Dual PanelTumpak hu Jerusalem
1Ia pasal pangurupion na bani halak na mapansing, seng porlu be suratkononku ai bani nasiam.
2Ai hubotoh do ringgas ni uhur nasiam, na dob pala hupapuji-puji i lobei ni halak Makedonia, paboa na dob marugas Akaya humbani na tahun in ope, anjaha haringgason nasiam ai do manjuljul sibueian hasoman ai.
3Tapi husuruh do sanina in, ase ulang lang mararti pamujinami bani nasiam pasal ai, ase sirsir ma nasiam tongon, songon na dob huhatahon hinan;
4ase ulang, anggo roh halak Makedonia rap pakon ahu, jadi jumpah nasiam lang sirsir, gabe maila hanami, ulang ma lobei nasiam ihatahon hanami, halani tenger ni uhurnami in.
5Halani ai porlu do ninuhurhu, marsuruh sanina in parlobei bani nasiam, laho pasirsirhon sibere-bere hatarimakasihon, na dob ipadankon nasiam, ase sirsir ma in, songon sibere-bere na unjah, ulang ma na hinolit.
6Tapi ingat nasiam ma on: Na mantidahkon otik, otik do sabionni; na mantidahkon buei, buei do sabionni.
7Ganup ma jinuljul ni uhurni, ulang ma humbani borat ni uhur atap halani paksa, ai ihaholongi Naibata do halak na malas uhur mambere.
8Ai markuasa do Naibata mambere unjah sagala pasu-pasu bani nasiam, ase sungkupan nasiam tongtong bani haganup, anjaha marlobih-lobih nasiam bani ganup horja na madear,
9domu hubani na tarsurat in, “Ia do na mambagihon, ibere do bani na miskin; totap do hapintoronni ronsi sadokah ni dokahni.”
10Anjaha na pasirsirhon bonih bani sipanabur ampa indahan bani na mangankon, pasirsiron anjaha pagandaonni do bani nasiam sisaburhononkon anjaha pabueionni buah ni hapintoron nasiam.
11Ase bani haganup nasiam ipabayak, laho mandalankon halayakon, na mangkorhon tarima kasih bani Naibata, marhitei hanami.
12Ia horja panumpakion on seng pitah na manungkupi hahurangan ni halak na mapansing ai in, tapi surung do pangkorhon ni ai homa marhitei buei martarima kasih bani Naibata.
13Ai marhitei habujuron nasiam bani horja panumpakion on ipuji sidea do Naibata, halani ibalosi nasiam do Ambilan Na Madear ni Kristus marhitei hasaksian nasiam, anjaha halani unjah nasiam marsibere-bere ibagas parsaoran nasiam pakon sidea ampa haganup halak na legan.
14Anjaha itonggohon sidea do nasiam ibagas sihol ni uhur bani nasiam, mardingat idop ni uhur na tarsulur, na humbani Naibata bani nasiam.
15Tapi tarima kasih ma bani Naibata halani sibere-bere-Ni, na so tarpajojor in.