Dual PanelTalu Israel Ibahen Juda
1Pasapuluhualuh-tahunkon dob raja si Jerobeam, bangkit raja ma si Abia i Juda.
2Tolu tahun dokahni manrajai ia i Jerusalem. Goran ni inangni si Mikaya do, boru ni si Uriel, hun Gibea. Dob ai tubuh ma hamunsuhon i holangkolang ni si Abia pakon si Jerobeam.
3Si Abia do na mamungkahkon hamunsuhon ai marhasoman bala ompat ratus ribu halak pilihan, halak siparporang na borani. Si Jerobeam pe ipaodor ma balani mangimbangsi, ualuh ratus ribu halak, halak na somal marmunsuh.
4Dob ai tangkog ma si Abia hu atas ni Dolog Semaraim, na i pardologan ni Efraim, nini ma, “Tangar ma hatangkon ale Jerobeam ampa ganup Israel!
5Atene, ai lang ibotoh nasiam, na dob ibere Jahowa, Naibata ni Israel do harajaon ni Israel hubani si Daud ronsi sadokah ni dokahni, hubani pakon hubani ginomparni, pala marhasoman garam padan-Ni ai?
6Tapi manlawan ma si Jerobeam, anak ni si Nebat, juakjuak ni si Salomo, anak ni si Daud, manggeori dompak tuanni,
7anjaha martumpu do hu lambungni dalahi na hampung maruhur anjaha na so margagan, mangimbang si Rehabeam, anak ni si Salomo, sanggah poso ope si Rehabeam, gabe seng pag ia mangimbang sidea.
8Hape isurahon nasiam do nuan sihol manlawan harajaon ni Jahowa, na ibagas tangan ni anak ni si Daud, halani na buei ai nasiam, anjaha na i lambung nasiam ai lombu omas, na pinauli ni si Jerobeam, bahen naibata na legan bani nasiam.
9Ai lang domma iusir nasiam malim ni Jahowa, ginompar ni si Aron pakon halak Levi, anjaha ipabangkit nasiam malim nasiam sandiri mangihutkon aturan ni bangsa sipajuh begu-begu? Ganup na roh mamboan sada lombu poso-poso pakon pitu biribiri tunggal, laho mangindo pabangkitkonsi, ai do ipabangkit nasiam gabe malim bani naibata na legan.
10Tapi Jahowa do Naibatanami, seng itadingkon hanami Ia, anjaha anak ni si Aron do na marugas bani Jahowa songon malim, anjaha halak Levi mandalankon horjani.
11Ganup sogod pakon ganup bodari do sidea manutung galangan situtungon bani Jahowa, sonai homa na misbou marbagei-bagei, inahkon sidea do homa ruti sigalangkonon ai i atas meja na humbani omas pitah ai; anjaha iuras sidea do ganup bodari parpalitaan omas ai, ase gara palitani ai ganup bodari; ai ibalosi hanami do parentah ni Jahowa, Naibatanami, tapi anggo nasiam domma itadingkon nasiam Ia.
12Tonggor ma, Naibata do na mambobahon hanami pakon malim-Ni sipartarompit, na sinompul ni sidea manlawan nasiam. Nasiam ginompar ni Israel, ulang ma marporang nasiam dompak Naibata ni ompung nasiam, ai seng anjai monang nasiam.”
13Tapi ihatahon si Jerobeam ma bala sipangonggopi roh hun pudi ni sidea, gabe hampit lobei ni Juda ma hulanan ni si Jerobeam, anjaha sipangonggopi ai hun pudi ni sidea.
14Jadi sanggah na marhusor ai halak Juda, tonggor ma, turtar ma porang dompak sidea hun lobei pakon hun pudi. Jadi doruh-doruh ma sidea hubani Jahowa, anjaha malim manompul tarompitni bei.
15Dob ai marsurak porang ma halak Juda gogoh-gogoh. Jadi dob marsurak halak Juda ai, italuhon Naibata ma si Jerobeam pakon ganup halak Israel i lobei ni si Abia pakon halak Juda.
16Maporus ma halak Israel i lobei ni Juda, anjaha iondoskon ma sidea hubagas tangan ni sidea.
17Bajan tumang do pamunuhon ni si Abia pakon bangsani ai bani sidea. Radag do humbani halak Israel lima ratus ribu halak na tarpilih.
18Talu tumang do halak Israel ijia, tapi lambin margogoh ma anggo halak Juda, halani marpangunsandeian sidea hubani Jahowa, Naibata ni ompung ni sidea.
19Iayak si Abia ma si Jerobeam anjaha itaban ma piga-piga huta hun bani: Betel pakon dusunni, Jesana pakon dusunni, Epron pakon dusunni.
20Seng mulak margogoh be si Jerobeam sadokah goluh ni si Abia. Dob ai itompas Jahowa ma ia, lanjar matei.
21Tapi lambin mardohar do si Abia; ibuat ma sapuluh ompat naboru bahen parinangonni, anjaha tubuh ma bani dua puluh dua anak pakon sapuluh onom boru.
22Barita na legan pasal si Abia, na binahenni pakon na sinahapkonni, tarsurat do ai ibagas Buku Barita ni Nabi Iddo.