Alkitab Mobile SABDA
[VER] : [SIMALUNGUN]     [PL]  [PB] 
 <<  1 Samuel 12 >> 

Hata Parsirangan ni si Samuel hun bani Bangsa ai

1Dob ai nini si Samuel ma dompak ganup halak Israel, “Tonggor ma, domma hutangihon sora nasiam pasal haganup na hinatahon nasiam hu bangku, anjaha domma hupabangkit sada raja bani nasiam.

2On pe, tonggor ma, raja in ma mambobahon nasiam; domma sayur matua ahu anjaha ubanon, anjaha tonggor ma, i tongah-tongah nasiam do anakku; anjaha ahu do na mambobahon nasiam hun bani haetek-etekonku nari ronsi sadari on.

3Tonggor ma, ijon do ahu; marbalos ma nasiam dompak ahu i lobei ni Jahowa pakon i lobei ni na mininakan-Ni. Lombu ni ise ma ongga hubuat? Halode ni ise ma ongga hubuat? Ise ma na ongga huodoh-odoh? Hun bani tangan ni ise ma ongga ahu manjalo sisip laho manutup matangku? Patugah nasiam ma ase hupaulak.”

4Dob ai nini sidea ma mambalosi, “Seng ongga ihilang ham hanami, seng ongga isunsahi ham hanami barang ibuat ham atap aha hun bani atap ise pe.”

5Jadi nini ma dompak sidea, “Jahowa do saksi bani nasiam, anjaha na mininakan-Ni ai do saksi sadari on, paboa na so adong jumpah nasiam age aha ibagas tanganku.” Nini sidea ma, “Ia ma saksi.”

6Dob ai nini si Samuel ma dompak bangsa ai, “Jahowa do saksi, na pabangkit si Musa pakon si Aron anjaha na mangarahkon bapa nasiam tangkog hun tanoh Masir.

7On pe, roh ma nasiam hujon jongjong, ase hupasingat bani nasiam i lobei ni Jahowa, pasal haganup dear layak ni Jahowa, sagala na binahen-Ni bani nasiam pakon bani ompung nasiam.

8Dob das si Jakob hu tanoh Masir, doruh-doruh ma ompung nasiam bani Jahowa, gabe isuruh Jahowa ma si Musa pakon si Aron, ase iarahkon sidea ompung nasiam luar hun tanoh Masir, anjaha ipahundul sidea bani ianan on.

9Tapi ihalupahon sidea ma Jahowa, Naibata ni sidea, gabe ijualhon ma sidea hu tangan ni si Sisera, pambobai bani bala ni si Jabin, raja ni Hazor, pakon hu tangan ni halak Palistim pakon hu tangan ni raja Moab; ai ma na mamorang sidea.

10Jadi doruh-doruh ma sidea hu bani Jahowa, anjaha nini ma, ?Domma mardousa hanami, halani itadingkon hanami Jahowa, anjaha ibalosi hanami Baal pakon Astarot; on pe paluah Ham ma hanami hun bani tangan ni munsuhnami, ase ibalosi hanami Ham.?

11Jadi isuruh Jahowa ma si Jerub-Baal, si Barak, si Jepta ampa si Samuel, ase ipaluah nasiam hun tangan ni munsuh nasiam inggot, gabe sonang nasiam marianan.

12Tapi dob iidah nasiam si Nahas, raja ni halak Ammon roh mangimbang nasiam, gabe ihatahon nasiam hu bangku, ?Lang, maningon adong do raja, na manggomgom hanami, hape Jahowa Naibata nasiam do namin raja nasiam.?

13On pe, andin ma raja in, na pinilih nasiam in, na pinarsinta nasiam in; tonggor ma, domma ipabangkit Jahowa sada raja bani nasiam.

14Anggo ihabiari nasiam Jahowa, anjaha ibalosi nasiam Ia, anjaha itangihon nasiam sora-Ni, anjaha seng ilawan nasiam hata ni Jahowa, anjaha rap nasiam pakon raja nasiam, na marrajai nasiam mangirikkon Jahowa Naibata nasiam, jadi dear ma haganup.

15Tapi anggo seng ibalosi nasiam hata ni Jahowa, ilawan nasiam tene hata ni Jahowa, jadi mangonai ma tangan ni Jahowa bani nasiam ampa bani raja nasiam.

16On pe padohor nasiam ma jongjong hujon, anjaha idah nasiam ma parsahapan na bolon on, na binahen ni Jahowa i lobei nasiam.

17Ai lang marpariama gandum do nuan on? Dilo-dilo ma ahu holi bani Jahowa, gabe parrohon-Ni ma longgur pakon udan, ase itandai anjaha iidah nasiam buei ni hajahaton nasiam, na dob ibahen nasiam i lobei ni Jahowa, marhitei na pinindo nasiam bani nasiam sada raja.”

18Jadi dilo-dilo ma si Samuel hu bani Jahowa, gabe iparroh Jahowa ma longgur pakon udan bani ari ai. Jadi mabiar tumang ma ganup bangsa ai mangidah Jahowa pakon si Samuel.

19Dob ai nini ganup bangsa ai ma dompak si Samuel, “Tonggohon ma hanami jabolonmu hu bani Jahowa Naibatamu, ase ulang matei hanami; ai itambahi hanami ope hajahaton on hu bani dousanami na buei in, ai ma marhitei na mangindo sada raja bennami.”

20Jadi nini si Samuel ma dompak bangsa ai, “Ulang nasiam mabiar; domma ibahen nasiam sagala hajahaton on, tapi ulang ma manlembang nasiam hun bani na mangirikkon Jahowa, tapi balosi nasiam ma Jahowa hun bani gok ni uhur nasiam.

21Anjaha ulang ma nasiam manlembang mangirikkon naibata na so margagan, na so tarbahen mangurupi barang paluahkon nasiam, halani seng dong kuasani.

22Halani seng tumaram tadingkonon ni Jahowa bangsa-Ni halani goran-Ni na timbul in, ai domma iharosuhkon Jahowa mambahen nasiam gabe bangsa-Ni.

23Ahu pe, sai daoh ma in hun bangku mambahen dousa i lobei ni Jahowa marhitei na maronti martonggo mangkopkop nasiam; sai podahkononku do bani nasiam dalan na dear anjaha na pintor.

24Tapi sai habiari nasiam ma Jahowa, anjaha balosi nasiam ma Ia ibagas hasintongan hun bani gok ni uhur nasiam; pardiateihon nasiam ma hinabueini na binahen-Ni hu bani nasiam.

25Tapi anggo sai inunut nasiam do mambahen na jahat, masabkonon-Ni ma nasiam pakon raja nasiam.”


  Share Facebook  |  Share Twitter

 <<  1 Samuel 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran