Dual Panel1Balos na lamlam pahombun ringis, tapi hata na kasar mamuhoi gila,
2Dilah ni halak na maruhur mantektekkon habotohon, tapi haotoon do puas humbani pamangan ni halak na bodoh.
3Dompak sab dunia on do pangkawah ni Jahowa, ipardiatei do halak parjahat ampa sidear uhur.
4Dilah na lamlam, ai ma hayu hagoluhan; tapi dilah siparladung mambahen maborit uhur.
5Halak na oto magigi do bani pangajaran ni bapani, tapi halak na marimbagaskon pinsang-pinsang, ai ma siparuhur.
6I rumah ni halak parpintor buei do arta, tapi masese do pansarian ni halak parjahat.
7Bibir ni halak na pentar manuan habotohon, tapi seng sonai anggo uhur ni halak na bodoh.
8Galangan ni halak parjahat hagigi do ai bani Jahowa, tapi marosuh do Ia bani tonggo ni halak parpintor.
9Hagigi ni Jahowa do dalan ni halak parjahat, tapi holong do uhur-Ni bani halak siparayak hapintoron.
10Pangajaran na parah do mangonai bani halak sipanlembang, anjaha maningon matei do na mangkagigihon pinsang-pinsang.
11Nagori toruh ampa naraka, talar do ai i lobei ni Jahowa, samintolah uhur ni jolma ma lang.
12Halak parrisa seng marosuh ia ipaingat, seng ra ia marayak halak na pentar.
13Uhur na megah mambahen bohi minar, tapi marhitei uhur na marhoru galek do tonduy.
14Uhur na pantas mangindahi habotohon, tapi babah ni halak na bodoh mansahapkon haotoon.
15Bani halak na marhoru sambor do sagala panorang, tapi bani halak siparmalas uhur hira ari pesta do tongtong.
16Rahanan na otik marhasoman biar bani Jahowa, ase mararta na buei, tapi marhasunsahan.
17Rahanan do na mangankon lowoh ibagas holong, ase mangankon lombu na mombur ibagas domdom.
18Halak parringis mamuhoi paringoran, tapi halak parsabar mangintopi partinggilan.
19Dalan ni halak parrayoh songon hondor duri do, tapi hornop do anggo dalan ni halak parpintor.
20Anak na pentar pamalas uhur ni bapani, tapi halak na oto mapas do ia bani inangni.
21Haotoon, malas ni uhur do ai bani na hurang uhur, tapi halak na pantas maruhur, pintor do pardalanni.
22Sundat do ranggian anggo hurang panriahan, tapi saud do ai anggo buei sipamodahi.
23Malas ni uhur do ai bani halak anggo hona balosni, anjaha jengesan ai, sangkababah hata na topat bani panorangni.
24Dalan hagoluhan bani halak na maruhur manuju dompak datas, laho manimbili nagori toruh ai.
25rumah ni sigijang uhur iparseda Jahowa do. tapi ipatotap do parbalogan ni naboru na mabalu.
26Hagigi ni Jahowa do riah ni halak parjahat, tapi pansing do hata na madear i lobei-Ni.
27Na parsedahon rumahni sandiri do halak sibuat untung na so tiba dalanni, tapi sai manggoluh do halak sihagigihon sisip.
28Uhur ni halak parpintor ipingkiri do balos sibereonni, tapi humbani pamangan ni halak parjahat marjullak-jullak do hajahaton.
29Daoh do Jahowa humbani halak parjahat, tapi itangihon do tonggo ni halak parpintor.
30Pangkawah na basar pamalas uhur, anjaha barita na madear pahisar holi-holi.
31Halak na ra manangihon podah na madear, marianan do ia i tongah-tongah ni halak na maruhur.
32Halak na manulak podah, dirini do iparseda, tapi na manangihon pangajaran dapotan hapentaran.
33Biar bani Jahowa ai ma pangajaran, na mambahen pentar, anjaha toruh ni uhur do parlobei ni hasangapon.