Dual PanelParjongjong ni Rumah Panumbahan
1Bani tahun paompatratus-ualuhpuluhkon dob luar halak Israel hun tanoh Masir, anjaha paompattahunkon dob si Salomo manggomgom halak Israel, bani bulan Siw, ai ma bulan paduahon, ipungkah raja ai ma pajongjong Rumah ni Jahowa.
2Ia rumah na pinajongjong ni Raja Salomo ai hu bani Jahowa onom puluh asta do ganjangni, tolu puluh asta bolagni anjaha tolu puluh asta gijangni.
3Anggo surambih na i lobei ni rumah panumbahan ai, dua puluh asta do ganjangni mangihutkon bolag ni rumah ai, anjaha bolagni sapuluh asta mangihutkon ganjang ni rumah ai.
4Anjaha ibahen do jendela bani rumah ai na marjaring-jaring na sosot.
5Sonai homa ipadear do bani tembok ni rumah ai surambih, inggot rumah ai, inggot ni pamurnanganni ai pakon pudi-pudini ai, ibahen do kamarni inggot.
6Surambih partoruh ai lima asta do bolagni, partongah-tongah ai, onom asta do bolagni, anjaha na patoluhon ai pitu asta do bolagni; ibahen do rumah panumbahan ai martangga hambing inggot, ase ulang pala tiang-tiangni ai inahkon hu tembok ni rumah ai.
7Sanggah na pajongjongkon rumah ai, batu na dob binarbar i pangkurakan ai do ipasang, ase ulang tarbogei be sora ni parpalu, tangkei, barang parugas bosi na legan, sanggah na pajongjongkon ai.
8Ia labah laho hu surambih partoruh ai hampit dangsina ni rumah ai do halani ai maningon marandar do halak laho hu surambih partongah-tongah, anjaha hun surambih partongah-tongah hu na patoluhon.
9Dob siap ipajongjong rumah ai, ipadear ma langit-langitni hun bani tiang pakon papan hayu ares.
10Ia surambih na pinauli ai inggot ni rumah ai ganup, lima asta do gijangni anjaha hayu ares do ipakei padomuhon ai hu rumah ai.
11Dob ai roh ma hata ni Jahowa hu bani si Salomo sonon,
12“Ia pasal rumah na pinajongjongmon, anggo marparlahou ho ibagas sagala titah-Ku, ibalosi ho uhum-Hu, iramotkon ho sagala parentah-Ku anjaha marparlahou ho ibagas ai, patotapon-Ku ma bam bagah-bagah-Ku, na dob Huparbagah hu bani bapamu, si Daud.
13Jadi marianan ma Ahu i tongah-tongah ni halak Israel, anjaha seng tadingkonon-Ku bangsang-Ku halak Israel.”
14Ase dob siap ipajongjong si Salomo rumah ai,
15ilampis ma dingding ni rumah ai hunbagas bani hayu ares, hun dasor ni rumah ai das hu gulang-gulang ni langit-langit ai, ilampis ma ai bani hayu hunbagas; anjaha dasor ni rumah ai ilampis ma ai bani hayu ingul.
16Ia sidua puluh asta na i pudi ni rumah ai ilampis do ai bani papan hayu ares hun dasorni nari das hu bani gulang-gulangni, anjaha ipadear ma ai hampit bagas gabe kamar pudi-pudi, gabe ianan na tang ma pansing.
17Ia ianan na ma pansing na i lobei ni ianan na tang ma pansing ai, ompat puluh asta do ganjangni.
18Ia hayu ares na hampit bagas ni rumah ai, maruhir mutik-mutik pakon bunga-bunga na mangerbang do; ganupan ai hun bani hayu ares do, seng dong taridah age sada batu.
19Ipadear do ianan na tang ma pansing ai i parsitongahan ni rumah ai, bahen hajongjongan ni Poti Parpadanan ni Jahowa.
20Ia ianan na tang ma pansing ai dua puluh asta do ganjangni, dua puluh asta bolagni anjaha dua puluh asta gijangni, anjaha ilampis do ai bani omas pitah. Sonai homa, ibahen do sada anjapanjap hun bani hayu ares,
21i lobei ni ianan na tang ma pansing ai, anjaha ilampis do ai bani omas.
22Ilampis do ganup rumah panumbahan ai bani omas, haganup rumah ai.
23Ibahen ma bani ianan na tang ma pansing ai dua herub hun bani hayu jetun, sapuluh asta gijangni.
24Lima asta do ganjang ni habong ni herub na sada, anjaha lima asta ganjang ni habong ni na sada nari, ase sapuluh asta ma hun bani ujung ni habong ni na sada hu bani na sada nari.
25Lanjar sapuluh asta do homa herub na legan ai; sisada ukuran pakon sisada turpa do herub na dua ai.
26Sapuluh asta do gijang ni herub na sada, sonai do homa herub na legan ai.
27Inahkon ma herub ai hu bani ianan na tang parbagas ai; herbang do habong ni herub ai, gabe ihonai habong ni na sada ma dingding na salopah, anjaha habong ni na sada nari mangonai bani habong ni salopah nari, marsihonaan do habong ni sidea na legan ai iparsitongahan ni rumah ai.
28Anjaha ilampis do herub ai bani omas.
29Iuhirhon do bani dingding ni rumah ai inggot gombaran ni herub, palem pakon bunga-bunga na mangerbang, bani kamar parbagas pakon pardarat.
30Ilampis do dasor ni rumah ai bani omas bani kamar parbagas pakon pardarat.
31Ibahen do labah hamasukan hu bani ianan na tang ma pansing ai hun bani hayu jetun; tohang pakon pasihonni ai manjadihon silima suhi.
32Haduasi bulung ni labah ai iuhir do bani gombaran ni herub, palem pakon bunga-bunga na mangerbang; anjaha ilampis do ai bani omas, sonai homa herub pakon palem ai ilampis do bani omas.
33Sonai homa ibahen do bani hamasukan hu ianan na susi ai, tiang hun bani hayu jetun marompat suhi.
34Anjaha dua bulung ni labahni hun bani hayu ingul; bulung ni na sada tarjadi hun bani dua papan na boi marputor, anjaha bulung ni na sada nari pe dua papan na boi marputor do.
35Iuhir do i atas ni Herubim, palem pakon bunga na mangerbang; anjaha ilampis ma ai bani omas, tipis ibahen bani uhiran ai.
36Ibahen do alaman parbagas ai mardingding hun bani tolu ristei batu na binarbar pakon sanristei tiang hun bani hayu ares na ihotam.
37Paompattahunkon bani bulan Siw ipamasuk ma onjolan ni rumah ni Jahowa ai,
38anjaha pasapuluh-sadatahunkon bani bulan Bul, ai ma bulan paualuhkon, siap ma rumah ai bani haganup bagianni romban hu bani ranggianni hinan; ase pala do pitu tahun ia na paulihon ai.