pahampung ham ma rodi, na pinaporsankon ni bapanta ondi pakon pasangan na borat, na tinampeihonni bennami, ase ibalosi hanami ham.”

5Nini ma hu bani sidea, “Mulak bei ma lobei nasiam, dob ai tolu ari nari roh ma nasiam hu bangku.” Jadi laho ma bangsa ai.

6Jadi ipanriahkon Raja Rehabeam ma partua-partua, hasoman sapanriah ni Raja Salomo, bapani ondi, sanggah manggoluh ia, nini ma, “Naha do balosku nini uhur nasiam bani bangsa on?”

7Nini sidea ma mambalosisi, “Anggo ra ham martoruh ni uhur sadari on hu bani bangsa on, anjaha itangihon ham sidea, anjaha marsahap na lamlam laho mambalosi sidea, jadi ra ma sidea mambalosi ham tongtong.”

8Tapi iambukkon raja ai do pingkiran, na hinatahon ni partua-partua ai bani, jadi manriah ma ia pakon halak siposonan, hasomanni magodang, na marhorja i lobeini.

9Nini ma hu bani sidea, “Sonaha do balos iahap nasiam hu bani bangsa on, na mangkatahon hu bangku sonon, ʻSai pahampung ham ma pasangan, na pinaporsankon ni bapanta ondi bennami?ʼ”

10Jadi nini halak na maposo, na rapkonsi magodang ai ma hu bani, “Maningon sonon do hatahononmu hu bani bangsa on, na mangkatahon bamu, ʻBorat do pasangannami ibahen bapanta ondi, tapi anggo ham pahampung ham ma ai,ʼ sonon ma hatahon ham hu bani sidea, ʻBanggalan do didihilhu hun bani hae-hae ni bapa.ʼ

11On pe, borat pe pasangan, na pinaporsankon ni bapa ondi bani nasiam, tapi anggo ahu paboratonku ope pasangan nasiam ai; anggo bapa ondi lonsing-lonsing do ibahen mangajari nasiam, tapi anggo ahu gansip golang do bahenonku mangajari nasiam.”

12Jadi patoluarihon roh ma si Jerobeam pakon ganup bangsa ai marayak si Rehabeam, songon na dob pinadankon ni raja ai, “Roh ma nasiam hu bangku use patoluarihon.”

13Koras do balos ni raja ai bani bangsa ai, ai iambukkon do pingkiran, na binere ni partua-partua ai bani.

14Jadi nini raja ai ma hu bani sidea romban hu bani pangajari ni halak na maposo ai, “Borat pe pasangan, na pinaporsankon ni bapa ondi bani nasiam, ia bapa, lonsing-lonsing do ibahen mangajari nasiam, tapi boratan ope pasangan, na sihol paporsanonku bani nasiam; tapi anggo ahu gansip golang do bahenonku mangajari nasiam.”

15Ase seng ibalosi raja ai pangindoan ni bangsa ai, ai Jahowa do na mangaturhon ai, ase saud hata-Ni, na dob nilumbahon ni Jahowa hinan marhitei si Ahia na hun Silo hu bani si Jerobeam, anak ni si Nebat ai.

16Jadi dob iidah ganup halak Israel, na so itangihon raja ai pangindoan ni sidea ai, nini sidea mambalosi raja ai, “Aha ma parbagiananta bani si Daud? Seng dong siteanonta hun bani anak ni si Isai. Mulak bei ma hu rumahni, o Israel! Rumahmu ma pasari-sari, Daud!” Jadi mulak bei ma halak Israel hu rumahni bei.

17Tapi si Rehabeam do na manrajai halak Israel, na marianan i huta-huta ni Juda.

18Dob ai isuruh Raja Rehabeam ma si Adoram, kopala ni sipanrodi, hape ipargijig ganup halak Israel ma ia bani batu pala matei. Jadi tarolos ma Raja Rehabeam manaik hu garetani laho maporus hu Jerusalem.

19Jadi marbalik ma halak Israel hun bani ginompar ni si Daud ronsi sadari on.

20Jadi dob tarbogei hu bani ganup halak Israel, na dob mulak si Jerobeam, isuruh sidea ma suruhanni mangalopsi hu tumpuan ai, ipabangkit sidea ma ia gabe raja manggomgom ganup Israel. Seng dong na mangirikkon ginompar ni si Daud, sobali marga Juda tumang.

21Dob das si Rehabeam i Jerusalem, ipatumpu ma ganup ginompar ni Juda pakon marga Benjamin, saratus ualuh puluh ribu halak parmunsuh na pinilih, laho marmunsuh dompak ginompar ni Israel, sihol pasuangkon harajaon ai namin hu bani si Rehabeam, anak ni si Salomo.

22Tapi roh ma hata ni Naibata hu bani si Semaya, halak ni Naibata, sonon,

23“Hatahon ma hu bani si Rehabeam, anak ni si Salomo, raja hun Juda, hu bani ganup ginompar ni Juda ampa Benjamin ampa hu bani teba-teba ni bangsa ai.

24Sonon do hata ni Jahowa, ʻSeng bulih nasiam tangkog anjaha seng bulih nasiam marporang dompak sanina nasiam, ai ma halak Israel. Mulak ma nasiam ganup hu rumahni bei, ai na marharorohan hun Bangku do na masa on.ʼ” Jadi itangihon sidea ma hata ni Jahowa, laho ma sidea mulak romban hu bani hata ni Jahowa.

Ipauli si Jerobeam Anak ni Lombu Bahen Sisombahon

25Dob ai ipatoguh si Jerobeam ma huta Sikem i Dolog Efraim, lanjar marianan ijai; bingkat ma ia hunjai anjaha ipatoguh ma huta Penuel.

26Tapi nini si Jerobeam ma ibagas uhurni, “Tontu mulak do holi use harajaon ai hu bani ginompar ni si Daud.

27Anggo sai tangkog do bangsa on mamboan galangan hu Rumah ni Jahowa i Jerusalem, tontu mulak do holi uhur ni sidea bani tuan ni sidea hinan, ai ma hu bani si Rehabeam, raja hun Juda, anjaha bunuhon ni sidea ma ahu, ase boi mulak sidea hu bani si Rehabeam, raja hun Juda.”

28Dob ai manriah ma raja ai anjaha ibahen sidea ma dua lombu omas, anjaha ihatahon ma hu bani halak simbuei ai, “Sahei ma in, nasiam na tangkog in hu Jerusalem. Tonggor ma Naibata nasiam on, o Israel, na mangarahkon nasiam tangkog hun tanoh Masir.”

29Ipajongjong ma ai sada i Betel, anjaha na sada nari inahkon ma i Dan.

30Jadi gabe parbingkasan ni dousa ma ai, ai laho do bangsa ai hu bani gana-gana na i Betel sonai homa das hu bani na sada nari na i Dan.

31Ipauli do homa panumbahan i buntu-buntu, anjaha ipabangkit do homa malim hun tongah-tongah ni ganup bangsa ai, na so hun bani halak Levi.

32Anjaha iadongkon si Jerobeam do homa pesta bani bulan ualuh ari sapuluh lima mangusihi pesta na adong i Juda, anjaha igalangkon do galangan bani anjapanjap ai; sonai do homa ibahen i Betel, manggalang do ia bani lombu na pinadearni ai. Anjaha ipahorjahon ma i Betel malim-malim, na pinabangkitni ai, bani rumah panumbahan na i buntu-buntu.

33Jadi manggalang ma ia i atas ni anjapanjap, na binahenni ai i Betel, bani ari sapuluh lima bulan ualuh, bani bulan, na dob pinilihni ai romban hu bani rosuh ni uhurni; anjaha ibahen do sada pesta bani halak Israel, lanjar ia do manggalang bani anjapanjap ai ampa manutung dahupa.


  Share Facebook  |  Share Twitter

 <<  1 Raja-raja 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran