Dual PanelPanggeori ni si Absalom; Maporus Raja Daud
1Dob salpu ai ihatahon si Absalom ma pasirsirhon bani gareta pakon huda, ambah ni ai lima puluh halak na mardalan i lobei ni.
2Somal do si Absalom puho girah sogod; anjaha jongjong ma ia i lambung dalan i horbangan ai; anjaha anggo adong halak na marparkara roh marayak raja ai mangindo uhum, iparsahapkon si Absalom ma ia, nini ma, “Hun huta ja do ham?” Anjaha anggo Ihatahon, “Na roh hun marga na sonon do jabolonmu i Israel.”
3Jadi nini si Absalom ma hu bani, “Torih ma, dear anjaha sintong do namin parkara in, tapi seng tumaram adong i lambung ni raja in na manangihon ham.”
4Ambahni ai nini si Absalom ope, “Ambit ahu ma namin panguhum, ipabangkit halak i nagori on! Jadi ganup na marsalisih barang na marparkara hu bangku ma roh, gabe papintoronku ma uhum hu bani.”
5Anjaha anggo adong halak na roh hundohor laho marsombah hu bani, isurdukkon ma tanganni laho manogusi, anjaha isummah ma ia.
6Sonai ma ibahen si Absalom hu bani ganup halak Israel, na roh hu bani raja ai mangindo uhum; sonai ma ibahen si Absalom laho mambuat uhur ni halak Israel.
7Dob salpu ompat tahun, nini si Absalom ma hu bani raja ai, “Mahua lopas ham ma ahu laho hu Hebron ase hugalar bagah-bagahku na dob hubagahkon hu bani Jahowa.
8Ai domma marbagah-bagah hinan juakjuakmu on, sanggah marianan ope ahu i Gesur, i tanoh Aram, ningku do, ʻAnggo sonang do ahu mulak iarahkon Jahowa hu Jerusalem, boanonku do sada galangan bani Jahowa.ʼ”
9Dob ai nini raja ai ma hu bani, “Antong laho ma ho ibagas damei.” Jadi bingkat ma ia laho hu Hebron.
10Tapi isuruh si Absalom ma parkahap hu ganup marga ni halak Israel mangkatahon, “Anggo ibogei nasiam sora ni tarompit, hatahon nasiam ma, ʻDomma bangkit raja si Absalom i Hebron!ʼ”
11Laho do dua ratus halak na niontang hun Jerusalem rap pakon si Absalom, saluju do sidea na laho ai, aha pe lang ipabotoh-botoh sidea pasal na masa ai.
12Sanggah na manggalang ai ia, ihatahon si Absalom ma si Ahitopel, halak Gilo ai, panuturi ni si Daud, roh hun hutani ai ma Gilo. Jadi lambin gomosni ma parbulawanan ai, anjaha halak simbuei pe lambin bueini do na hampit si Absalom.
13Dob ai roh ma sada halak siboan barita hu bani si Daud, nini ma, “Domma hampit si Absalom ganup uhur ni halak Israel!”
14Jadi nini si Daud ma dompak ganup juakjuakni, na rap pakonsi i Jerusalem, “Eta, laho ma hita maporus, ai seng dong tumaram haluahon banta hun bani si Absalom. Podas ma hita laho ulang sompat jumpahsi hita, gabe iagou hita anjaha ibunuhi pangisi ni huta on marhitei podang.”
15Nini juakjuak ni raja ai ma mambalosisi, “Barang aha na pinangindo ni uhur ni raja in, si bahenon ni juakjuakmu on do.”
16Dob ai bingkat ma raja ai odor rap pakon ganup pangisi ni rumahni. Tapi itadingkon raja ai do sapuluh nasipuang manjagai rumahni.
17Jadi dob luar raja ai rap pakon halak simbuei ai na mardalan nahei mangirikkonsi, marsaran ma sidea dohorhon rumah pangampis.
18Dob ai mamontas ma ganup juakjuakni ai hun lambungni; sonai homa ganup halak Kereti pakon Peleti (ai ma pangawal) pakon ganup halak Gat, sionom ratus tentara ai.
19Dob ai nini raja ai ma dompak si Itai, halak Gat ai, “Mase ma pala bingkat ham rap pakon hanami? Mulak ma ham anjaha tading ma ham rapkon raja ai; ai bangsa na legan do ham, ambahni ai, na binuang hun nagorimu.
20Nantuari ope ham roh, mintor patut ma arahkononku ham sadari on mawat-awat rap pakon hanami, ai na laho ma ahu anjaha lang hubotoh atap dompak ja. Mulak ma ham, anjaha arahkon ma saninamu. Sai ipatuduhkon Jahowa ma bamu idop ni uhur-Ni pakon habonaron-Ni.”
21Nini si Itai ma mambalosi, “Songon sintongni manggoluh Jahowa, anjaha manggoluh homa tuanku anjaha rajanami, barang ija ham rajanami, manggoluh barang matei, maningon ijai do pakon juakjuakmu on.”
22Dob ai nini si Daud ma dompak si Itai, “Antong, palobei ma!” Jadi dihut ma si Itai, halak Gat ai laho rap pakon hasomanni ampa dakdanak na rap pakonsi.
23Anjaha tangis bei do gogoh-gogoh ganup pangisi ni nagori ai, sanggah na mamontas ai ganup na mabuei ai; idipari raja ai ma Bah Kidron, anjaha halak na mabuei ai pe haganup, inunut ma mardalan dompak halimisan.
24Tonggor ma, si Sadok pakon si Abyatar pe roh do rap pakon halak Levi, na mangusung Poti Parpadanan ni Naibata; ipatibal sidea ma poti ni Naibata, paima luar ganup halak simbuei ai hun huta ai.
25Tapi nini raja ai ma dompak si Sadok, “Boan ma mulak poti ni Naibata in hu huta! Anggo jumpahan idop ni uhur do ahu i lobei ni Jahowa, sai arahkonon-Ni do ahu mulak, anjaha pataridahkonon-Ni do on pakon ianan-Ni use bangku.
26Tapi anggo ihatahon, ʻSeng marosuh Ahu mangidah ho,ʼ tonggor ma, ijon do Ahu, ibahen ma hu bangku domu hu bani rosuh ni uhur-Ni.ʼ”
27Dob ai nini raja ai ma dompak Malim Sadok, “Mulak ma ham pakon si Abyatar ibagas damei hu huta ai, rap pakon anak nasiam na dua ai, si Ahimas anakmu, pakon si Jonatan, anak ni si Abyatar.
28Tonggor ma, hupaima pe bani pandiparan na laho hu halimisan, paima roh barita bangku hun bani nasiam.”
29Jadi iboan si Sadok pakon si Abyatar ma poti ni Naibata mulak hu Jerusalem, anjaha tading ijai ma sidea.
30Dob ai itangkogi si Daud ma tangkogan ni Dolog Jetun ai, tangis turut-turut mardalan, lang marsipatu anjaha irongkob uluni; anjaha ganup halak na mabuei ai na rap pakonsi irongkob bei do uluni, tangkog ma sidea anjaha tangis turut-turut mardalan.
31Anjaha adong ma na patugahkon hu bani si Daud, dihut do si Ahitopel na marbulawan ai pakon si Absalom. Jadi nini si Daud ma, “Ham Jahowa, sai sundati Ham ma tahi ni si Ahitopel.”
32Jadi dob das si Daud hu pakpak ni dolog ai, ija somal halak manombah Naibata, tonggor ma, roh ma si Husai, halak Arki ai manjumpahkonsi, marpaheian na marigat anjaha tanoh i atas uluni.
33Nini si Daud ma hu bani, “Na pasusahkon ahu do ho, anggo ahu do iirikkon ho.
34Tapi anggo mulak ho hu huta ai, anjaha ihatahon ho hu bani si Absalom, ʻJuakjuakmu ma ahu ale rajanami; juakjuak ni bapamu do ahu na saindokah, tapi anggo nuan juakjuakmu ma ahu, jadi boi ma sundatanmu tahi-tahi ni si Ahitopel dompak ahu.
35Ambahni ai, Malim Sadok pakon Abyatar do hasomanmu ijai; anjaha haganup hata na binogeimu i rumah ni raja ai, patugah ma ai hu bani Malim Sadok pakon Abyatar.
36Tonggor ma, ijai do rap pakon sidea anak ni sidea na dua ai: si Ahimas, anak ni si Sadok pakon si Jonatan, anak ni si Abyatar; marhitei sidea boi do patugahon nasiam bangku sagala na binogei nasiam.”
37Jadi das ma si Husai, huan-huan ni si Daud ai hu huta ai; si Absalom pe masuk ma hu Jerusalem.