Dual PanelParporangan ni si Daud dompak Halak Ammon ampa Halak Aram
1Dob sonai, matei ma raja ni halak Ammon, jadi si Hanun, anakni ai ma bangkit raja gantihni.
2Nini si Daud ma, “Dear do patuduhkononku habasaron ni uhurhu hu bani si Hanun, anak ni si Nahas, songon bapani ondi na basar bangku.” Jadi isuruh si Daud ma suruhanni laho mangapohisi halani panading ni bapani ai. Tapi dob das juakjuak ni si Daud ai hu tanoh ni halak Ammon,
3nini raja-raja ni halak Ammon ma dompak tuanni, si Hanun, “Sihol pasangapkon bapamu ma tumaram si Daud, nini uhurmu, ase isuruh bamu na mangapoh? Ai lang halani na laho mardiateihon huta on do pakon mangkahapisi ampa sihol mansedahonsi do, ase isuruh si Daud juakjuakni marayak ham?”
4Dob ai itangkap si Hanun ma juakjuak ni si Daud ai, anjaha ihatahon ma suhuron gumis ni sidea salopah, anjaha ihorot ma hiou ni sidea das hu bani hundulan ni sidea, dob ai ipalaho ma sidea.
5Dob tarbogei ai bani si Daud, isuruh ma suruhanni manjumpahkon sidea, ai bador tumang do dalahi-dalahi ai. Nini raja ai ma dompak sidea, “Tading ma nasiam lobei i Jeriko paima ganjang use gumis nasiam, dob ai pe ase mulak nasiam.”
6Tapi dob iidah halak Ammon na dob hagigi sidea bani si Daud, jadi isuruh halak Ammon ma suruhanni laho manggaji halak Aram na hun Bet-Rehob pakon halak Aram na hun Soba, dua puluh ribu halak tentara na mardalan nahei, anjaha hun bani Raja Maacha saribu halak, pakon sapuluh dua ribu halak hun Tob.
7Dob ibogei si Daud ai, jadi isuruh ma si Joab pakon ganup balani na garang ai.
8Jadi luar ma halak Ammon, ipatitir ma balani i lobei ni horbangan ni huta ai; tapi halak Aram na roh hun Soba ampa na hun Rehob, halak na hun Tob ampa na hun Maacha, pulig do jongjong bei i talun.
9Jadi dob iidah si Joab sai ia do isosak munsuh ai hun lobei pakon hun pudi, ipapulig ma deba hun bani halak pilihan na i Israel, anjaha iatur ma sidea mangimbang halak Aram ai;
10anjaha balani na tading ai iondoskon ma ai hu bani anggini si Abisai anjaha iatur ma ai marimbang dompak halak Ammon ai.
11Anjaha nini ma, “Anggo gogohan halak Aram, gabe seng tarimbang ahu sidea, roh ma ho mangurupi ahu; anggo gogohan halak Ammon, gabe lang tarimbang ho sidea, roh ma ahu mangurupi ho.
12Tenger ma uhurmu, imbang hita ma sidea mangkopkop bangsanta pakon mangkopkop huta ni Naibatanta; anjaha ipasaud Jahowa ma rosuh ni uhur-Ni.”
13Dob ai laho ma si Joab pakon bala hasomanni ai mandorab halak Aram, gabe maporus ma sidea i lobei ni.
14Jadi dob iidah halak Ammon, na dob maporus halak Aram ai, maporus ma pakon sidea hun lobei ni si Abisai, anjaha masuk hubagas huta ai. Dob ai mulak ma si Joab hun bani na mangimbang halak Ammon ai, anjaha das ma ia hu Jerusalem.
15Tapi dob iidah halak Aram na dob talu sidea ibahen halak Israel, martumpu ma sidea ganup.
16Dob ai ihatahon si Hadadezer ma luar halak Aram, na i dipar ni Bah Eufrat gabe das ma sidea hu Helam, anjaha si Sobah, pambobai ni bala ni si Hadadezer do na mambobahon sidea.
17Dob tarbotoh ai bani si Daud, gabe ipatumpu ma ganup halak Israel; idipari sidea ma Bah Jordan, gabe das ma sidea hu Helam. Halak Aram pe iatur ma balani laho marporang manjumpahkon si Daud.
18Tapi maporus ma halak Aram marimbang halak Israel; ibunuh si Daud ma hun bani halak Aram pitu ratus tentara pargareta, ompat puluh ribu siajak huda, sonai homa si Sobah ugahan lanjar matei do ijai.
19Jadi dob iidah ganup raja, na unduk na saindokah hu bani si Hadadezer, na dob talu sidea ibahen halak Israel, mardamei ma sidea hu bani halak Israel anjaha tunduk bani sidea. Jadi mabiar ma halak Aram laho mangurupi halak Ammon use.