Dual PanelSi Daud Mamilangi Halak Israel; Uhum bani Halani Dousani ai
1Dob ai mangulaki ma use Jahowa marringis mangidah halak Israel, gabe iojur ma si Daud mangimbang sidea, nini ma, “Laho ma ho, bilangi ma halak Israel pakon halak Juda!”
2Jadi nini raja ai ma hu bani si Joab, pambobai ni bala na rap pakonsi ai, “Siari ma ganup marga ni halak Israel, olat ni Dan das hu Berseba, anjaha bilangi ma halak simbuei in, ase hubotoh bilangan ni bangsa ai.”
3Tapi nini si Joab ma hu bani raja ai, “Sai itambahi Jahowa Naibatamu ma bangsa on saratus lompit nari hun bani na adong nuan, anjaha sai sampang ma iidah panonggor ni tuanku ai; tapi mase ma ipangindo uhur ni tuanku mambahen na sonon?”
4Tapi parhata sada do raja ai dompak si Joab pakon kopala-kopala ni bala ai. Jadi laho ma si Joab pakon kopala-kopala ni bala ai hun lobei ni raja ai, laho mamilangi halak Israel.
5Idipari sidea ma Bah Jordan, ipungkah ma hun Aroer pakon hun huta na iparsitongahan ni pamah ai, dompak Gad pakon Jaeser.
6Dob ai das ma sidea hu Gilead pakon hu Kades, na i tanoh ni halak Het, dob ai das ma sidea hu Dan, anjaha hun Dan maringgot ma sidea laho hu Sidon;
7dob ai das ma sidea hu benteng Tirus pakon bani ganup huta-huta ni halak Hewi ampa halak Kanaan; dob ai laho ma sidea hu tanoh Dangsina ni tanoh Juda, hu Berseba.
8Sonai ma isiari sidea sab tanoh ai, anjaha dob salpu siah bulan dua puluh ari, mulak ma sidea use hu Jerusalem.
9Ibere si Joab ma bilangan ni bangsa na binilangan ai hu bani raja ai, “I Israel adong do ualuh ratus ribu halak, i Juda lima ratus ribu halak na mangasup manintak podang.”
10Tapi bukbak ma taroktok ni si Daud dob ibilangi bangsa ai. Jadi nini si Daud ma hu bani Jahowa, “Banggal tumang do dousangku marhitei pambahenankai. On pe, Ham Jahowa, sasap Ham ma hajahaton ni jabolon-Mu on; ai haotoon banggal do na hubahen on.”
11Jadi dob puho si Daud patarni ai, roh ma hata ni Jahowa hu bani Nabi Gad, halak na marpanonggoran ai bani si Daud, nini ma,
12“Laho ma ho, hatahon ma hu bani si Daud, ʻSonon do hata ni Jahowa, tolu marbagei sipatuduhkonon-Ku bam; pilih ma sada hunjai sibahenon-Ku hu bam.ʼ”
13Jadi laho ma si Gad marayak si Daud patugahkon hata ai hu bani, nini ma, “Iparsinta uhurmu roh lohei maningting tolu tahun hu tanohmu, atap maningon maporus ham ayak-ayakon ni munsuhmu tolu bulan i tanohmu, atap masa tolu ari sampar i tanohmu? On pe pingkir anjaha putuskon ham ma, aha balos siboanonku bani Jahowa na marsuruh ahu.”
14Dob ai nini si Daud ma hu bani si Gad, “Rusak tumang do uhurhu; dearan ma hanami madabuh hu tangan ni Jahowa, ai banggal do idop ni uhur-Ni; tapi ulang ma madabuh ahu hu tangan ni jolma.”
15Jadi ipamasa Jahowa ma sampar hu bani halak Israel hun bani sogod ai nari das hu bani panorang na dob binuhul; gabe matei ma hun bani bangsa ai, olat ni Dan das hu Berseba pitu puluh ribu halak.
16Tapi dob ipagostong malekat ai tanganni hu Jerusalem laho mangagou huta ai, marulang hape namin ma Jahowa pasal hamagouan ai, anjaha nini ma hu bani malekat, na parrohkon hamagouan ai, “Sae ma in! Parontihon ma tanganmin! Tudu do malekat ai ijia i lambung ni pardogeian ni si Arapna, halak Jebusi ai.”
17Jadi dob iidah si Daud malekat na mamunuh bangsa ai, nini ma hu bani Jahowa, “Tonggor ma, ahu do na mardousa, anjaha ahu do na mambahen hajahaton on, tapi biri-biri on, aha ma adong ibahen sidea? Mangonai bangku ma namin tangan-Mu pakon bani ginompar ni bapa.”
18Dob ai roh ma si Gad marayak si Daud bani na sadari ai, nini ma hu bani, “Tangkog ma ham, pasuk ham ma sada anjap-anjap hu bani Jahowa bani pardogeian ni si Arapna, halak Jebusi ai.”
19Jadi tangkog ma si Daud, songon na hinatahon ni si Gad, domu hu bani na pinarentahkon ni Jahowa.
20Sanggah na manatap-natap si Arapna iidah ma roh raja ai pakon juakjuakni marayaksi; si Arapna pe luar ma, anjaha marrogop ma ia marsombah hu bani raja ai.
21Jadi nini si Arapna ma, “Halani aha do ase roh tuannami anjaha rajanami hu bani jabolonmu?” Nini si Daud ma, “Sihol mamboli pardogeian in hunbam, laho pajongjong sada anjap-anjap bani Jahowa, ase andohar laho sampar on hun bani bangsa on.”
22Dob ai nini si Arapna ma hu bani si Daud, “Ibuat tuanku ma in, anjaha igalangkon ham ma ijin barang aha harosuh ni uhurmu; andon lombu bahen galangan situtungon, pakon parugas mardogei ampa pasangan ni lombu bahen soban.
23Ganupan on, rajanami, sihol sombahkonon ni juakjuakmu hu bani raja in. Lanjar ihatahon si Arapna ma hu bani raja ai, ʻSai idop ma uhur ni Jahowa Naibatamu bamu.ʼ”
24Tapi nini raja ai ma hu bani si Arapna, “Lang, maningon gok do harga ni ai bolionku hunbam, ai seng sihol ahu manggalangkon bani Jahowa Naibatangku, na so marboli bangku.” Jadi iboli si Daud ma pardogeian ai pakon lombu ai marharga lima puluh sekel pirak
25Dob ai ipajongjong si Daud ma sada anjap-anjap bani Jahowa ijai, anjaha igalangkon ma galangan situtungon pakon galangan pardameian i atas ni. Jadi marpangulaki ma uhur ni Jahowa mangidah pangisi ni tanoh in, anjaha ipadaoh ma sampar ai hun Israel.