Alkitab Mobile SABDA
[VER] : [SIMALUNGUN]     [PL]  [PB] 
 <<  1 Tawarikh 11 >> 

Si Daud Bangkit Raja, Itaban Jerusalem

1Dob ai martumpu ma ganup Israel marayak si Daud i Hebron, nini ma, “Tonggor ma, sisada holi-holi ampa sisada daging do hanami pakon ham.

2Bani panorang na salpu, age sanggah si Saul ope raja, ham do na mambobahon Israel luar pakon masuk; anjaha Jahowa, Naibatamu do mangkatahon bamu, ʻHo do na maningon marmahan bangsang-Ku halak Israel, ho do maningon gabe raja bani sidea.ʼ”

3Jadi roh ma ganup pangintuai ni Israel marayak raja ai i Hebron, anjaha marpadan ma si Daud pakon sidea i Hebron i lobei ni Jahowa; jadi iminaki sidea ma si Daud gabe raja manggomgom Israel, romban hubani hata ni Jahowa hinan marhitei si Samuel.

4Dob ai bingkat ma raja Daud rap pakon ganup Israel hu Jerusalem, ai ma Jebus; halak Jebus do na marianan i tanoh ai hinan.

5Ihatahon pangisi ni Jebus ma hubani si Daud, “Seng tumaram masuk ho hujon.” Hape italuhon si Daud do benteng Sion, ai ma huta ni si Daud.

6Ai domma ihatahon si Daud hinan, “Barang ise na parlobei, na mamunuh halak Jebusi ai, gabe kopala ma ia anjaha pambobai.” Si Joab, anak ni si Seruya do na parlobei manangkih hu atas, halani ai ma ase ia bangkit gabe pambobai.

7Jadi marianan ma si Daud ibagas benteng ai; halani ai do ase igoran benteng ai huta ni si Daud.

8Dob ai ibatar-batari ma huta ai inggot, hun Milo nari torus maringgot, anjaha si Joab do padearhon na legan ai ibagas huta ai.

9Dob ai lambin banggalni ma kuasa ni si Daud, ai ihasomani Jahowa Zebaot do ia.

Puanglima ni si Daud

10On do kopala ni puanglima ni si Daud, na manungkolisi pajonam harajaonni, rap pakon ganup halak Israel, na pabangkitkonsi gabe raja, romban hubani hata ni Jahowa pasal Israel.

11On do bilangan ni puanglima ni si Daud: Si Jasobeam, anak ni si Hahmoni, kopala ni na tolu ai; idiharhon do tanjani dompak tolu ratus halak, na binunuhni bani sada panorang.

12Dob ai si Eliasar, anak ni si Dodo, halak Ahohi; masuk hubani puanglima sitolu halak ai do ia.

13Ia do hasoman ni si Daud i Pas-Dammim, sanggah na martumpu ijai halak Palistim. Adong do ijai sanlambar juma gok andolei. Sanggah na maporus bangsa ai i lobei ni halak Palistim,

14laho ma ia jongjong i tongah-tongah ni juma ai, laho manjaga ai, anjaha italuhon ma halak Palistim ai. Ipaluah Jahowa do sidea marhasoman hamonangan bolon.

15Tuad do tolu halak humbani sitolu puluh kopala ai, hu dolog batu, hubani si Daud, hu liang Addulam; anjaha bala ni halak Palistim marsaran do i pamah Repaim

16Ibagas benteng do ijia si Daud, anjaha bala ni halak Palistim i Betlehem do.

17Tubuh ma sir ni uhur bani si Daud, nini ma, “Ise ma nani na ra mambere bah inumonku hun parigi na i Betlehem, na i lambung ni horbangan ai?”

18Jadi isungsung na tolu puanglima ai ma parsaranan ni halak Palistim, itahui sidea ma bah humbani parigi na i Betlehem, na i lambung ni horbangan ai, anjaha iboan sidea ma ai hubani si Daud. Tapi seng ra si Daud manginum ai, iuseihon ma ai bani Jahowa,

19anjaha nini ma, “Daoh ma in humbangku ibahen Naibatangku mambahen na sonin. Mintor ma ahu manginum daroh ni halak on?” Ai hosah ni sidea do isoyahon sidea laho mangalop bah on. Halani ai seng ra ia manginum ai. Ai ma na binahen ni puanglima sitolu halak ai.

20Si Abisai pe, anggi ni si Joab, kopala do bani sitolu puluh halak ai. Idiharhon do tanjani dompak tolu ratus halak, anjaha ibunuhi ma sidea, gabe tarmurmur ma ia i tongah-tongah ni sitolu puluh halak ai.

21Ia do simulianan humbani na tolu puluh halak ai, anjaha ia do kopala ni sidea; tapi seng taratasisi anggo sitolu halak ai.

22Si Benaya pe, anak ni si Joyada, sada halak na borani anjaha sihorjahon buei pambahenan, hun Kabsel do ia; ia do na manaluhon na dua anak ni si Ariel, na hun Moab ai. Masuk do ia homa anjaha ibunuh sada singa ibagas sada godung, bani sada ari, sanggah turun salju.

23Anjaha ibunuh do homa sada halak Masir, sada halak na bolon tumang lima asta ganjangni. Adong do ibagas tangan ni halak Masir ai sada tanja ansa sabang ni partonun; tapi tuad ma si Benaya manjumpahkonsi pakon sada tungkot, irampas ma tanja ai humbani tangan ni halak Masir ai, lanjar ibunuh ma ia marhitei tanjani sandiri.

24Ai ma na binahen ni si Benaya, anak ni si Joyada, gabe tarambilan ma ia i tongah-tongah ni na tolu puluh halak ai.

25Marsangap do ia i tongah-tongah ni na tolu puluh halak ai, tapi seng taratasisi anggo sitolu halak ai. Jadi ipabangkit si Daud ma ia gabe kopala ni pangawalni.

26Puanglima na legan ai: Si Asahel, anggi ni si Joab; si Elkana, anak ni si Dodo, na hun Betlehem;

27si Sammot na hun Harod; si Heles halak Peloni;

28si Ira, anak ni si Ikkes, halak Tekoa; si Abieser halak Anatot;

29si Sibbekai, halak Husati; si Ilai, halak Ahoah;

30si Maharai, halak Netopati; si Heled, anak ni si Bahanas, halak Netopati;

31si Itai, anak ni si Ribai hun Gibea, halak Benyamin; si Benaya, halak Piratoni;

32si Hurai, hun bah Gas; si Abiel, halak Araba;

33si Asmawet, hun Bah-Arum; si Eliahba, halak Saalboni;

34anak ni si Hasem, halak Gisonni; si Jonatan, anak ni si Sage, halak Harari;

35si Ahiam, anak ni si Sahar, halak Harari; si Elipal, anak ni si Ur;

36si Heper, halak Meherati; si Ahia, halak Peloni;

37si Hesro, halak Karmeli; si Naharai, anak ni si Esbai;

38si Joel, sanina ni si Natan; si Mibhar, anak ni si Hagri;

39si Selek, halak Amoni; si Naharai, halak Beroti, siusung sinjata ni si Joab, anak ni si Seruya;

40si Ira, halak Jitri; si Gareb, halak Jitri;

41si Uria, halak Heti; si Sabad, anak ni si Ahlai;

42Si Adina, anak ni si Sisa, halak Ruben, pambobai ni halak Ruben, tolu puluh halak hasomanni;

43si Hanan, anak ni si Maaka; si Josafat, halak Miteni;

44si Usia, halak Astarot; si Sama pakon si Jehiel, anak ni si Hotam, halak Aroer;

45si Jediael, anak ni si Simri pakon si Joha anggini ai, halak Tisi;

46si Eliel, halak Mahawi; si Jeribai pakon si Josawi anak ni si Elnaam; si Jitma, halak Moab;

47si Eliel, si Obed, si Jaasiel halak Zoba.


  Share Facebook  |  Share Twitter

 <<  1 Tawarikh 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel